2025 йилги чемпионат БРИКС ва МДҲ давлатларининг ўнлаб мамлакатларидан 1500 дан ортиқ талаба ва мактаб ўқувчиларини жамлади. Май ойида ўтказилган саралаш ва ярим финал босқичларидан муваффақиятли ўтган 600 нафардан зиёд иштирокчи финал босқичида ўз билим ва қобилиятларини намойиш қилди. Ўзбекистонлик талабалар “Металлургия” йўналишида фахрли учинчи ўринни эгаллаб, чемпионатнинг энг яхши жамоаларидан бири сифатида тан олинди. “CASE-IN” чемпионати 2013 йилдан бери ўтказиб келинаётган МДҲ ва БРИКС мамлакатларининг энг йирик муҳандислик танлов тизими бўлиб, у мактаб ўқувчилари, талабалар ва ёш мутахассисларни қамраб олади. Финал босқичида жамоалардан юқори даражадаги муҳандислик билими, жамоавий иш ва ижодий ёндашув талаб этилди. Ўзбекистонлик жамоа амалиётга йўналтирилган ечимлар, ишончли билим ва ёрқин тақдимоти билан ҳакамлар ҳайъатининг муносиб баҳосини олди. Қолаверса, жамоа аъзоларининг анъанавий ўзбек дўпписидаги чиқишлари чемпионатнинг маданий акцентига айланди. Ташкилий қўмита аъзоларидан бири ҳазил билан шундай деди: "Бу дўппилар мустаҳкам бешга лойиқ!"
Изоҳ қолдириш