O‘zbekiston avtomobil bozori tiklanish va faollikning o‘sishini ko‘rsatdi
Iqtisodiy tadqiqotlar va islohotlar markazi O‘zbekiston avtomobil bozoridagi faollik bo‘yicha yangilangan tahlilni e’lon qildi.
Oktyabr oyi yakunlariga ko‘ra, respublikada barcha turdagi avtotransport vositalari savdosi 112,5 ming donaga yetdi. Bu ko‘rsatkich o‘tgan oyga nisbatan 11% yuqori. Savdo faolligi barcha asosiy bozor segmentlarida oshgani qayd etildi.
Birlamchi va ikkilamchi bozorlarda yengil avtomobillar segmenti oylik 12,7% o‘sishni ko‘rsatdi va 95,4 ming donani tashkil yetdi. Eng yuqori o‘sish Namangan, Jizzax va Buxoro viloyatlarida qayd etilgan bo‘lib, bu hududlarda savdolar 20%dan ziyod oshdi. Shu bilan birga, Samarqand viloyati va Qoraqalpog‘iston Respublikasida faollik biroz pasaygani kuzatildi.
Birlamchi avtomobil bozoridagi vaziyat
Oktyabr oyi natijalariga ko‘ra, birlamchi bozorda yengil avtomobillar savdosi qariyb 19%ga oshdi, bu esa qo‘shimcha 6 ming dona avtomobil sotilganini ko‘rsatadi. Segment doirasida mahalliy ishlab chiqarilgan yangi yengil avtomobillar toifasida sotuvlar 33,4 ming donaga yetdi, bu o‘tgan oyga nisbatan 22%ga o‘sdi.
Yangi xorijiy avtomobillar sotuvi biroz o‘sish (+1,1%) bilan sentyabr oyi ko‘rsatkichlaridan oshib, 4,5 ming donani tashkil etdi.
Ikkilamchi avtomobil bozori o‘sish sur’atida
Oktyabr oyida yengi avtomobillarining ikkilamchi bozorida sotuvlar o‘tgan oyga nisbatan 9%ga oshib, 57,4 ming donani tashkil etdi.
Ikkilamchi bozorda elektromobillar sotuvi 3 ming donadan oshib, oylik hisobda 15,2% o‘sish qayd etildi. Ushbu ko‘rsatkich o‘tgan yilning shu davriga nisbatan 2,3 barobar ko‘pdir.
Iqtisodiy tadqiqotlar va islohotlar markazi
Jamoatchilik bilan aloqalar sektori
Izoh qoldirish