Тошкент шаҳри марказий кўчаларида пулли паркоматлар ташкил этилади

Ҳужжатга кўра, Тошкент шаҳар ҳокимлиги, Ички ишлар вазирлиги ва Транспорт вазирлигининг Тошкент шаҳрининг 10 та марказий кўчасида пулли автомобиль тўхташ жойлари тармоғи (паркоматлар) пилот лойиҳасини давлат-хусусий шериклик асосида ташкил этиш тўғрисидаги таклифига розилик берилади.

Давлат-хусусий шериклик асосида ташкил этилган паркоматларда аниқланган йўл ҳаракати қоидалари бузилиши учун жарималар суммасининг 20 фоизи — Ички ишлар вазирлигининг бюджетдан ташқари жамғармасига, 80 фоизи — хусусий шерикнинг ҳисоб рақамига ўтказилади.

Шунингдек, Тошкент шаҳри марказий кўчаларидаги паркоматларда:

• ногиронлиги бўлган шахслар учун йўл белгилари ва йўл чизиқлари воситасида махсус ажратилган қисмларда ногиронлиги бўлмаган ҳайдовчилар автомобилни тўхтатиши;
• паркоматлардан фойдаланганда ушбу хизмат учун тўловлар ўз вақтида амалга оширилмагани ва автомобиль белгиланган тартибда жойлаштирилмагани аниқланганда, ўрнатилган тартибда ҳайдовчиларнинг транспорт воситаларини пиёдалар йўлкаларидан юргизиши, йўл белгилари ва йўл ҳаракатининг бошқа қоидалари талабларига риоя этмаслик ҳолатларига тенглаштирилади ҳамда маъмурий жазо қўлланиши учун асос ҳисобланади.

Тўлов тизим қуйидагича амалга оширилади:

• Ҳокимлик томонидан ташкил этилган паркоматларда пулли автомобиль тўхташ жойига жойлаштириш нархлари аҳолининг зичлик даражаси ва шаҳар кўчаларининг қатнов қисмларини ўтказиш қобилиятини ҳисобга олган ҳолда ҳокимлик томонидан ишлаб чиқилган ва тасдиқланган нархларни белгилаш меъзонлари ва тартибига асосан белгиланади;
• Нархларни белгилаш меъзонлари ва тартиби Ўзбекистон Монополияга қарши курашиш қўмитасининг ҳудудий бошқармалари билан келишилган ҳолда тасдиқланади;
• Давлат-хусусий шериклик асосида ташкил этилган паркоматларда автомобиль тўхташ жойига жойлаштириш нархи ва энг кам ҳисоб-китоб вақти давлат-хусусий шериклик шартномасига асосан белгиланади;
• Паркоматдан фойдаланганлик учун ҳақ тўлаш автомобиль тўхташ жойлари талонлари ва (ёки) шартнома асосида нақд ва нақд бўлмаган шаклда амалга оширилади;
• Ҳақ тўлаш учун фойдаланувчи автоматик электрон тўлаш техник воситаларидан фойдаланиши мумкин бўлади;
• Фойдаланувчи паркоматлардан фойдаланганлик учун тўловни олдиндан шартнома асосида нақд ва нақд бўлмаган шаклда электрон тизимлари ёки мобиль иловалар ёрдамида амалга ошириши лозим. Бунда фойдаланувчи паркомат ўрнатилган жойдан 10 дақиқа мобайнида бепул фойдаланиш ҳуқуқига эга бўлади;
• Тўловни амалга оширишда фойдаланувчи автомобилнинг давлат рақами, автомобиль тўхташ жойига келган санаси ва вақтини, тўхташ жойи номини (рақамини), автомобилни қанча муддатга жойлаштиришини кўрсатади;
• Фойдаланувчи паркоматдан фойдаланиши учун олдиндан автоматик равишда автомобиль тўхташ жойи талонини олади;
• Талонда автомобилнинг давлат рақами, фойдаланувчи паркоматга келган санаси ва вақти кўрсатилади. Бу автомобилни вақтинчалик жойлаштириш учун фойдаланувчи ва паркоматнинг эгаси ўртасида тузилган оммавий шартнома ҳисобланади;
• Фойдаланувчи автомобилни сақлаш учун паркоматда тўланган муддат ўтгандан сўнг автомобилни олиб чиқиб кетиши ёки кейинги муддатга тўловни ўрнатилган тартибда амалга ошириши керак бўлади;
• Фойдаланувчи автомобиль тўхташ жойи талонини қўлига олгач, уни автомобиль асбоблар панелида назоратчи кўриши учун қулай жойга қўйиши шарт бўлади. Автомобиль тўхташ жойи талонига пулли автомобиль тўхташ жойи учун тўланган вақт ҳақида ахборот (автомобиль тўхташ жойи нархи – 1 соат, 1 соат 30 дақиқа ва ҳоказо), талондан фойдаланилган сана ва вақт киритилган бўлиши керак;
• Паркоматлардан пулли фойдаланиш вақти ҳокимлик томонидан белгиланади;
• Давлат-хусусий шериклик асосида ташкил этилган паркомат иш режими ҳамда даромадларнинг (фойданинг) тақсимланиши давлат-хусусий шериклик тўғрисидаги битимда келишилган тартибда белгиланади;
• Паркоматлардан бепул фойдаланиш ҳуқуқи фақат I ёки II гуруҳ ногиронлиги бўлган шахслар бошқараётган олд ва орқа ойналарига “7.17” йўл белгиси тасвири туширилган автомобилларга ҳамда махсус (Ички ишлар вазирлиги, Миллий гвардия, Фавқулотда вазиятлар вазирлиги, ёнғин хавфсизлиги хизмати, тез тиббий ёрдам) автомобилларга улар бевосита автомобиль тўхташ жойи ҳудудида ўз хизматларини ўтаётган вақтда берилади.

Паркоматлардан фойдаланиш тартиби қуйидагича белгиланмоқда:

• Паркоматларнинг иш соатлари ҳақидаги ахборот 5.15 “тўхтаб туриш жойи” ахборот белгиси остида жойлашган 7.5.4 - 7.5.7 “амал қилиш вақти” қўшимча ахборот белгисида (табличкада) кўрсатилади.
• Фойдаланувчи паркоматлардан фойдаланганда автомобилларни чизилган чизиққа қараб жойлаштиради.

Паркоматлар ёни ахборот таблолари билан жиҳозланади, уларга қуйидаги маълумотлар жойлаштирилади:

• кўрсатиладиган хизматларга ҳақ тўлаш тартиби, усуллари ва тўлов миқдори;
• паркоматдан фойдаланиш ва автомобиль махсус ажратилган жойга вақтинча қўйилганлиги учун тўлов ундириш ҳуқуқи берилган хусусий шерикнинг тўлиқ расмий номи ва жойлашган ери (почта манзили);
• паркоматдан фойдаланиш қоидалари;
• энг яқин ички ишлар бўлинмаси манзили ва телефон рақами;
• истеъмолчилар ҳуқуқларини ҳимоя қилувчи ҳудудий бўлинма манзили ва телефон рақами.