Ҳиндистондаги “Суражкунд Мела” фестивали доирасида Туризмни ривожлантириш давлат қўмитаси ва Ўзбекистон Республикасининг Ҳиндистондаги элчихонаси ҳамкорлигида ташкиллаштирилган “Uzbek Food Festival” ўзбек миллий таомлари фестивалининг очилиш маросими бўлиб ўтди.
Иштирокчилар ўзбек миллий таомларига юқори баҳо бериб, Ҳиндистонда ўзбек ошхоналарини кўпайтириш ҳамда ресторанлар менюсига миллий таомларимизни қўшишга оид таклифлар берди. Таъкидлаш лозимки, сўнгги йилларда хорижий ресторанлар томонидан ўзбек ошхонасига бўлган қизиқиш ортиб бормоқда, хорижий мамлакатларда ўзбек таомлари тобора оммалашиб бормоқда.
“Uzbek Food Festival” ўзбек миллий таомлари фестивали Ҳиндистондаги “The Societe” ресторанида бўлиб ўтмоқда. Ушбу ресторан директори Правен Наййар ўзбек таомларини албатта ўз менюсига киритишини маълум қилди.
Айни пайтда Бухоро вилоятидан ташриф буюрган машҳур ошпазлар Бобур Саматов, Бобур Турдиев, Манучеҳр Саидов ва Санжар Мусиновлар ҳиндистонлик ҳамкасбларига ўзбек таомларини тайёрлашга оид маҳорат дарсларини ўтмоқда. Ресторан раҳбари Правен Наййарнинг таъкидлашича, мазали ва тўйимли ўзбек таомлари фестивалга ташриф буюраётган меҳмонларга манзур бўлмоқда.
“Uzbek Food Festival” ўзбек миллий таомлари фестивали жорий йилнинг 1 февраль куни бошланган бўлиб, 16 февралга қадар давом этади.
Изоҳ қолдириш