ОКМК: мамлакатимиз саноати тарихида янги давр

ОКМК: мамлакатимиз саноати тарихида янги давр

Олмалиқ кон-металлургия комбинатида кейинги йилларда катта ўзгаришларга қўл урилмоқда. Президент Шавкат Мирзиёев 29 июль куни Олмалиқ кон-металлургия комбинатининг “Ёшлик-1” конини бориб кўрди.

Давлатимиз раҳбарига коннинг салоҳияти, уни ўзлаштириш бўйича қилинаётган ишлар ҳақида маълумот берилди.

Президент Шавкат Мирзиёев ОКМК 3-мис бойитиш фабрикаси қурилишига тамал тоши қўйди.

“Келгусида комбинат ишлаб чиқарадиган маҳсулотлар ҳажми 3 мартадан зиёд кўпайиб, унинг қиймати ҳозирги 2,5 миллиард доллардан қарийб 8 миллиард долларга етади. 11 мингта янги, юқори технологик ишчи ўринлари яратилади.

Бу эса ёш йигит-қизларимиз учун геолог, муҳандис, технолог, лойиҳачи, дастурчи ва бошқа замонавий касб-ҳунарларни эгаллаш имконини беради.

Бу улуғвор режалар – том маънода инқилобий қадам, десак, тўғри бўлади”, - деди Президент.

Иқтисодий тадқиқотлар ва ислоҳотлар маркази Бош илмий ходими Абдурашид Бозоров Олмалиқ кон-металлургия комбинатининг бугунги кунда иқтисодиётимизда қолаверса, саноатда тутган ўрни ҳақида “Ўзбекистон24” телеканалининг “Таҳлилнома” дастурига интервью берди.

“Олмалиқ кон-металлургия комбинати саноат маҳсулотларини ишлаб чиқаришда драйвер соҳа ҳисобланади. Комбинат 2019 йил 147,25 минг тонна мис ишлаб чиқарган бўлса шундан 97,7 минг тоннаси (66%) хом ашё сифатида экспорт қилинди.

Бугунги кунда қарийб 40 минг нафар ишчи-хизматчи меҳнат қилаётган Олмалиқ кон-металлургия комбинати мамлакатимиз саноатининг чинакам локомотивларидан бири. Республикамизда ишлаб чиқарилаётган саноат маҳсулотининг 7 фоизи, экспорт ҳажмининг 15 фоизи комбинат ҳиссасига тўғри келиши ҳам бу фикримизни тасдиқлайди.

Давлатимиз бюджетига тушадиган жами даромадларнинг 8 фоизини айнан ушбу корхона таъминлайди. Бугунги кунда мисга бўлган талаб нафақат ички бозорда қолаверса, жаҳон бозорида ҳам ортмоқда.

Мис нархи Лондон биржасида 2020 йилда ҳар тоннасига 5048 АҚШ доллар бўлган бўлса, бу кўрсаткич 2021 йилда икки баробарга ўсди ва 9004 АҚШ долларини ташкил қилди. Aмерика банки маълумотларига кўра, мис резервлар қисқармоқда ва талаб ортмоқда, шу сабабли 2025 йилга келиб мис нархи тоннасига 20 минг АҚШ долларига етиши мумкинлиги прогноз қилинган.

Халқаро мис уюшмаси (ICA) маълумотларига кўра, мис энг кўп машинасозликда (электромобил ва автобус) (31%), шунингдек, қурилишида (кабел ва трансформатор) (28%) ва инфратузилмада (16%) ишлатилади.

2030 йилга келиб, электр енгил автомобиллар учун мис истеъмоли ҳозирги даражадан уч баравар кўп бўлади. “Green economy”- яшил иқтисодиёт. Электро техникада саноатида экспорт ва бандлик ҳажми 11 % га ортади. Электромобиллар ва элекроавтобусларга босқичма-босқич ўтилмоқда – дизел билан ҳаракатланувчи автомобилларга нисбатан электро мобиллар ва электро автобусларни ишлаб чиқариш учун 4 баробар ва 11 баробар кўп мис талаб қилинади.

Мисни қайта ишлашни кенгайтириш албатта иқтисодиётга самарали таъсир қилади. 10% мис ишлаб чиқариш ҳажмининг ортиши экспорт ҳажмини 12,2% ва ишлаб чиқариш ва бандлик ҳажмини 11% га ортиради.

Бундан ташқари, Иқтисодий тадқиқотлар маркази томонидан амалга оширилган тадқиқотлар натижасига кўра Металлургия саноатига киритилган ҳар бир бирлик қўшимча инвестиция – 1,64 иқтисодий қайтим беради.

Давлатимиз раҳбари "Рангли металларни қайта ишлаш занжирларини “хом-ашёдан – тайёр маҳсулотгача” асосида ривожлантиришимиз зарурлигини таъкидладилар.

Мамлакатимизда мисга бўлган талабни қондиришда ва мамлакатнинг экспорт салоҳиятини янада ортиришда “Ёшлик-1” кони негизида қурилаётган 3-мис бойитиш фабрикаси шу борадаги улкан қадамлардан биридир.

Келгусида комбинат ишлаб чиқарадиган маҳсулотлар ҳажми 3 мартадан зиёд кўпайиб, унинг қиймати ҳозирги 2,5 миллиард доллардан қарийб 8 миллиард долларга етади. 11 мингта янги, юқори технологик ишчи ўринлари яратилади. 2028 йилга бориб йилига 400 минг тонна мис ишлаб чиқарилади. Шу тариқа Олмалиқ комбинати тоғ-кон металлургияси соҳасида дунёдаги энг йирик саноат мажмуаларидан бирига айланади, дейди Абдурашид Бозоров.

Мақолани улашинг

Ўхшаш янгиликлар