Investitsiyalar va tashqi savdo vazirining o‘rinbosari Sh.Vafayev, O‘zbekiston Respublikasi Investitsiyalar va tashqi savdo vazirligi huzuridagi Investitsiya loyihalarini ishlab chiqarish markazi direktori X.Teshabayev, BAA hukumat va kelajak ishlari bo‘yicha vazirligining liderlik va davlat imkoniyatlari Kotibiyati direktori o‘rinbosari Yasira Al Nakbi hamda "Dubai Future Foundation" (BAA) bosh direktori Xalfan Belhoul ishtirokida videokonferensiya bo‘lib o‘tdi.
Videokonferensiya davomida Amirlik tomoni "Dubai Future Foundation" innovatsion, talabga ega bo‘lgan investitsiya loyihalarini ishlab chiqish va amalga oshirishdagi faoliyati va imkoniyatlari haqida ma’lumotlar taqdim etdi, shuningdek, biznes-inkubatorlarni yaratish bo‘yicha o‘z tajribasi bilan o‘rtoqlashdi.
Muzokaralar yakuni bo‘yicha Markaz va "Dubai Future Foundation" o‘rtasida to‘g‘ridan-to‘g‘ri hamkorlikni yo‘lga qo‘yish, Markaz salohiyatini oshirish va Markaz qoshida faoliyat yuritayotgan "Loyihalar fabrikasi" samaradorligini oshirishga qaratilgan o‘quv dasturini tashkil etish to‘g‘risida kelishuvga erishildi. Uning asosiy vazifasi yangi yirik investitsiya loyihalarini ishlab chiqish hisoblanadi.
Ma’lumot uchun: "Dubai Future Foundation" (DFF) 2016 yilda BAA vitse-Prezidenti va bosh vaziri Sheyx Muxammad bin Rashid Al Maktum tomonidan tashkil etilgan. DFF BAA kelajagini rejalashtirish va shakllantirishda asosiy rol o‘ynaydi. DFF Dubayni kelajakning yetakchi shahriga aylantirishga intiladi. DFF eng yetuk ziyolilar va ko‘plab istiqbolli kashfiyotchilar uchun global yo‘nalish sifatida Dubayning pozitsiyasini mustahkamlashga yordam beradi. Shuningdek, startaplarni qo‘llab-quvvatlab, butun dunyo bo‘ylab innovatsion loyihalarni aniqlash bo‘yicha faoliyat yuritadi.
Bugungi kunda DFF O‘zbekiston Respublikasi Axborot texnologiyalari va kommunikatsiyalarini rivojlantirish vazirligi bilan ixtisoslashtirilgan onlayn portal orqali keng aholi uchun bepul masofaviy ta’lim beruvchi "Bir million dasturchi" loyihasi doirasida hamkorlik qilmoqda. Keng qamrovli loyihani amalga oshirish bo‘yicha kelishuvlarga O‘zbekiston Prezidenti Shavkat Mirziyoyevning 2019 yilning mart oyida BAAga tashrifi chog‘ida erishildi.
Izoh qoldirish