Xalqaro davra suhbati: “Bolalar kambag‘alligini bartaraf etish — bolalar farovonligining asosiy sharti: O‘zbekiston tajribasi”

Tadbirning maqsadi bolalar kambag‘alligi bo‘yicha kompleks tadqiqot natijalarini tasdiqlash va muhokama qilish, shuningdek bolalar huquqlari va farovonligini ta’minlash sohasida xalqaro tajriba almashishdan iborat bo‘ldi.

Mazkur tadbirda vazirlik va idoralar, mahalliy davlat organlari, xalqaro tashkilotlar va ilmiy doiralardan tashrif buyurgan 30 ga yaqin ekspertlar ishtirok etdi..

YuNISEFning O‘zbekistondagi vakolatxonasi raisi Rexina Mariya Kastijio tadbir ishtirokchilariga murojaat qilar ekan, u o‘z nutqida O‘zbekistonda bolalar kambag‘alligiga qarshi kurashish yo‘nalishida amalga oshirilayotgan qat’iy islohotlarni qayd etdi. Mamlakatning barqaror rivojlanish maqsadlariga sodiqligi hamda bolalarni ta’lim, sog‘liqni saqlash, to‘g‘ri ovqatlanish va munosib turmush sharoitlari bilan ta’minlashning ustuvor ahamiyatini ta’kidladi. Ta’kidlanishicha, bolalik davridagi kambag‘allikning uzoq muddatli oqibatlari salomatlik, ta’lim olish jarayoni va kelgusi imkoniyatlarga salbiy ta’sir ko‘rsatadi, shu bois bolalarni qo‘llab-quvvatlash bo‘yicha kompleks va tizimli chora-tadbirlar ko‘rish zarur.

Markaz direktori o‘rinbosari Xurshed Asadov davra suhbati ishtirokchilariga murojaat qilar ekan, Prezident Shavkat Mirziyoyev tashabbusi bilan O‘zbekistonda kambag‘allikka qarshi kurashish butun mamlakat miqyosida umummilliy harakatga aylanganini va barcha darajadagi rahbarlar uchun kundalik vazifa sifatida belgilanganini ta’kidladi.

Ushbu jarayonda bolalar kambag‘alligini kamaytirish inson kapitali rivojlanishining milliy strategiyasidagi ustuvor yo‘nalishlardan biri ekani qayd etildi. Ekspertning ta’kidlashicha, so‘nggi uch yilda O‘zbekistonda bolalar kambag‘allik darajasi 21%dan 2024 yil yakuniga ko‘ra 11%gacha qisqargan.

Davra suhbati doirasida Markaz va YuNISEF hamkorligida 2024 yil uy xo‘jaliklari byudjeti to‘g‘risidagi so‘rovnoma ma’lumotlari asosida amalga oshirilgan tadqiqot natijalari taqdim etildi.

Tahlil Jahon bankining monetar yondashuvi va YuNISEFning ko‘p o‘lchovli metodologiyasi asosida amalga oshirilib, bolalarning real turmush sharoiti, ta’lim, sog‘liqni saqlash, ovqatlanish, infratuzilma va asosiy xizmatlarga yetarli darajada qamrab olinganligini baholashga xizmat qiladi.

Bunday yondashuv bolalarning hayot sharoitini to‘liq anglashni ta’minlaydi va manzilli qo‘llab-quvvatlashga muhtoj bo‘lgan zaif guruhlarni aniqlashga yordam beradi.

Davra suhbati doirasida bolalar kambag‘alligining milliy va hududiy baholari, shu jumladan YuNISEFning Yevropa va Markaziy Osiyo bo‘yicha mintaqaviy maslahatchisi Pamela Deylning ma’ruzasi ham taqdim etildi.

Taqdim etilgan hisobot asosida ijtimoiy himoya vositalarini takomillashtirish, ehtiyojmand oilalarni manzilli qo‘llab-quvvatlash, ijtimoiy nafaqalardan teng foydalanish imkoniyatlarini kengaytirish va jamiyatda kambag‘allik darajasini pasaytirish bo‘yicha keyingi chora-tadbirlar belgilab olinishi rejalashtirilmoqda.

Tasdiqlangan xulosa va tavsiyalar O‘zbekistonning Barqaror rivojlanish maqsadlari va kambag‘allikni barcha ko‘rinishlarda bartaraf etish bo‘yicha xalqaro majburiyatlariga muvofiq tarzda kelgusi ustuvor vazifalar va amaliy chora-tadbirlarni shakllantirishda inobatga olinadi.

Yakuniy qismida tomonlar bolalarning ijtimoiy-iqtisodiy holatini kuzatib borish, tahliliy bazani mustahkamlash va har bir bola farovonligini ta’minlashga qaratilgan qo‘shma tavsiyalarni ishlab chiqish bo‘yicha hamkorlikni kengaytirishga tayyor ekanligini bildirdi.

Iqtisodiy tadqiqotlar va islohotlar markazi

tel.: (+998) 78 150-32-20 (417)