Зироат Мирзиёева раислик қилувчи «Замин» фонди болаларда эшитиш қобилиятининг скринингини ўтказиш синов лойиҳасини бошлади

Зироат Мирзиёева раислик қилувчи «Замин» фонди болаларда эшитиш қобилиятининг скринингини ўтказиш синов лойиҳасини бошлади

Зироат Мирзиёева раислик қилувчи «Замин» фонди Соғлиқни сақлаш вазирлиги ва Республика ихтисослаштирилган педиатрия илмий-амалий тиббиёт маркази (РИPIAТМ) билан ҳамкорликда эшитиш қобилиятининг скринингини ўтказиш синов лойиҳасини бошлади.

Фонд матбуот хизматининг маълум қилишича, синов лойиҳаси йилига 70 мингдан зиёд чақалоқ дунёга келадиган Тошкент шаҳрида бошланган бўлиб, 2 декабрь куни Республика ихтисослаштирилган педиатрия илмий-амалий тиббиёт марказида ушбу лойиҳанинг тақдимоти бўлиб ўтди.

Қайд этилишича, 15 ёшгача бўлган болаларда эшитиш қобилиятини йўқотиш ҳолатларининг 60 фоизини профилактика чоралари ёрдамида олдини олиш мумкин. Агар эшитиш қобилиятида нуқсони бор болага умрининг дастлабки уч йилида ёрдам кўрсатилмаса, бундай бола нутқ билан боғлиқ муаммоларга дуч келишининг эҳтимоли катта бўлганлиги туфайли, вақт ўтиб, кар ва соқов бўлиб қолиши мумкин. Шунинг учун эшитиш қобилиятидаги нуқсонларни ўз вақтида аниқлаш керак, бу йўналишдаги энг самарали усуллардан бири – янги туғилган чақалоқларнинг эшитиш қобилиятини универсал скринингдан ўтказиш ҳисобланади.

Агар биринчи босқичда эшитиш қобилиятининг нуқсонлари аниқланса, болаларга эшита олишлари ва нутқни ривожлантира олишларига ёрдам бериш мумкин. Агар эшитиш қобилиятидаги нуқсон бола туғилгандан сўнг 3-5 кунида аниқланса, мутахассисларнинг тавсияларига кўра, 15-30 куни болани махсус текширувдан ўтказиш ва тегишли чораларни кўриш керак.

Янги туғилган чақалоқлар шаҳардаги 4 та болалар шифохонасида ва барча 15 та туғруқ марказларида эшитиш қобилиятининг скрининг текширувидан ўтказилиши мумкин. Эшитиш қобилиятининг нуқсони аниқланса, ҳар бир чақалоққа махсус диагностикадан ўтиш ҳамда эшитиш ва нутқни ривожлантиришга қаратилган зарур чора-тадбирларни кўриш учун РИПИАТМ га йўлланма берилади. Эшитиш қобилиятининг скринингидан ўтган янги туғилган чақалоқлар тўғрисидаги маълумотлар РИПИАТМ қошида яратилган трекинг-марказда тўпланади ва қайта ишланади. Ушбу лойиҳа 1 йиллик синов муддатидан муваффақиятли ўтгандан сўнг республикамиздаги барча туғруқ марказларига татбиқ қилинади.

Зироат Мирзиёева лойиҳанинг дастлабки натижалари билан танишди. Туғруқ марказлари шифокорлари ва янги туғилган чақалоқларнинг ота-оналари билан суҳбатлашиб, уларга энг эзгу тилакларни билдирди.


Мақолани улашинг

Ўхшаш янгиликлар