OKMK: mamlakatimiz sanoati tarixida yangi davr

OKMK: mamlakatimiz sanoati tarixida yangi davr

Olmaliq kon-metallurgiya kombinatida keyingi yillarda katta o‘zgarishlarga qo‘l urilmoqda. Prezident Shavkat Mirziyoyev 29 iyul kuni Olmaliq kon-metallurgiya kombinatining “Yoshlik-1” konini borib ko‘rdi.

Davlatimiz rahbariga konning salohiyati, uni o‘zlashtirish bo‘yicha qilinayotgan ishlar haqida ma’lumot berildi.

Prezident Shavkat Mirziyoyev OKMK 3-mis boyitish fabrikasi qurilishiga tamal toshi qo‘ydi.

“Kelgusida kombinat ishlab chiqaradigan mahsulotlar hajmi 3 martadan ziyod ko‘payib, uning qiymati hozirgi 2,5 milliard dollardan qariyb 8 milliard dollarga yetadi. 11 mingta yangi, yuqori texnologik ishchi o‘rinlari yaratiladi.

Bu esa yosh yigit-qizlarimiz uchun geolog, muhandis, texnolog, loyihachi, dasturchi va boshqa zamonaviy kasb-hunarlarni egallash imkonini beradi.

Bu ulug‘vor rejalar – tom ma’noda inqilobiy qadam, desak, to‘g‘ri bo‘ladi”, - dedi Prezident.

Iqtisodiy tadqiqotlar va islohotlar markazi Bosh ilmiy xodimi Abdurashid Bozorov Olmaliq kon-metallurgiya kombinatining bugungi kunda iqtisodiyotimizda qolaversa, sanoatda tutgan o‘rni haqida “O‘zbekiston24” telekanalining “Tahlilnoma” dasturiga intervyu berdi.

“Olmaliq kon-metallurgiya kombinati sanoat mahsulotlarini ishlab chiqarishda drayver soha hisoblanadi. Kombinat 2019 yil 147,25 ming tonna mis ishlab chiqargan bo‘lsa shundan 97,7 ming tonnasi (66%) xom ashyo sifatida eksport qilindi.

Bugungi kunda qariyb 40 ming nafar ishchi-xizmatchi mehnat qilayotgan Olmaliq kon-metallurgiya kombinati mamlakatimiz sanoatining chinakam lokomotivlaridan biri. Respublikamizda ishlab chiqarilayotgan sanoat mahsulotining 7 foizi, eksport hajmining 15 foizi kombinat hissasiga to‘g‘ri kelishi ham bu fikrimizni tasdiqlaydi.

Davlatimiz byudjetiga tushadigan jami daromadlarning 8 foizini aynan ushbu korxona ta’minlaydi. Bugungi kunda misga bo‘lgan talab nafaqat ichki bozorda qolaversa, jahon bozorida ham ortmoqda.

Mis narxi London birjasida 2020 yilda har tonnasiga 5048 AQSh dollar bo‘lgan bo‘lsa, bu ko‘rsatkich 2021 yilda ikki barobarga o‘sdi va 9004 AQSh dollarini tashkil qildi. Amerika banki ma’lumotlariga ko‘ra, mis rezervlar qisqarmoqda va talab ortmoqda, shu sababli 2025 yilga kelib mis narxi tonnasiga 20 ming AQSh dollariga yetishi mumkinligi prognoz qilingan.

Xalqaro mis uyushmasi (ICA) ma’lumotlariga ko‘ra, mis eng ko‘p mashinasozlikda (elektromobil va avtobus) (31%), shuningdek, qurilishida (kabel va transformator) (28%) va infratuzilmada (16%) ishlatiladi.

2030 yilga kelib, elektr yengil avtomobillar uchun mis iste’moli hozirgi darajadan uch baravar ko‘p bo‘ladi. “Green economy”- yashil iqtisodiyot. Elektro texnikada sanoatida eksport va bandlik hajmi 11 % ga ortadi. Elektromobillar va elekroavtobuslarga bosqichma-bosqich o‘tilmoqda – dizel bilan harakatlanuvchi avtomobillarga nisbatan elektro mobillar va elektro avtobuslarni ishlab chiqarish uchun 4 barobar va 11 barobar ko‘p mis talab qilinadi.

Misni qayta ishlashni kengaytirish albatta iqtisodiyotga samarali ta’sir qiladi. 10% mis ishlab chiqarish hajmining ortishi eksport hajmini 12,2% va ishlab chiqarish va bandlik hajmini 11% ga ortiradi.

Bundan tashqari, Iqtisodiy tadqiqotlar markazi tomonidan amalga oshirilgan tadqiqotlar natijasiga ko‘ra Metallurgiya sanoatiga kiritilgan har bir birlik qo‘shimcha investitsiya – 1,64 iqtisodiy qaytim beradi.

Davlatimiz rahbari "Rangli metallarni qayta ishlash zanjirlarini “xom-ashyodan – tayyor mahsulotgacha” asosida rivojlantirishimiz zarurligini ta’kidladilar.

Mamlakatimizda misga bo‘lgan talabni qondirishda va mamlakatning eksport salohiyatini yanada ortirishda “Yoshlik-1” koni negizida qurilayotgan 3-mis boyitish fabrikasi shu boradagi ulkan qadamlardan biridir.

Kelgusida kombinat ishlab chiqaradigan mahsulotlar hajmi 3 martadan ziyod ko‘payib, uning qiymati hozirgi 2,5 milliard dollardan qariyb 8 milliard dollarga yetadi. 11 mingta yangi, yuqori texnologik ishchi o‘rinlari yaratiladi. 2028 yilga borib yiliga 400 ming tonna mis ishlab chiqariladi. Shu tariqa Olmaliq kombinati tog‘-kon metallurgiyasi sohasida dunyodagi eng yirik sanoat majmualaridan biriga aylanadi, deydi Abdurashid Bozorov.

Maqolani ulashing

O'xshash yangiliklar