Hozirda IHTga 10 ta davlat a’zo. Bular O‘zbekistondan tashqari Turkiya, Eron, Pokiston, Qozog‘iston, Qirg‘iziston, Tojikiston, Turkmaniston, Ozarbayjon va Afg‘onistondir.
O‘zbekistonning IHT mamlakatlari bilan tovar ayirboshlash hajmi jadal sur’atlar bilan o‘sib bormoqda, umumiy tovar aylanmasida salmoqli ulushni tashkil etadi va muvozanatliligi bilan ajralib turadi.
IHT mamlakatlari O‘zbekistonning asosiy savdo hamkorlaridan bo‘lib, 2019 yilda tovar ayirboshlash hajmi qariyb 9 milliard dollarni tashkil etgan bo‘lsa, 2020 yilda bu ko‘rsatkich 8,3 milliard dollarga kamaygan.
2021 yilning 10 oyi davomida 2020 yilning shu davriga nisbatan IHT mamlakatlari bilan O‘zbekiston tovar aylanmasi 35,5 %ga, 6,5 mlrd. dollardan 8,8 mlrd. dollargacha oshdi. O‘zbekiston umumiy tovar aylanmasida IHT mamlakatlarining ulushi 21,5% dan 27% gacha o‘sdi.
O‘zbekiston eksporti bo‘yicha va 10 oy yakunlariga ko‘ra, IHT mamlakatlari ham asosiy savdo sheriklari qatoriga kiradi. 2021 yilda O‘zbekiston umumiy eksportining deyarli 35 foizi IHT davlatlariga to‘g‘ri keldi.
2019 yilda IHTga a’zo davlatlarning umumiy tashqi tovar aylanmasi 900 milliard dollardan oshdi, 2020 yilda u 40 foizga kamayib, 542 milliard dollarni tashkil etdi.
Ma’lumot uchun: IHT 1985 yilda tashkil etilgan va Mintaqaviy hamkorlik va taraqqiyot tashkilotining huquqiy vorisi hisoblanadi. IHT 1977 yil mart oyida uch ta’sischi davlat – Eron, Pokiston va Turkiya tomonidan imzolangan Nizom – Izmir shartnomasi asosida faoliyat yuritadi. 1992 yil boshiga qadar IHT doirasidagi hamkorlik asosan ikki tomonlama xarakterga ega edi. 1992 yildan boshlab 7 ta yangi davlat – Qirg‘iziston, Ozarbayjon, Afg‘oniston, Qozog‘iston, Tojikiston, Turkmaniston va O‘zbekistonning a’zo bo‘lishi munosabati bilan tashkilot faoliyati sezilarli darajada faollashdi. IHTning rasmiy tili ingliz tilidir.
Izoh qoldirish