Қорақалпоғистон Республикасининг 2022 йил I ярим йиллиги якунлари бўйича асосий макроиқтисодий кўрсаткичлари таҳлили

Қорақалпоғистон Республикасининг 2022 йил I ярим йиллиги якунлари бўйича асосий макроиқтисодий кўрсаткичлари таҳлили

2022 йил I ярим йиллигида Қорақалпоғистон Республикаси ялпи ҳудудий маҳсулоти 2021 йилнинг мос даврига нисбатан 3,5 фоизга ўсди ва 13,1 трлн. сўмни ташкил этди.

Аҳоли жон бошига ялпи ҳудудий маҳсулот ҳажми эса 6,7 млн. сўмни ташкил этиб, 2021 йилнинг мос даврига нисбатан 2,1 фоизга ўсди.

2022 йилнинг I январь-июнь ойларида ҳудудда саноат маҳсулотларини ишлаб чиқариш ҳажми 8,9 трлн. сўмни ташкил этиб, ўтган йилнинг мос даврига нисбатан 0,5 фоизга ўсди.

Таҳлил қилинаётган давр мобайнида халқ истеъмол товарларини ишлаб чиқариш ҳажми ўтган йилнинг мос даврига нисбатан 11,6 фоизга ошди. Жорий йилнинг январь-июнь ойларида ҳудудда 1,4 трлн. сўмлик халқ истеъмоли товарлари ишлаб чиқарилган.

Шунингдек, 2022 йилнинг I ярим йиллигида қишлоқ хўжалигида 2021 йилнинг мос даврига нисбатан 3,3 фоизга ўсиш кузатилди ва қишлоқ хўжалиги маҳсулотларини ишлаб чиқариш ҳажми 3,7 трлн. сўмни ташкил этди.

Шу билан бирга, хизматлар соҳасида сезиларли ўсиш суръатлари кузатилди ва бу кўрсаткич 2021 йилнинг мос даврига нисбатан 16,2 фоизни, кўрсатилган хизматлар ҳажми эса 4,7 трлн. сўмни ташкил этди.

Бундан ташқари, 2021 йилнинг мос даврига нисбатан чакана савдо айланмаси 7,8 фоизга ошиб, 4,4 трлн. сўмни ташкил этди.

Шу билан бирга, қурилишда ҳам ўсиш кузатилиб, ўтган йилнинг мос даврига нисбатан 105,6 фоизни ташкил этди. Жорий йилнинг биринчи ярмида ҳудудда 2,5 трлн. сўмлик қурилиш ишлари амалга оширилган.

Таҳлил қилинаётган давр мобайнида, асосий капиталга йўналтирилган инвестициялар 23,2% га ўсди ва улар ҳажми 4,2 трлн. сўмни ташкил этди.

Аммо, жорий йилнинг январь-июнь ойларида янги ташкил этилган кичик корхоналар сонининг қисқариши кузатилди. Жорий йилнинг биринчи ярмида 2 227 та кичик бизнес субъекти ташкил этилган. Бу кўрсаткич ўтган йилнинг шу даврига нисбатан 5,9 фоизга кам.

Таҳлил қилинаётган даврда Қорақалпоғистон Республикасининг ташқи савдо айланмаси 303,6 млн. АҚШ долларини ташкил этди. Бу эса ўтган йилнинг мос даврига нисбатан 8,6 фоизга кам. Ҳудудда савдо балансида 74 млн. долларлик ижобий салдо қайд этилишига қарамасдан, экспорт ҳажми ўтган йилнинг мос даврига нисбатан 14,5 фоизга камайди ва 188,8 млн. долларни ташкил этди. Шу билан бирга, импорт ҳажми 114,8 млн. долларни ташкил этди ва 2,9 фоизга ошди.

Ҳудудда экспорт ҳажмининг камайиши пластмасса ва ундан тайёрланган маҳсулотлар, (қизил мия илдизидан) фармацевтика маҳсулотлари, ип-калава, электротехника маҳсулотлари экспортининг камайиши ва пахта толаси экспортини бутунлай бекор қилиш ва уни ички бозорга йўналтириш билан боғлиқ.

Юсуп Жумабаев
Иқтисодий тадқиқотлар ва ислоҳотлар маркази
Мақолани улашинг

Ўхшаш янгиликлар