O‘zbekistonda koronavirusdan yana bir o‘lim holati qayd etildi
Rossiyadan Tojikiston orqali Surxondaryoga kirib kelgan sirdaryolik bemor I. yurak qon-tomir va o‘tkir nafas yetishmovchiligidan vafot etgan.
Xalqaro masofaga qatnashga mo‘ljallangan yuk avtomashina haydovchisi I. Rossiyadan Tojikiston orqali Surxondaryoga kirib kelgan. Asli sirdaryolik bo‘lgan ushbu fuqaroda ikki tomonlama pnevmoniya og‘ir kechib, 5 may kuni viloyat yuqumli kasalliklar shifoxonasiga yotqizilgan. O‘tkazilgan diagnostik tahlillardan so‘ng bemorda “Covid-19” infeksiyasi ham aniqlangan. Bu haqda SSV matbuot xizmati xabar qildi.
Shu yilning 11 may kuni esa ahvoli yomonlashgach “Covid-19” infeksiyasining og‘ir kechishi, ikki tomonlama o‘tkir bronxopnevmoniya og‘ir turi tashxisi bilan reanimatsiya bo‘limiga olingan. Bo‘limda bemorga mutaxassislar tomonidan belgilangan standartlar asosida reanimatsion yordam ko‘rsatilgan.
Bundan tashqari, vazirlikning turli yo‘nalishlari bo‘yicha bosh mutaxassislari va Respublika shoshilinch tibbiy yordam ilmiy markazi mutaxassislari tomonidan telemeditsina orqali konsiliumlar ham o‘tkazilib, doimiy nazorat ta’minlangan. Biroq ko‘rsatilgan reanimatsion muolajalarga qaramasdan sun’iy nafas olish apparatida bo‘lgan bemor yurak qon-tomir va o‘tkir nafas yetishmovchiligidan vafot etgan.
Izoh qoldirish