Ўзбекистон ва Жанубий Корея стратегик ҳамкорликни ривожлантирмоқда

Ўзбекистон ва Жанубий Корея стратегик ҳамкорликни ривожлантирмоқда

13 декабрь куни Ўзбекистон Республикасининг Сеул шаҳридаги элчихонасида икки давлат ўртасидаги стратегик шериклик муносабатларини кенгайтириш ва уни сифат жиҳатидан янги босқичга олиб чиқиш масалаларига бағишланган Ўзбекистон-Корея “давра суҳбати” бўлиб ўтди.

Тадбирда Ўзбекистон Республикаси Президенти ҳузуридаги Стратегик ва минтақалараро тадқиқотлар институти, Иқтисодий тадқиқотлар ва ислоҳотлар маркази ва Марказий Осиё халқаро институтининг етакчи экспертлари иштирок этди.

Корея томонидан Қозоғистон Республикасининг Ўзбекистондаги собиқ элчиси, Кемюнг университети профессори Чон Дае Ван, Марказий Осиё-Корея ҳамкорлик форуми бош котиби Ли Жонгкук, Евроосиё туркий тадқиқотлар институти директори, профессор Тондук Хотин-қизлар университети О Эункён ва Корея Политехника Университети Корейс тилини ўрганиш марказининг ташқи алоқалар бўлими директори, профессор Жо Нам Жу қатнашдилар.

Ўзбекистон Республикаси Президенти Шавкат Мирзиёевнинг Жанубий Кореяга давлат ташрифи арафасида ўтказилган “давра суҳбати”да экспертлар икки томонлама ҳамкорликнинг энг истиқболли йўналишлари юзасидан фикр алмашдилар, маданий-гуманитар ҳамкорлик ҳолатига баҳо бердилар. Шунингдек, пандемиядан кейинги даврда ишчи меҳнатчиларнинг ушбу мамлакатларда ўзаро алмашинувини фаоллаштириш масалалари муҳокама қилинди.

Давлат раҳбарларининг режалаштирилган учрашуви ва икки томонлама қатор музокаралар давлатлар ўртасидаги дўстлик, ҳамкорлик ва шерикчилик каби муносабатларни янада чуқурлаштиришга хизмат қилиши таъкидланди.

Ўзбекистонлик мутахассислар кореялик ҳамкорларга "Янги Ўзбекистон"ни ривожлантириш стратегияси доирасидаги кейинги ислоҳотларнинг устувор йўналишлари бўйича долзарб маълумотларни тақдим этди. Марказий Осиёда минтақавий ҳамкорликни кенгайтириш бўйича кейинги қадамларга, шунингдек, Корея Республикаси алоҳида ўрин тутадиган стратегик шерик давлатлар билан ўзаро ҳамкорликни ривожлантиришга алоҳида эътибор қаратилди.

Ўз навбатида кореялик экспертлар Ўзбекистон Марказий Осиёда етакчи ўринни эгаллашини ва Корея Республикасининг ушбу минтақадаги энг муҳим ҳамкори эканлигини таъкидладилар. Бугунги кунда кейинги ўн йилликларда икки томонлама ҳамкорликни янада ривожлантириш учун асос бўладиган навбатдаги кенг кўламли лойиҳаларни биргаликда ишлаб чиқиш объектив зарурати борлиги қайд этилди.

Жумладан, Корея Республикаси академик давра вакиллари икки давлат ўртасида кадрлар тайёрлаш ва уларнинг малакасини ошириш, илмий-техник мутахассислар алмашинуви соҳасида ўзаро ҳамкорликни кучайтириш бўйича қатор таклифларни илгари сурди.

Учрашув якунлари бўйича томонлар кун тартибини ҳар икки томоннинг улкан салоҳиятига жавоб берадиган силжишли келишувлар билан янада тўлдириш муҳимлиги ҳақида келишиб олдилар. Улар илмий алоқаларни йўлга қўйиш, қўшма илмий лойиҳаларни амалга ошириш ва Марказий Осиёдаги икки томонлама муносабатлар ва минтақавий ҳамкорликнинг долзарб масалаларига бағишланган қўшма анжуманлар ташкил этишга тайёр эканликларини билдирдилар.

Мақолани улашинг

Ўхшаш янгиликлар

Сўнгги янгиликлар