Иқтисодий тадқиқотлар ва ислоҳотлар маркази (Марказ) томонидан Ўзбекистондаги тижорат банкларда жисмоний шахсларга бирламчи бозордан автотранспорт воситаларини харид қилиш учун қулай автокредитлар рейтинги (2021 йил ноябрь) аниқланди. Мазкур рейтингни тузишда кредит шартлари – бошланғич тўлови, фоиз ставкаси, имтиёзли даври, кредит муддати ва миқдори каби омиллар инобатга олинган.
Ҳозирда 32 та тижорат банкидан фақат 24 таси бирламчи бозордан автотранспорт воситаларини харид қилиш учун кредитлар таклиф қилмоқда.
Ҳозирги кунда бирламчи бозордан автотранспорт воситаларини харид қилиш учун «TBC Bank», «Узагроэкспортбанк», «Анорбанк», «Универсал банк», «Капитал банк», «Хай-Тек банк», «ЎзКДБ банк», «Мадад инвест банк» банклар томонидан кредитлар таклиф этилмаяпти.
Рейтинг натижаларига кўра, жисмоний шахсларга таклиф этиладиган қулай автокредитлар бўйича рейтингда “Инвест Финанс банк” 1-ўринни эгалади. Ушбу банк йиллик фоиз ставкаси (25%) бўйича 18-ўриндан жой олганига қарамай, бошланғич тўлов (25%), имтиёзли даври (6 ой), ҳамда кредит миқдори (500 млн. сўмгача) бўйича етакчилиги умумий рейтингда 1-ўринни эгаллашини таъминлади.
Умумий рейтингда «Ўзсаноатқурилишбанк» 2-ўринни эгаллади. Ушбу банкдан автокредит олиш шартлари, яъни бошланғич тўлов – 30% (13-ўрин), фоиз ставкаси – 23% (5-ўрин), имтиёзли давр – 6 ой (1-ўрин), кредит миқдори – 500 млн. сўмгача (1-ўрин) ҳамда кредит муддати – 36 ой (25-ўрин) банкнинг топ-3 банклар қаторида эътироф этилишига сабаб бўлди.
Рейтингда 3-ўринни «Ўзмиллийбанк» эгаллади. Ушбу банк томонидан қуйидаги шартларда автокредитлар тақдим этилмоқда: йиллик фоиз ставка – 24% (11-ўрин), имтиёзли давр – 3 ой (3-ўрин), бошланғич тўлови – 30% (13-ўрин), кредит муддати – 60 ой (1-ўрин) ва кредитнинг максимал қиймати – 500 млн. сўм.
Умумий рейтингда “Равнақ банк” 35-ўринда жойлашганига сабаб ушбу банк мижозларга қуйидаги шартлар асосида автокретилар таклиф қилмоқда: йиллик фоиз ставка – 28% (35-ўрин), бошланғич тўлови – 30% (13-ўрин), кредит муддати – 36 ой (25-ўрин) ва кредитнинг максимал қиймати – 500 млн. сўм.
Натижаларга кўра, умумий рейтингда 36-ўринда жойлашган “Савдогар банк” автокредитлар ажратиш учун қуйидаги шартларни белгилаган, бошланғич тўлови – 30% (13-ўрин), йиллик фоиз ставкаси – 27% (29-ўрин), кредит муддати – 30 ой (37-ўрин) ва кредит қиймати 500 млн. сўмгача.
Рейтингда 37-ўринни эгаллаган “Туркистон банк” автокредит олиш учун банкга мурожат қилган мижозларга қўйидаги шартларда: бошланғич тўлови – 30% (13-ўрин), йиллик фоиз ставкаси – 28% (35-ўрин), кредитни қоплаш учун ажратиладиган муддат – 36 ой (25-ўрин), ва шу билан бирга кредит учун бериладиган қиймат 300 млн. сўмгача (37-ўрин) кредитлар ажратмоқда.
Шу ўринда таъкидлаш керакки, жисмоний шахсларга бирламчи бозордан автотранспорт воситаларини харид қилиш учун автокредитлар бўйича энг паст ставкани «Пойтахт банк» (22%), «Ипак йўли банк» (22%) ва «Ипотека банк» (22%) тақдим этаётган бўлса, энг юқори ставка Давр банк (30%) томонидан таклиф этилмоқда.
*Иқтисодий тадқиқотлар ва ислоҳотлар маркази методикаси бўйича ҳисоб-китоблар амалга оширилди
Маълумот учун: Марказий банк маълумотларига кўра, шу йилнинг июнь ойигача, тижорат банклари томонидан автотранспорт воситаларини харид қилиш учун 3 445,6 млрд. сўм миқдорида кредитлар ажратилган.
Маълумотлар тижорат банкларининг веб сайтларидан ва банк иловаларидан олинган бўлиб кредит шартлари ўзгариши мумкин. Батафсил маълумот учун банкнинг веб-сайтига ташриф буюришингиз мумкин.
Автокредитлар таҳлили 2021 йил 5 ноябрь куни янгиланди.
Муҳаммаджон Рашидов,
Иқтисодий тадқиқотлар ва ислоҳотлар маркази
Изоҳ қолдириш