Инфографика: Ўзбекистоннинг 2021 йил январь-октябрь ойларида ИҲТ мамлакатлари билан савдоси

Инфографика:  Ўзбекистоннинг 2021 йил январь-октябрь ойларида ИҲТ мамлакатлари билан савдоси

Ҳозирда ИҲТга 10 та давлат аъзо. Булар Ўзбекистондан ташқари Туркия, Эрон, Покистон, Қозоғистон, Қирғизистон, Тожикистон, Туркманистон, Озарбайжон ва Афғонистондир.

Ўзбекистоннинг ИҲТ мамлакатлари билан товар айирбошлаш ҳажми жадал суръатлар билан ўсиб бормоқда, умумий товар айланмасида салмоқли улушни ташкил этади ва мувозанатлилиги билан ажралиб туради.

ИҲТ мамлакатлари Ўзбекистоннинг асосий савдо ҳамкорларидан бўлиб, 2019 йилда товар айирбошлаш ҳажми қарийб 9 миллиард долларни ташкил этган бўлса, 2020 йилда бу кўрсаткич 8,3 миллиард долларга камайган.

2021 йилнинг 10 ойи давомида 2020 йилнинг шу даврига нисбатан ИҲТ мамлакатлари билан Ўзбекистон товар айланмаси 35,5 %га, 6,5 млрд. доллардан 8,8 млрд. долларгача ошди. Ўзбекистон умумий товар айланмасида ИҲТ мамлакатларининг улуши 21,5% дан 27% гача ўсди.

Ўзбекистон экспорти бўйича ва 10 ой якунларига кўра, ИҲТ мамлакатлари ҳам асосий савдо шериклари қаторига киради. 2021 йилда Ўзбекистон умумий экспортининг деярли 35 фоизи ИҲТ давлатларига тўғри келди.

2019 йилда ИҲТга аъзо давлатларнинг умумий ташқи товар айланмаси 900 миллиард доллардан ошди, 2020 йилда у 40 фоизга камайиб, 542 миллиард долларни ташкил этди.

Маълумот учун: ИҲТ 1985 йилда ташкил этилган ва Минтақавий ҳамкорлик ва тараққиёт ташкилотининг ҳуқуқий вориси ҳисобланади. ИҲТ 1977 йил март ойида уч таъсисчи давлат – Эрон, Покистон ва Туркия томонидан имзоланган Низом – Измир шартномаси асосида фаолият юритади. 1992 йил бошига қадар ИҲТ доирасидаги ҳамкорлик асосан икки томонлама характерга эга эди. 1992 йилдан бошлаб 7 та янги давлат – Қирғизистон, Озарбайжон, Афғонистон, Қозоғистон, Тожикистон, Туркманистон ва Ўзбекистоннинг аъзо бўлиши муносабати билан ташкилот фаолияти сезиларли даражада фаоллашди. ИҲТнинг расмий тили инглиз тилидир.


Мақолани улашинг

Ўхшаш янгиликлар