24 апрель куни Президент Шавкат Мирзиёев раислигида Ўзбекистон иқтисодиётининг жорий йил биринчи чорагидаги ривожланиш натижаларини сарҳисоб қилишга бағишланган йиғилиш бўлиб ўтди. Йиғилишда мамлакатнинг иқтисодий ўсиши сўнгги вақтлардаги энг яхши чораклик натижани қайд этиб, инфляция кейинги йиллардаги энг паст даражага тушгани, инвестициялар рекорд кўрсаткичга етиб, экспорт барқарор ўсаётгани қайд этилди. Шу билан бирга, мавжуд камчиликларга эътибор қаратилиб, иқтисодий ўсишни мустаҳкамлаш бўйича истиқболдаги вазифалар белгилаб олинди.
Давлат раҳбари таъкидлагандек, 2026 йилнинг биринчи чораги якунлари бўйича Ўзбекистон иқтисодиёти 8,7 фоизга ўсди, бу эса ўтган йилнинг шу даврига нисбатан 1,9 фоиз бандга кўпдир. ЯИМ ҳажми жорий нархларда 447,9 трлн. сўмни ёки 36,9 млрд. долларни ташкил этди.
Ушбу кўрсаткичлар халқаро ташкилотларнинг прогнозларида кутилганидан анча баланд бўлди. Хусусан, ОТБ биринчи чоракда 6,7 фоизга ўсишни прогноз қилган бўлса, Жаҳон банки дастлаб 6 фоизни прогноз қилган эди. Бироқ апрель ойида банк ушбу прогнозни 6,4 фоизгача қайта кўриб чиқди. ХВЖ ҳам апрель ойидаги прогнозини 6,2 фоиздан 6,8 фоизга оширди. Ўз навбатида, Иқтисодий тадқиқотлар ва ислоҳотлар марказининг прогнози эришилган натижага энг яқин бўлиб, йил бошида 1-чоракда 7 фоизгача ўсишни прогноз қилинган эди. Шу билан бирга, жорий йилда халқаро ташкилотлар томонидан мамлакатимизда амалга оширилаётган ислоҳотларнинг бориши ҳам етарлича юқори баҳоланди. Хусусан, Ўзбекистон Иқтисодий эркинлик индексида 14 поғонага кўтарилиб, илк бор иқтисодиёти ўртача эркин давлатлар қаторидан жой олди.
Биринчи чоракда қуйидаги соҳалар иқтисодий ўсишнинг етакчи драйверлари бўлди. Тармоқлар кесимида энг юқори ўсиш суръатлари қурилишда қайд этилиб, ялпи қўшилган қиймат 15,0 фоизга ошди ва 26,4 трлн. сўмга етди. Хизматлар соҳаси 8,8 фоизга ўсиб, 240,1 трлн. сўмни ташкил этди ва иқтисодиётнинг энг йирик сегменти мақомини сақлаб қолди. Саноат 8,0 фоизга ўсиб, 124,9 трлн. сўмлик қўшилган қиймат яратди. Қишлоқ хўжалиги 5,1 фоизга ўсди, ушбу тармоқдаги ялпи қўшилган қиймат ҳажми 36,2 трлн. сўмни ташкил этди. Агар аниқ тармоқлар бўйича иқтисодий ўсишни батафсилроқ кўриб чиқсак, қуйидаги манзара кузатилади.
Чорак якунлари бўйича саноатда ишлаб чиқариш ҳажми 289,3 трлн. сўмга етиб, прогноз параметрларидан 2,44 трлн. сўмга ошди. Нефтни қайта ишлашда сезиларли ўсиш кузатилди: 129,5 фоиз. Енгил саноат юқори натижалар кўрсатди: кийим-кечак ва тўқимачилик маҳсулотлари ишлаб чиқариш 15,3 фоизга, трикотаж маҳсулотлари 26,9 фоизга, пахта толаси 25,2 фоизга ўсди. Қурилиш материаллари ишлаб чиқариш 14,4 фоиз, цемент ишлаб чиқариш 15,7 фоизга ошди. Автомобилсозликда ишлаб чиқариш 12,5 фоизга, шу жумладан, автобуслар 64,7 фоиз ва юк автомобиллари 46,6 фоизга ошди. Озиқ-овқат саноатида ўсиш 8,7 фоизни ташкил қилди.
Ҳисобот даврида бозор хизматлари сектори ҳажми 293,6 трлн. сўмга етди. Энг йирик йўналишлар: савдо – 75,1 трлн. сўм, транспорт – 49,1 трлн. сўм, молиявий хизматлар – 46,8 трлн. сўм, яшаш ва овқатланиш – 46,2 трлн. сўм, алоқа ва ахборотлаштириш – 22,8 трлн. сўм. Энг юқори ўсиш суръатлари таълимда – 22,5 фоиз ва молиявий хизматларда – 22,4 фоиз кузатилди. Қишлоқ хўжалигида ижобий динамика сақланиб қолди. Тармоқнинг ўсиши 5,1 фоизни ташкил этди, сабзавот ишлаб чиқариш 29 фоизга ошди, бу эса ички озиқ-овқат бозорида нархларнинг барқарорлашишига ёрдам берди.
Ҳудудлар кесимида саноат ишлаб чиқариш ҳажми бўйича Навоий вилояти, Тошкент шаҳри ва Тошкент вилояти етакчилик қилмоқда. Қурилишда энг юқори ўсиш Қорақалпоғистон Республикасида қайд этилди –176,0 фоиз. Хизматларни ривожлантириш бўйича Тошкент шаҳри етакчи бўлиб қолмоқда, у ерда номинал ўсиш 18,4 фоизни ташкил этди.
Шу билан бирга, ҳукумат томонидан яширин иқтисодиётни қисқартиришга қаратилган саъй-ҳаракатлар иқтисодий ўсишнинг эришилган кўрсаткичларига сезиларли ҳисса қўшганини алоҳида таъкидлаш лозим. Ҳисобот даврида унинг улуши солиқ маъмуриятчилигини такомиллаштириш, электрон савдони мониторинг қилиш ва бандликни легаллаштириш бўйича чора-тадбирларни амалга ошириш ҳисобига 24,8 фоиздан 22,9 фоизгача камайди, легаллаштирилган ишлар ҳажми эса ўсиш кўрсаткичини оширди.
Қайд этиш зарурки, ташқи иқтисодий омиллар ички бозорда нарх шаклланишига қўшимча босим ўтказмоқда. Нефтнинг жаҳон нархлари йил бошидан буён 40 фоизга ошди. Геосиёсий кескинлик логистика йўлакларига таъсир кўрсатиб, маҳаллий маҳсулотлар экспорти ва асосий истеъмол товарлари импорти учун транспорт харажатларининг 25-30 фоизга ошишига сабаб бўлмоқда. Логистикадаги узилишлар натижасида йирик шохли моллар импорти биринчи чоракда икки бараварга камайди, бу эса озиқ-овқат хавфсизлиги учун жиддий таҳдид. Давлатимиз раҳбари иқтисодиёт ўсавергани билан инфляция ҳам ошаверса, аҳоли ва тадбиркорлар ҳаётида ижобий ўзгариш сезилмаслигини таъкидлади.
Ички бозорда озиқ-овқат нархларини барқарорлаштириш учун наслли чорва моллари ва гўшт маҳсулотларини ҳаво транспорти орқали олиб кириш харажатларини қисман қоплаш тартиби жорий этилиб, бунинг учун бюджетдан 300 млрд. сўм ажратилди, шунингдек, умумий ҳажми 112,4 минг тонна бўлган музлатиш қувватларини яратиш режалаштирилган. Мўғулистондан 100 минг бош наслдор қўй ва эчки импорт қилиш, транспорт харажатларини 50 фоиз қоплаш кўзда тутилган. Чорва моллари учун озуқа базасини мустаҳкамлаш мақсадида бу йил 709 000 гектар майдонга озуқа экинлари экилади. Бу чораларнинг барчаси озиқ-овқат хавфсизлигини мустаҳкамлашга қаратилган.
Ташқи омилларга қарамай, озиқ-овқат нархларини барқарорлаштириш бўйича кўрилган чоралар натижасида биринчи чоракда инфляцион вазият сезиларли даражада яхшиланди. Жумладан, январь-март ойларида истеъмол нархлари 1,93 фоизга ўсди. Жорий йилнинг март ойи якунларига кўра, ойлик инфляция 0,6 фоизни ташкил этган бўлса, йиллик кўрсаткич ўтган йилги 10,34 фоиздан илк бор 7,1 фоизгача пасайди.
Бундай барқарор натижаларни мамлакатда жорий этилаётган инфляция ва нархлар барқарорлигини бошқаришнинг янги тизими натижаси сифатида кўриш мумкин. Барча масъул раҳбарлар ва вилоят ҳокимлари учун асосий озиқ-овқат маҳсулотлари нархларининг барқарорлигини таъминлаш ҳамда йиллик инфляциянинг 6,5 фоиздан ошишига йўл қўймаслик 2026 йил учун асосий вазифа этиб белгиланди.
Ўз навбатида, жадал иқтисодий ўсиш туфайли биринчи чоракда давлат бюджети даромадлари ҳам барқарор ўсиб, 103 трлн. сўмни ташкил этди ва ўтган йилнинг шу даврига нисбатан 35 фоизга ошди. Бюджетга 63,6 трлн. сўм солиқлар тушди, бу кутилган кўрсаткичлардан 15 фоизга, ўтган йилнинг шу даврига нисбатан эса 24 фоизга кўпдир. Божхона тушумлари 19,4 трлн.сўмни ташкил этди, бу ўтган йилнинг шу даврига нисбатан 20 фоизга кўп. Бунда маҳаллий бюджетлар ихтиёрида қолган маблағлар 21 фоизга ошиб, 2,2 трлн. сўмни ташкил этди. Шунингдек, ер участкаларини сотиш ва хусусийлаштириш жараёнлари натижасида маҳаллий бюджетлар ихтиёрига қўшимча равишда 572 млрд. сўм келиб тушди. Шу билан бирга, ҳудудларни қўллаб-қувватлаш мақсадида республика бюджетидан маҳаллий бюджетларга 1,1 трлн. сўм ўтказилганини ҳам қўшимча қилиш лозим.
Туман даражасида молиявий мустақилликни ошириш бўйича изчил амалга оширилаётган чора-тадбирлар натижасида маҳаллий бюджетларнинг имкониятлари сезиларли даражада кенгайди. Хусусан, туман маҳаллий бюджетлари ихтиёрида 1,4 трлн. сўм маблағ қолди. Бу ўтган йилнинг мос давридаги 346 млрд. сўмга нисбатан қарийб 4,2 баравар кўпдир. Шундай қилиб, бюджет сиёсати соҳасида ҳудудларнинг молиявий имкониятларини кенгайтиришга қаратилган сиёсат изчил давом эттирилмоқда, бу эса барча ҳудудларнинг салоҳиятини янада тўлиқ рўёбга чиқариш ва уларни жадал ривожлантиришга хизмат қилмоқда.
Йиғилишда қайд этилганидек, биринчи чоракда Ўзбекистонда инвестицион фаоллик рекорд даражага етди. Асосий капитал ва ривожланиш лойиҳаларига киритилган инвестициялар ҳажми 41,5 фоизга ошиб, 12,85 млрд. долларни ташкил этди. Тўғридан-тўғри хорижий инвестициялар 45,7 фоизга ошиб, 8,84 млрд. долларга етди. Чорак давомида мамлакатда умумий қиймати 1,185 млрд. доллар бўлган 1 508 та янги лойиҳа ишга туширилиб, 28 мингга яқин янги иш ўрни яратилди. Хорижий инвестициялар манбалари бўйича Хитой етакчилик қилди: 6,4 млрд. доллар. Кейинги ўринларда Россия –1,1 млрд. доллар, Туркия – 975 млн. доллар, БАА – 824 млн. доллар ва Германия – 342 млн. доллар. Биринчи чоракда 50 та шаҳар ва туманда ўзлаштирилган инвестициялар ҳажми 50 млн. доллардан ошган бўлса, шундан 21 тасида бу кўрсаткич 100 млн. долларга етган.
Умуман олганда, 2026 йилда халқаро молия институтлари ва хорижий давлат молия ташкилотлари иштирокида 125 та лойиҳани амалга ошириш ва улар доирасида 5,1 млрд. доллар жалб қилиш режалаштирилган. Биринчи чоракда ушбу манбалар ҳисобидан 947 млн. доллар хорижий кредитлар жалб қилинди, бу аввал кутилган прогноз кўрсаткичларидан 120 фоизга кўп. Ушбу инвестиция лойиҳалари доирасида инфратузилмани ривожлантириш ва аҳоли турмуш шароитини яхшилаш бўйича аниқ натижаларга эришилди.
Давлат активларининг халқаро бозорга чиқиши инвестицияларни жалб қилишдаги навбатдаги муҳим қадам бўлиши мумкин. Йиғилишда сўз олган давлатимиз раҳбари тез орада 2,4 млрд. долларлик давлат активларининг 30 фоизи илк бор халқаро фонд бозорларига жойлаштирилишини таъкидлади. Бу Миллий инвестиция жамғармасининг ташкил этилиши ва 13 та стратегик корхона бошқарувининг нуфузли Franklin Templeton компаниясига топширилиши билан боғлиқ.
Жорий йилда жами 53 млрд. доллар хорижий инвестиция жалб қилиш мақсади қўйилган. Йиғилишда мутасаддиларга сунъий интеллект асосида ҳудудларга энг мақбул лойиҳаларни танлаш бўйича ечим берадиган платформани жорий қилиш вазифаси қўйилди. Инвесторлар ва консалтинг компаниялари учун ушбу платформадан “ягона дарча” тамойили асосида фойдаланиш имконияти яратилади.
Шунингдек, Президент хорижий инвестициялар иштирокидаги 767 та корхона ишлаб чиқаришга ҳам, экспортга ҳам эътибор бермай, фақат импорт товарларни сотиш билан шуғулланаётганига эътибор қаратди. Шу муносабат билан уларни маҳаллий тадбиркорлар билан кооперация қилиш, эҳтиёт қисмлар ва бутловчи қисмларни маҳаллий ишлаб чиқаришни ташкил этиш, шунингдек, ички бозорда фаолият юритаётган компанияларга экспортга чиқишда кўмаклашиш бўйича улар билан ҳамкорликни йўлга қўйиш таклиф этилди. Бу борада алоҳида дастур ишлаб чиқиш бўйича ҳам топшириқ берилди.
Давлат раҳбари ҳар бир янги лойиҳа, ҳар бир доллар сармоя фақат ва фақат қўшилган қиймат, юқори даромадли иш ўрни ва экспортни кўпайтиришга хизмат қилиши кераклигини таъкидлади. Барча раҳбарлар учун инвестиция сифати асосий мезон бўлиши шартлиги эслатиб ўтди.
Биринчи чоракда товарлар ва хизматларнинг умумий экспорти барқарор ўсиш тенденциясини кўрсатди ва ўтган йилнинг шу даврига нисбатан 26 фоизга ёки 1,2 млрд. долларга ошиб, 5,8 млрд. долларга етди. Экспортнинг ўсиши асосан юқори қўшилган қийматли маҳсулотлар ва хомашё ресурсларини етказиб беришни кенгайтириш ҳисобига таъминланди. Республиканинг 147 та туман ва шаҳрида экспорт ҳажмининг ўсиши таъминланди. Натижада экспорт қилувчи корхоналарнинг умумий сони 4 мингтага етди. Хусусан, табиий уран экспорти 196 млн. долларга ёки 95 фоизга ошиб, 402,6 млн. долларни ташкил этди. Рангли металлар экспорти 137 млн. долларга ошиб, 248,7 млн. долларга етди (икки баравар ўсиш). Нефть ва газ маҳсулотлари экспорти 20 млн. долларга ёки 15 фоизга ошиб, 160 млн. долларни ташкил этди.
2026 йилнинг биринчи уч ойида қайта ишлаш саноатида ҳам ижобий динамика кузатилди. Хусусан, тўқимачилик маҳсулотлари экспорти 110 млн. долларга ёки 18 фоизга ошиб, 731 млн. долларга етди. Қурилиш материаллари экспорти 304 млн. долларни ташкил этиб, 130 млн. долларга ёки 75 фоизга ошди. Заргарлик маҳсулотлари экспорти 75 млн. долларга ёки 54 фоизга ошиб, 214 млн. долларга етди.
Қишлоқ хўжалиги ва озиқ-овқат маҳсулотлари экспорти ҳам барқарор ўсишни кўрсатди. Мева-сабзавот маҳсулотлари экспорти 34 млн. долларга ёки 12 фоизга ошиб, 320 млн. долларга етди. Озиқ-овқат маҳсулотлари экспорти 282 млн. долларни ташкил этиб, 47 млн. долларга ёки 120 фоизга ошди. Хизмат кўрсатиш соҳасида ҳам юқори ўсиш суръатлари таъминланди. Ҳисобот даврида хизматлар экспорти ўтган йилга нисбатан 35 фоизга ёки 573 млн. долларга ошиб, 2,2 млрд. долларни ташкил этди.
Экспорт географияси ҳам кундан кун кенгайиб бормоқда. Жорий йилнинг январь-март ойларида АҚШ, Австрия, Беларус, Полша, Жанубий Корея, Эрон, Қозоғистон ва Афғонистон каби 86 та давлатга илк бор 140 дан ортиқ товар позициялари бўйича илгари экспорт қилинмаган 162 млн. долларлик товарлар етказиб берилди.
Шу ўринда қайд этиб ўтиш керакки, экспорт йўналишидаги муваффақиятлар кўп жиҳатдан экспортни қўллаб-қувватлаш миллий тизими туфайли юзага келди. Савдога кўмаклашиш жамғармаси маблағлари ҳисобидан 405 нафар экспортчига 32,3 млрд. сўм миқдорида молиявий ёрдам кўрсатилиб, улар томонидан 98,9 млн. долларлик экспорт амалга оширилди. Давлат томонидан қўллаб-қувватланган ҳар 1 доллар экспортнинг 38,9 долларини ташкил этди. Эришилган натижалар мамлакатда экспорт салоҳиятини кенгайтириш бўйича амалга оширилаётган чора-тадбирлар самарадорлигини тасдиқлайди. Юқорида қайд этилган ютуқларга қарамай, ташқи бозордаги муаммолар маҳаллий бизнеснинг экспорт фаолиятига салбий таъсир кўрсатмоқда. Хусусан, Ўзбекистон Президенти йиғилишда сўнгги олти ойда хорижий ҳамкорлар билан 3,6 млрд. долларлик шартнома тузган 908 нафар тадбиркордаги вазият ўзгаргани сабабли экспортни бошламаганига эътибор қаратди.
2026 йилда ҳам кичик ва ўрта бизнесни ривожлантиришни фаол қўллаб-қувватлаш давом эттирилди. Бунга жорий йилда банклар орқали 140 трлн. сўм йўналтирилмоқда. I чоракда тадбиркорлик субъектларига 35 трлн. сўм, шу жумладан, бизнесни қўллаб-қувватлаш давлат дастурлари доирасида 8 трлн. сўм кредит ресурслари ажратилди. 21 мингта микролойиҳа амалга оширилиб, 52 минг аҳолининг даромади ошди. Бироқ, бу йўналишда айрим камчиликлар ҳам мавжуд. Айрим туман ва шаҳарларда кичик бизнесга берилган ҳар бир млрд. сўм кредит ҳисобига 17-20 тагача доимий иш ўрни яратилаётган бўлса, айрим қолоқ туманларда бу кўрсаткич ўртача 3 та иш ўрнини ташкил этмоқда. Йиғилишда Президентимиз бу борадаги ишларни яхшилаш учун кредит ресурсларини тақсимлашда сунъий интеллект имкониятларидан фойдаланиш зарурлигини таъкидлаб, банкларда “АИ-консультант” платформасини ишга тушириш бўйича топшириқ берди.
Йиғилишда давлат органлари маъмуриятларини оптималлаштириш ва бизнес учун янги майдонлар яратиш масаласи ҳам муҳокама қилинди. Туманлардаги марказий ва гавжум кўчаларнинг салмоқли қисмини давлат идоралари эгаллаганини инобатга олиб, 19 та туман ва шаҳарда “Кўкдала тажрибаси” асосида давлат идораларини ягона маъмурий марказларга кўчириш бошланган. Ушбу чора-тадбирларнинг мамлакатимизнинг барча туманларига татбиқ этилиши давлат идораларида йилига 1,8 млрд. киловатт соат электр энергияси ва 340 млн. куб метр газни тежаш, бизнес учун 5 млн. квадрат метр майдонни бўшатиш имконини беради. Беш йиллик дастур тайёрлаб, жорий йилда 26 та туманда давлат органларини ягона жойга кўчириш бўйича топшириқлар берилди. Янги маъмурий марказлар қурилишида ҳар бир ходимга тўғри келадиган ўртача майдон 15 квадрат метрдан ошмаслиги белгилаб қўйилган. Амалга оширилаётган чора-тадбирлар тадбиркорлик фаолиятини янада кенгайтириш учун мустаҳкам замин яратмоқда.
Биринчи чоракда ҳам кучли ижтимоий сиёсат фаол амалга оширилиб, камбағалликни қисқартириш ва бандликни таъминлаш бўйича фаол чора-тадбирлар кўрилди. Хусусан, I чорак давомида 167 минг киши доимий иш билан таъминланди, 737 минг фуқарога қўшимча даромад манбаи яратиш ва моддий аҳволини яхшилашга кўмаклашилди. Бу борада норасмий банд бўлган 241 минг нафар фуқаронинг иқтисодиётнинг қонуний секторига жалб этилиши муҳим аҳамият касб этди, бу эса уларга ижтимоий ҳимоя, молиявий хизматлардан фойдаланиш ва барқарор бандлик учун қўшимча имкониятлар яратди.
Ижтимоий ва манзилли қўллаб-қувватлаш дастурларини самарали амалга ошириш давом эттирилди. Кам таъминланган оилаларни қўллаб-қувватлашга алоҳида эътибор қаратилмоқда. 86 минг эҳтиёжманд оилага ишга жойлашиш, таълим олиш, ўз бизнесини йўлга қўйиш ва даромадини оширишга қаратилган 105 мингта турли хизмат кўрсатилди. “Меҳнатсевар аёл” дастури доирасида 26 минг нафар хотин-қиз, “Барқарор келажак сари” дастури доирасида 58 минг нафар ёш фуқаро иш билан таъминланди.
Ижтимоий-иқтисодий муаммолари юқори бўлган ҳудудларни жадал ривожлантириш учун танлаб олинган 37 та мураккаб туман ва 903 та мураккаб маҳаллага республика бюджетидан 3,6 трлн. сўм ажратилди. “Ўзбекистоннинг янги қиёфаси” мақомини олган ҳудудларга ҳам қўшимча ёрдам кўрсатилди. Ушбу мақомга эга 33 та туман ва шаҳар ҳамда 330 та маҳаллага 4 трлн. сўм йўналтирилди.
Бу борада олиб борилаётган сиёсат камбағалликни янада камайтириш ва аҳоли фаровонлигини оширишга хизмат қилмоқда, ижтимоий кўрсаткичлар ижобий динамикани кўрсатмоқда. Камбағаллик даражаси 1-чоракда 5,0 фоизгача, ишсизлик даражаси 4,7 фоизни ташкил этди ва прогнозларга кўра, ярим йилликка келиб бу иккала кўрсаткич ҳам 4,3 фоизгача қисқариши мумкин. Ижтимоий сиёсатда ижтимоий инфратузилмани ривожлантириш ва аҳолининг турмуш шароитини яхшилашга ҳам катта эътибор қаратилмоқда. Жумладан, биринчи чоракда 89 км. ичимлик суви, 8,2 км. оқава сув тармоқлари ва 40 км. автомобиль йўллари қурилди.
Осиё тараққиёт банки иштирокидаги лойиҳалар доирасида Нукус туманида 23,4 км. ичимлик суви тармоғи тортилди. Натижада 12 минг аҳоли илк бор ичимлик суви билан таъминланди, 19,1 минг аҳолининг сув таъминоти яхшиланди, ичимлик суви билан қамраб олиш даражаси 68,4 фоиздан 90 фоизга етказилди. Тошкент вилоятида ушбу банк иштирокида Чирчиқ шаҳрида янги оқава сувларни тозалаш иншооти қурилиб, фойдаланишга топширилди. Бу 160 минг аҳолига хизмат кўрсатиш сифатини ошириш ва қамров даражасини 80,4 фоиздан 90 фоизга етказиш имконини беради.
Амалга оширилаётган чора-тадбирлар мамлакатнинг барча ҳудудларида камбағалликни янада камайтириш, бандликни таъминлаш, аҳоли фаровонлигини ошириш ва турмуш шароитларини яхшилаш учун мустаҳкам пойдевор яратмоқда, десак, адашмаган бўламиз.
Иқтисодиётни жадал ривожлантириш, тадбиркорлик ҳаракатини кенгайтириш, камбағалликни қисқартириш ва аҳоли турмуш фаровонлигини ошириш йўлидаги чора-тадбирлар натижасида 2026 йил якунлари бўйича ҳам иқтисодий ўсишнинг юқори суръатлари сақланиб қолиши кутилмоқда. Хусусан, ЯИМнинг реал ўсиши 8,3-8,7 фоиз, хизматлар соҳасида 9,1 фоиз, саноатда 8,7 фоиз, қурилишда 11,5 фоиз оралиғида бўлиши прогноз қилинмоқда.
Шу билан бирга, Президент йиғилишда биринчи чоракда эришилган натижалар фонида бўшашиш мутлақо мумкин эмаслиги, глобал қарама-қаршилик кучайиб бораётган ҳозирги шароитда жаҳон иқтисодиёти аввалгидек “тинч” бўлмаслигини таъкидлаб ўтди. Бунда иқтисодий ўсишни таъминлаш, инфляцияни жиловлаш, иш ўринлари яратиш, экспортни кўпайтириш, инвестициялар сифатини ошириш ва тадбиркорлар муаммоларини ҳал этиш ҳар бир раҳбар фаолиятининг асосий мезони бўлиши кераклиги таъкидланди.
Бугунги кунда дунёнинг кўплаб мамлакатларида кузатилаётган паст иқтисодий ўсиш кўрсаткичлари фонида Ўзбекистонда биринчи чорак якунлари бўйича иқтисодий ўсиш 8,7 фоизга етди. Бу эса, амалга оширилаётган ислоҳотларнинг пухта ўйланганлиги ва самарадорлиги, шунингдек, иқтисодиётнинг сифатли ва тезкор бошқарилаётганлигидан далолат беради. Юқори иқтисодий ўсиш суръатлари, ўз навбатида, албатта, халқимиз фаровонлигининг юксалишида акс этади!
Хуршед АСАДОВ,
Иқтисодий тадқиқотлар ва ислоҳотлар маркази
"Иытисодий шарҳ" журнали №5/2026
Изоҳ қолдириш