Қашқадарё вилоятининг 2021 йилдаги асосий макроиқтисодий кўрсаткичлари

Қашқадарё вилоятининг 2021 йилдаги асосий макроиқтисодий кўрсаткичлари

2021 йил якунлари бўйича Қашқадарё вилоятида ялпи ҳудудий маҳсулот (ЯҲМ) ҳажми 43 833,3 млрд.сўмни, ўсиш кўрсаткичи 2020 йилга нисбатан 107,6%ни ташкил қилди.

Вилоятда яратилган ЯҲМнинг Республика ялпи ички маҳсулотдаги улуши 6,0% (2020 йилда 5,9%)ни ташкил қилган ҳолда Тошкент шаҳри, Тошкент, Навоий, Самарқанд, Фарғона вилоятларидан кейинги 6-ўрин (2020 йилда 7-ўрин)ни эгаллаган. ЯҲМ таркибида саноат улуши қурилишни қўшган ҳолда - 24,2% (2020 йилда 23,3%), қишлоқ хўжалиги улуши 41,4% (2020 йилда 42,2%) ва хизмат кўрсатиш улуши 34,4% (2020 йилда 34,5%) ни ташкил қилган. ЯҲМда кичик бизнес ва хусусий тадбиркорликнинг улуши 69% (2020 йилда 71,5%) ни ташкил қилган.

Жон бошига тўғри келадиган ЯҲМ ҳажми 12 999,6 минг сўмни ташкил қилган ҳолда (Республика ҳудудлари орасида 12-ўрин) 2020 йилга нисбатан 105,6 %га ошган.

Саноат

Вилоятда 18 741,1 млрд.сўмлик саноат маҳсулотлари ишлаб чиқарилган бўлиб, 2020 йилга нисбатан 115,3%сиш кўрсаткичи бўйича Республика ҳудудлари орасида 4-ўрин)га ошган. Вилоятда ишлаб чиқарилган саноат маҳсулотларининг республика саноатидаги улуши 4,1 фоиз (2020 йилда 4,0%)ни ташкил қилган ва ҳудудлар орасида 8-ўрин (2020 йилда 8-ўрин)ни эгалланган. Саноат маҳсулотларининг 26,3%и (2020 йилда 34,6%) кичик бизнес ва хусусий тадбиркорлик субъектлари томонидан яратилган. Шунингдек, вилоят саноати таркибида тоғ-кон саноатининг улуши - 10,8%, ишлаб чиқариладиган саноатнинг улуши - 64,9%, электр, газ, буғ билан таъминлаш ва ҳавони кондициялаш саноатининг улуши - 23,5%, сув билан таъминлаш, канализация тизими, чиқиндиларни йиғиш ва утилизация қилиш саноатининг улуши - 0,8%ни ташкил қилган.

Жон бошига тўғри келадиган саноат маҳсулотлари хажми 5 558,1 минг сўмни (Республика ҳудудлари орасида 12-ўрин) ташкил қилган ҳолда 2020 йилга нисбатан 113,1%га ошган.

Истеъмол товарлари

Вилоятда 4615,4 млрд.сўмлик (2020 йилга нисбатан 98,0%) истеъмол товарлари ишлаб чиқарилган бўлиб, республикадаги улуши 3,0% (2020 йилда 3,8%)ни ташкил қилган ҳолда ҳудудлар орасида 9-ўрин (2020 йилда 9-ўрин)ни эгаллаган.

Қишлоқ хўжалиги

Вилоятда 29 352,8 млрд.сўмлик қишлоқ хўжаликлари маҳсулотлари ишлаб чиқарилган бўлиб, 2020 йилга нисбатан 102,2%га ошган. Республика қишлоқ хўжалик маҳсулотларида вилоятнинг улуши 9,2%ни ташкил қилган ҳолда, ҳудудлар орасида 4-ўринни эгаллаган.

Жон бошига тўғри келувчи қишлоқ хўжалиги маҳсулотлари ҳажми 8 705,2 минг сўмни (Республика ҳудудлари орасида 9-ўрин) ташкил қилган ҳолда 2020 йилга нисбатан 100,3%га ошган.

Хизмат кўрсатиш

Кўрсатилган бозор хизматлари ҳажми 132 624,4 млрд.сўмни ташкил қилган ҳолда, 2020 йилга нисбатан 118,4%га ошган. Хизматлар ҳажмининг республика кўрсаткичидаги улуши 4,7%ни ташкил қилган ҳолда, ҳудудлар орасида 6-ўринни эгаллаган. Жон бошига тўғри келадиган хизматлар ҳажми 3 933,2 минг сўм (ҳудудлар орасида 13-ўрин)ни ташкил қилган ҳолда, 2020 йилга нисбатан 116,2%га ошган.

Чакана савдо

Чакана савдо ҳажми 16 320,5 млрд.сўмни ташкил қилган ҳолда, 2020 йилга нисбатан 108,5%га ошган. Чакана савдо хажмининг республика кўрсаткичидаги улуши 6,5%ни ташкил қилган ҳолда, ҳудудлар орасида 6-ўринни эгаллаган. Жон бошига тўғри келувчи чакана савда ҳажми 4 810,1 минг сўм (ҳудудлар орасида 12-ўрин)ни ташкил қилган ҳолда, 106,4%га ошган.

Қурилиш ишлари

Қурилиш ишлари ҳажми 6 071,9 млрд.сўмни ташкил қилган ҳолда, 2020 йилга нисбатан 112,7%га ошган. Вилоятда қурилиш ишлари ҳажмининг республика кўрсаткичидаги улуши 5,7%ни ташкил қилган ҳолда, ҳудудлар орасида 6-ўринни эгаллаган.

Асосий капиталга киритилган инвестициялар

Асосий капитилга киритилган инвестициялар ҳажми 16 225,1 млрд.сўмни ташкил қилган (2020 йилга нисбатан 72,7%) ва Республикадаги улуши 6,6% (ҳудудлар орасида 6-ўрин)ни ташкил қилган. Жон бошига тўғри келадиган асосий капиталга киритилган инвестициялар ҳажми 4 811,9 минг сўмни ташкил қилган (2020 йилга нисбатан 71,4%).

Ташқи савдо айланмаси

Ташқи савдо айланмаси хажми 661,9 млн.долларни ташкил қилган ҳолда, 2020 йилга нисбатан 122,1%га ошган. Вилоят ташқи савдо айланмасининг Республика жами ташқи савдо айланмасидаги улуши 1,6 %ни ташкил қилган ҳолда, ҳудудлар орасида 10-ўринни эгаллаган. Ташқи савдо айланмаси таркибида экспортнинг улуши -40,2%, импортнинг улуши -59,8%ни камайишни кўрсатди.

2021 йилда жами амалга оширилган экспорт хажми - 270,5 млн.долларни ташкил қилган ҳолда 2020 йилга нисбатан 138,4%га, импорт хажми - 391,4 млн.долларни ташкил қилган ҳолда 112,9%га ошган. Вилоятда амалга оширилган экспорт ва импортнинг Республика кўрсаткичидаги улуши 1,5%ни ташкил қилган.

2021 йил давомида 9 463 та янги кичик субъектлари ташкил этилган ва рўйхатдан ўтган кичик бизнес субъектлари сони 2020 йилга нисбатан 24,9%га ошган.

Анвар Қобилов

Иқтисодий тадқиқотлар ва ислоҳотлар Маркази

Қашқадарё филиали Сектор мудири

Мақолани улашинг

Ўхшаш янгиликлар