Innovatsion rivojlanish vazirligida tashkilotlar, idoralar hamda tadbirkorlar ishtirokida Mamlakatimiz iqtisodiyoti tarmoqlarida sun’iy intellektni rivojlantirish konsepsiyasi va “Yo‘l xarita”sini ishlab chiqish maqsadida davra suhbati bo‘lib o‘tdi.
“Mamlakat iqtisodiyotini rivojlantirishda sun’iy intellekt o‘rni” mavzusiga bag‘ishlangan yig‘ilishni innovatsion rivojlanish vazir o‘rinbosari Azimjon Nazarov ochib berdi.
— Jahon Intellektual mulk tashkilotining 2019 yil e’lon qilgan ma’lumotiga ko‘ra, 1960 yildan 2018 yilga qadar sun’iy intellekt bilan bog‘liq 340 000 ta patent olingan va 1 636 649 ta ilmiy maqolalar chop etilgan. 2002—2017 yillar oralig‘ida sun’iy intellekt sohasida chop etilayotgan maqolalarning yillik o‘sish sur’ati 5.6% ni tashkil etmoqda, olingan patentlar sonining yillik o‘sish sur’ati esa qariyb 28% ni tashkil etadi. 2030 yilga kelib SIning global iqtisodiyot YaIMga qariyb 15 trillion dollar kiritishi taxmin etilmoqda. Quvonarli jihati shundaki, davra suhbati davomida mamlakatimizda sun’iy intellektni rivojlantirish va ushbu sohada ilg‘or mamlakatlar qatoridan joy olishimiz uchun fundamental va amaliy asoslar mavjudligi yaqqol ko‘rindi, — dedi A.Nazarov.
Innovatsion rivojlanish vazirligi mutaxassislari tomonidan tayyorlangan taqdimotda xalqaro miqyosda CIga qiziqish ortib borayotgani aytib o‘tildi va raqamli iqtisodiyot bo‘yicha yetakchilik qilayotgan mamlakatlardagi (AQSh, Xitoy, Buyuk Britaniya, Yaponiya, Germaniya, Fransiya va boshqalar) sun’iy intellektni rivojlantirish strategiyasi haqida ma’lumotlar berildi. Bundan tashqari, SI bo‘yicha ilmiy nashrlar va patentlarning o‘sib borishi kuzatilayotgani ta’kidlab o‘tildi.
Shuningdek, “Smart Chain” MChJ vakili Bobur Rahimov “Turizm soshasida sun’iy intellekt texnologiyalarni qo‘llashning ijobiy jihatlari“, “O‘zeltexsanoat“ uyushmasi vakili Abdumalik Kenjaboyev “Sanoatdagi SI“, Abror Musaxanov (Toshkent tibbiyot Akademiyasi) “Sog‘liqni saqlashda sun’iy intellekt“ hamda Begzod Ortiqov (“EcoTexnoCity” MChJ) “Smart universitet“ loyihalarining taqdimotini o‘tkazdi.
Seminar yakunlariga ko‘ra iqtisodiyotga sun’iy intellekt texnologiyalarini rivojlantirish va joriy etishning navbatdagi qadamlari yuzasidan muhokamalar bo‘lib o‘tdi. Taklif etilgan tashkilotlar vakillari O‘zbekistonda SI rivojlanish konsepsiyasini yaratishda hamkorlik istiqbollari yuzasidan o‘z fikr va takliflarini bildirdilar.
Tadbir yakunida A.Nazarov Fanlar akademiyasi, oliy ta’lim muassasalari vakillari, startap loyihalar asoschilari, tadbirkorlar, xususiy kompaniyalar, shuningdek, sun’iy intellekt sohasidagi taklif etilgan ekspertlar ishtirokida forsayt tashkil etishni taklif qildi.
Izoh qoldirish