ШҲТ мамлакатларининг ақл марказлари иккинчи йиллик йиғилишини ўтказди

ШҲТ мамлакатларининг ақл марказлари иккинчи йиллик йиғилишини ўтказди

2021 йилнинг 27 сентябрида ШҲТ мамлакатлари таҳлилий иқтисодий марказлари консорциумининг иккинчи йиғилиши қозоғистон томони раислигида видеоконференция форматида ўтказилди.

Учрашувда қуйидаги Консорциум аъзолари иштирок этди: Ҳиндистон савдо ва саноат вазирлигининг минтақавий савдо маркази; Қозоғистон Иқтисодий тадқиқотлар институтининг Жаҳон иқтисодиёти тадқиқотлари маркази; Хитой савдо вазирлигининг Халқаро савдо-иқтисодий ҳамкорлик институти; Қирғизистон Иқтисодиёт вазирлиги ҳузуридаги Иқтисодий сиёсат тадқиқотлари институти; Покистон савдо ва ривожланиш институти; Россия Иқтисодиёт Олий мактаби халқаро Иқтисодиёт ва Молия институти; Тожикистон Миллий Иқтисодиёт ва демография институти.

ШҲТ Бош котиби Владимир Норов Консорциум йиғилиши иштирокчиларига видео мурожаат йуллади.

Учрашув дастури доирасида иккита сессия ўтказилди:

  • 2020 йилда Ҳиндистон томонидан ташкил этилган Консорциумнинг биринчи йиғилиши ҳаракат режасига мувофиқ аниқланган тадқиқот натижаларининг тақдимоти.
  • ШҲТ мамлакатлари томонидан Иқтисодиёт ва савдо алоқаларини тиклаш мақсадида COVID-19 га қарши кураш доирасида амалга оширилган чора-тадбирлар муҳокама қилинди.

Биринчи сессия доирасида Ҳиндистон томони ШҲТ мамлакатлари таҳлилий марказлари – Консорциум иштирокчиларининг ўтказилган тадқиқот мавзулари бўйича таклифларини тақдим этди.

Марказ кичик бизнесни ривожлантириш камбағалликни камайтириш омили мавзусида тадқиқот ўтказди (Ўзбекистон тўғрисида тақдимотида хулоса ва тавсиялар берилган).

Иккинчи сессияда Иқтисодий тадқиқотлар ва ислоҳотлар сектори раҳбари Муҳсинжон Холмухамедов йиғилиш иштирокчиларига COVID-19 пандемиясининг иқтисодиётга салбий таъсирини юмшатиш, жумладан, аҳолини ижтимоий қўллаб-қувватлаш бўйича Ўзбекистонда амалга оширилаётган чора-тадбирлар ҳақида маълумот берди.

2021 йилда иқтисодиётнинг жадал ўсиши, биринчи ярим йилликда ЯИМнинг 6,2 % ни ташкил этгани кўрилаётган тикланиш чора-тадбирларининг самарадорлигидан далолат беради. Осиё тараққиёт банкининг сентябрь ойидаги ҳисоботида коронавирусга қарши самарали эмлаш (COVID-19) ва саноат, хизмат кўрсатиш, инвестиция ва хусусий бизнесни тиклашни давом эттирган ҳолда Ўзбекистон иқтисодиёти 2021 йилда 5% ва 2022 йилда 5,5% га ўсиши тахмин қилинмоқда.

Шундай қилиб, Ўзбекистонда давлат даражасида кўрилган чора-тадбирлар коронавирус пандемиясининг салбий оқибатларини сезиларли даражада юмшатди ва кейинчалик иқтисодиётнинг тез тикланиш ва ўсишини таъминлаш учун шароит яратди.

Шунингдек, М.Холмуҳамедов ШҲТ доирасидаги иқтисодий ҳамкорликни кенгайтириш, пандемиянинг ШҲТ мамлакатлари иқтисодиётига салбий оқибатларини имкон қадар тезроқ бартараф этишга ёрдам беришни таъкидлади.

Мажлис якунида Консорциумнинг кейинги 2022 йилги иш режасини тайёрлаш ва қўшма тадқиқотлар ўтказиш доирасида таҳлилий марказлар ўртасида яқин ҳамкорликни давом эттириш ҳамда ШҲТ давлатлари ҳукуматлари учун ушбу халқаро ташкилот доирасида иқтисодий ҳамкорликни кенгайтиришга қаратилган тавсиялар ва таклифлар ишлаб чиқиш тўғрисида келишилди.

Маълумот: Консорциумнинг мақсади – ШҲТга аъзо давлатларнинг таҳлилий иқтисодий марказлари салоҳиятини бирлаштириш, ШҲТ доирасидаги иқтисодий ҳамкорликнинг устувор йўналишлари бўйича қўшма тадқиқотлар олиб бориш ва минтақавий савдо-иқтисодий ҳамкорликни ривожлантиришга кўмаклашишдан иборат. Консорциумнинг иш регламентига мувофиқ (ШҲТга аъзо давлатлар Ҳукумат раҳбарлари Кенгашининг 2019 йил 2 ноябрдаги қарори билан тасдиқланган) Консорциум йиғилишлари ШҲТга аъзо давлатларнинг Ҳукумат раҳбарлари навбатдаги йиғилиши ўтказилиши режалаштирилган мамлакат раислигида йилда бир марта ўтказилади.

Иқтисодий тадқиқотлар ва ислоҳотлар маркази

Жамоатчилик билан алоқалар хизмати

Мақолани улашинг

Ўхшаш янгиликлар