Бухоро вилоятининг 2021 йилдаги макроиқтисодий кўрсаткичлари

Бухоро вилоятининг 2021 йилдаги макроиқтисодий кўрсаткичлари

Ушбу даврда Бухоро вилоят ЯҲМ ҳажми 38 742,4 млрд. сўмни ташкил этган ҳолда ўтган йилги мос даврга нисбатан 6,2%га ўсган, шунингдек, ЯИМ таркибида вилоятнинг ҳиссаси 5,3%ни ташкил этган. Аҳоли жон бошига тўғри келадиган ЯҲМ ҳажми эса 19 746,4 минг сўмни ташкил қилиб, 4,8% га ошган.

ЯҲМ таркибида саноат улуши қурилишни қўшган ҳолда 25,3% (2020 йилда 25,0%), қишлоқ хўжалиги улуши 45,0% (2020 йилда 46,0%) ва хизмат кўрсатиш улуши 29,7%ни (2020 йилда 29,0%) ташкил қилган.

Саноат

Вилоятда ўтган йили ишлаб чиқарилган саноат маҳсулотлари 20 826,9 млрд. сўмни ташкил этиб, 2020 йилга нисбатан 0,1% га ошган. Вилоятда ишлаб чиқарилган саноат маҳсулотларининг республика саноатидаги улуши 4,6% ни ташкил қилган. Аҳоли жон бошига тўғри келадиган саноат маҳсулотлари ҳажми 10 615,2 минг.сўмни ташкил этиб, 2020 йилга нисбатан 98,8% ўсиш кузатилган.

Асосий капиталга инвестициялар ҳажми 18 995,6 млрд. сўмни ташкил этиб, 2020 йилга нисбатан 36,4%га ўсиш қайд этилди.

Истеъмол товарлари

Вилоятда 8 677,6 млрд. сўмлик истеъмол товарлари ишлаб чиқарилган бўлиб, 2020 йилга нисбатан 20,2%га пасайган. Республика истеъмол товарларида вилоятнинг улуши 5,7%ни ташкил қилган.

Қишлоқ хўжалиги

Бухоро вилояти 2021 йилда Республика қишлоқ хўжалик маҳсулотларининг 9,2 %ини етиштирган бўлиб, қишлоқ хўжалиги маҳсулотлари ҳажми 29 150,0 млрд. сўмни ташкил этган. Бу кўрсаткич 2020 йилга нисбатан 3,7%га ошган. Аҳоли жон бошига тўғри келадиган қишлоқ хўжалик маҳсулотлари ҳажми 14 857,4 минг сўмни ташкил этиб, 2020 йилга нисбатан 2,3%га ўсиш кузатилган.

Қурилиш ишлари

Вилоятда ташкил этилган қурилиш ишлари ҳажми 7 371,2 млрд. сўмга етиб, 2020 йилга нисбатан 11,4% га ошган. Вилоятда қурилиш ишлари ҳажмининг республика кўрсаткичидаги улуши 6,9%ни ташкил қилган.

Чакана савдо

Вилоятда ўтган йилда чакана савдо ҳажми 14 378,9 млрд. сўмни ташкил этиб, 2020 йилга нисбатан 7,6%га ошган. Чакана савдо товар айланмасининг 88,7%и кичик бизнес ва хусусий тадбиркорлик субъектлари томонидан амалга оширилган. Ушбу кўрсаткич 2020 йил мос даврига нисбатан 11,3%га ўсган.

Хизмат кўрсатиш

Бухоро вилоятида кўрсатилган бозор хизматлари ҳажми 12 722,2 млрд. сўмни ташкил этиб, 2020 йилга нисбатан 19,4%га ошган. Аҳоли жон бошига тўғри келадиган кўрсатилган бозор хизматлари ҳажми 6 484,3 минг сўмни ташкил қилган ҳолда, 2020 йилга нисбатан 17,8% га ошган.

Ўтган йилда янги ташкил этилган кичик тадбиркорлик субъектлари сони 2020 йилга нисбатан 8,3%га пасайиб, 6418 тани ташкил этди. ЯҲМда кичик бизнес ва хусусий тадбиркорликнинг улуши 75,4% (2020 йилда 75,6%) ни ташкил қилган.

Ташқи савдо айланмаси

Ташқи савдо айланмаси ҳажми 1 086,9 млн. долларни ташкил қилган ҳолда, 2020 йилга нисбатан 30,8%га ошган. Вилоят ташқи савдо айланмасининг республика жами ташқи савдо айланмасидаги улуши 2,6%ини ташкил қилган.

2021 йилда жами амалга оширилган экспорт ҳажми – 311,3 млн. долларни ташкил қилиб, 2020 йилга нисбатан 34,7%га ортгани кузатилган. Импорт ҳажмида эса 2020 йилга нисбатан 29,2% га ўсиш кузатилиб, 775,6 млн. долларни ташкил этган.

Иқтисодий тадқиқотлар ва ислоҳотлар маркази

Самарқанд филиали ходимлари

Мақолани улашинг

Ўхшаш янгиликлар