Ўзбекистон бир қатор халқаро рейтинглардаги ўз ўрнини яхшилади
Бугун, 26 май куни Халқаро рейтинглар ва индекслар билан ишлаш бўйича Республика Кенгашининг навбатдаги йиғилиши ўтказилди.
Шу йилнинг ўтган даврида ижтимоий-иқтисодий ҳамда сиёсий-ҳуқуқий соҳадаги бир қатор халқаро рейтингларда Ўзбекистоннинг ўрни яхшиланди.
Олий Мажлис Сенати Раиси Танзила Нарбаева раислигида ўтказилган йиғилишда ижтимоий-иқтисодий ва сиёсий-ҳуқуқий соҳага оид устувор халқаро рейтинг ва индексларда Ўзбекистон Республикасининг ўрнини яхшилаш бўйича 2021 йилга мўлжалланган чора-тадбирлар режасининг биринчи чоракдаги ижроси муҳокама қилинди, деб хабар қилмоқда Олий Мажлиси Сенатининг Ахборот хизмати.
Жаҳон банкининг Статистик салоҳият индексида Ўзбекистон 2020 йилда 2019 йилга нисбатан 16 поғонага кўтарилиб, 146 та мамлакат орасида 61-ўринни эгаллаган бўлса, Жаҳон мамлакатлари демократияси индексида мамлакатимизнинг ўрни 2020 йилда 2 поғонага юқорилаб, 167 та мамлакат ичида 155-ўринни эгаллаган. Глобал инновацион индексда Ўзбекистон жами 100 баллдан 24,54 балл билан 2015 йилга нисбатан ўз ўрнини 29 поғонага яхшилаб, 131 та мамлакат орасида 93-ўринни, Марказий ва Жанубий Осиё давлатлари орасида эса 4-ўринни қайд этди.
Жаҳон банкининг “Аёллар, бизнес ва қонун индекси”да Ўзбекистон хотин-қизлар ҳуқуқлари ва гендер тенглик бўйича аҳамиятга молик ислоҳотларни амалга оширган 27 та давлат қаторига киритилиб, 70,6 балл билан 5 поғонага юқорилаб, 190 та давлат орасидан 134-ўринни (2019 йилда – 139-ўрин) эгаллаган.
Шу билан бирга йиғилишда халқаро рейтинглар ва индексларнинг таркибий индикаторларида мамлакатимиз ўрнини янада яхшилаш мақсадида жорий йилда амалга оширилиши мўлжалланган чора-тадбирлар режасига қўшимчалар киритишга қаратилган “Йўл харитаси” ва қўшимча чора-тадбирлар режаси ишлаб чиқилиб, тасдиқланди.
Изоҳ қолдириш