Акселератор барча ресурсларни мустаҳкамлаш, зарур сиёсат ва қоидаларни ишлаб чиқиш орқали 100 кун ичида стратегик мақсадларни амалга оширишда асосий муаммоларни тезкорлик билан ҳал қилиш учун ишчи гуруҳ тузди.
Гуруҳга Иқтисодий тадқиқотлар ва ислоҳотлар маркази, Ахборот технологиялари ва коммуникациялари вазирлиги, Адлия вазирлиги, “Электрон ҳукумат лойиҳаларини бошқариш маркази” давлат муассасаси, UZINFOCOM, ИИВ, Соғлиқни сақлаш вазирлиги, “Ҳудудий электр тармоқлари” АЖ, Халқ таълими вазирлиги, Мактабгача таълим вазирлиги вакиллари киритилди.
Дастлабки босқичда Акселератор гуруҳи бугунги кунда Ўзбекистонда фуқароларнинг бевосита фуқаролар билан ишлайдиган вазирликлар ва идоралар томонидан кўрсатиладиган давлат хизматларидан қониқиш даражасини баҳолашнинг ўзига хос механизми йўқлигини аниқлади.
Ўзбекистон Республикаси Президенти Администрацияси фармойишига мувофиқ Акселератор олдига фуқароларнинг давлат органлари томонидан кўрсатиладиган хизматлардан қониқиш даражасини ўлчаш тизимини яратиш вазифаси қўйилди.
Топшириқни ўз вақтида ва сифатли бажариш учун фуқароларнинг давлат хизматларидан қониқиш даражасини аниқлаш бўйича хорижий давлатлар – Канада, Россия, Қозоғистон, БАА тажрибалар ўрганилди.
Канада – фуқароларга хизмат кўрсатиш институти (Institute for Citizen-Centered Services) сўровномаларларга асосланган ҳолда (Common Measurements Tool) даврий равишда фуқароларнинг давлат хизматларидан қониқиш даражасини ўлчаб, хизматлар сифатини баҳолаб боради;
Россия Федерацияси – давлат хизматидан фойдаланган фуқаролар унинг сифатини СМС-хабарлар юбориш, телефон орқали сўровга жавоб бериш, кўп функцияли марказларда ва Интернет сайтларида электрон терминаллар орқали баҳо бериш ва vashkontrol.ru сайтида давлат хизматларини олишда ўзига ёққан ёки ёқмаган жиҳатлар ҳақида фикр-мулоҳазаларини қолдириш имкониятига эга.
Қозоғистон – фуқароларнинг давлат хизматларидан қониқиш даражасини жамоатчилик мониторинги ва ижтимоий сўровномалар орқали ўрганиб борилиши йўлга қўйилган;
Бирлашган Араб Амрликлари – фуқароларни давлат хизматларидан мамнунлигини аниқлаш бўйича Happiness Meter интернет портали ишга туширилган бўлиб, мазкур тизим мамлакат бўйича фуқаролар кўплаб жамланадиган жойларда планшетлар жойлаштирилиши ва уларга ўз фикрларини тегишли смайликни белгилаш орқали уларнинг қониқиш даражасини ўлчаб бориш имконини яратади. Мазкур тизимга мувофиқ барча фуқаролар давлат хизматларини эмотиконлар (аъло, қониқарли ва ёмон) воситаси ёрдамида баҳолашлари мумкин. Йил якуни бўйича энг яхши ва энг самарасиз ишлайдиган 3 та вазирлик ва идоралар аниқланади.
Ўрганилган хорижий тажрибадан келиб чиқиб, Акселератор гуруҳи томонидан давлат хизматларидан фуқароларнинг қониқиш даражасини ўлчайдиган портал – BAHO.GOV.UZ портали концепцияси ишлаб чиқилди ва ишга туширилди.
Фуқаролар 5 та мезон бўйича махсус QR-код ёрдамида ушбу портал орқали давлат хизматлари тўғрисида (1-5 гача тизимда) ўз фикр-мулоҳазаларини қолдиришлари мумкин:
BAHO.GOV.UZ порталига бугунги кунда Тошкент шаҳридаги жами 223 та муассасалар уланиши таъминланди ва уларга махсус QR-кодлар ўрнатилди.
44 та ИИВ тизимидаги муассасалар (паспортни ID картага алмаштириш, хорижга чиқиш паспортини расмийлаштириш, ҳайдовчилик гувоҳномасини олиш, автотранспорт воситаларини мажбурий техник кўрикдан ўтказиш, автотранспорт воситасига давлат рақами олиш марказлари);
167 та ССВ тизимидаги муассасалар (республика даражасида илмий-амалий тиббиёт марказлари оилавий поликлиника ҳамда касалхоналар);
12 та “Ҳудудий электр тармоқлари” АЖнинг филиаллари (электр таъминот корхоналари).
6 октябрь санасига BAHO.GOV.UZ платформасидаги барча баҳолашлар сони 1490 тани, шундан ижобий баҳолар 1229 тани, ўртача баҳо 4,3 ни, салбий баҳолар эса 261 тани ташкил қилди.
Марказ экспертлари фуқаролар томонидан қўйилган салбий баҳолар тегишли давлат органлари раҳбарларига мавжуд ҳолатни чуқур кўриб чиқиб, таҳлил қилиш ва тегишли чоралар кўриш учун жиддий сигнал, деб ҳисоблашади.
Шуни алоҳида таъкидлаш жоизки, фуқаролар берган баҳо баҳоланаётган давлат органининг умумий рейтингига таъсир қилади. Давлат идорасига берилган баҳолар қанчалик кўп бўлса, уни баҳолаш натижалари шунчалик объектив бўлади. Фойдаланувчилар томонидан берилаётган баҳолар платформада онлайн тарзда акс этиб боради.
“Исталган шахс маълум бир давлат органи рейтингини кузатиши мумкин. Бу эса мазкур платформа учун жамоатчилик назоратининг самарали воситаси бўлиб шаклланишига хизмат қилади. Рейтингнинг пасайиши - баҳоланётган давлат идораси ходимлари ва раҳбарияти учун салбий огоҳлантириш бўлиб ҳисобланади. Ўз навбатида, рейтинги пасаётган давлат идоралари мазкур идорадаги мавжуд муаммоларни ҳал қилиш учун тегишли чораларни кўриши керак бўлади, дейди Акселератор гуруҳи раҳбари Муҳаммаджон Бобожонов.
Юқоридагиларни инобатга олиб, фуқароларимизни ва барча жамоатчилик ва ОАВ вакилларини, шунингдек, блогерларни мазкур тизимдан аҳолини янада кўпроқ хабардор қилишга ва кўпроқ фойдаланишга чақириб қоламиз.
Платформа фаолиятини янада такомаллаштириш бўйича таклифларни m.babadjanov@cerr.uz электрон почта манзилига юбориш мумкин.
Иқтисодий тадқиқотлар ва ислоҳотлар маркази
Изоҳ қолдириш