Бугун, 22 август куни анъанага кўра, Тошкентдаги Конгресс-ҳоллда президентнинг тадбиркорлар билан очиқ мулоқоти бўлиб ўтмоқда. Айни вақтда Президент Шавкат Мирзиёев давлат мукофоти билан тақдирланган бир гуруҳ тадбиркорларга мукофотларни топшириш маросимида иштирок этмоқда.
Давлат раҳбари тақдирлаш маросимидан аввал сўзга чиқиб, бугунги кундаги тадбиркорлик ҳақида фикр билдирди.
"Бундан бир йил олдин сизлар билан мана шундай эзгу анъанани йўлга қўйганимиз жуда тўғри бўлганини, бугун ҳаётнинг ўзи исботламоқда. Ўтган йилги учрашув арафасида ва тадбир давомида сизлардан келиб тушган минглаб мурожаатларда кўтарилган муаммоларни ҳал этиш ва таклифларни амалга оширишга қаратилган катта дастур, 70 дан ортиқ фармон ва қарорлар қабул қилдик. Бизнесни йўлга қўйиш ва ривожлантириш учун, 130 триллион сўм кредитлар, 3,5 триллион сўмлик субсидия ва компенсациялар ажратдик.
Ўтган йилги учрашувимиз арафасида хорижий валютада кредит олган ва валюта курсининг мунтазам ўсиши ҳисобига қийин аҳволга тушиб қолган юзлаб тадбиркорларимиздан мурожаатлар келиб тушган эди. Шундай муаммога дуч келган тадбиркорларнинг мушкулини осон қилиш мақсадида, уларнинг 123 миллион долларга тенг кредитларини миллий валютага ўтказиб бердик. Ушбу амалиётни давом эттирамиз.
Қурилиш саноатида цемент, чарм-саноатда бўёқлар ва кимёвий моддалар, мебель саноатида М-Д-ЭФ, фурнитура ва аксессуарлар каби жами 82 турдаги хом ашё ва ярим тайёр маҳсулотлар импорт божидан озод қилинди, натижада маҳсулотларнинг таннархини камайтиришга шароит яратилди.
Умуман, ижобий мисол сифатида кўрсатадиган натижаларимиз кўп.
Мен улар ҳақида кўп тўхталмасдан, айнан бизнес муҳитнинг яхшиланганини кўрсатувчи мисолларни келтириб ўтмоқчиман.
Эътибор беринг, ўтган бир йил давомида:
- тадбиркорлар томонидан 55 мингдан ортиқ бизнес учун бинолар барпо этилди. Яъни, тадбиркорлар келажакка ишониб, кўчмас мулкка инвестицияларни кўпайтирмоқда;
- тушумлари 1 миллион доллардан ошган тадбиркорлик субъектлари сони 5 мингтага ошиб, 26 мингтага етди;
- яна 1 минг нафари товар айланмасини 1 миллиондан 10 миллион долларгача етказди;
- яна 220 нафарининг тушумлари эса, 100 миллион долларга етди;
- экспорт қилувчи корхоналар сони 7,5 мингтага етди, умумий экспорт ҳажми 30 фоизга кўпайди.
Албатта, бундай ютуқларга эришиш осон бўлмаяпти. Мен буни яхши тушунаман. Ушбу ютуқлар негизида сизларнинг тинимсиз ва машаққатли меҳнатингиз турганини аниқ биламан ва қадрлайман. Бугун ушбу минбардан туриб бир гапни баралла айтмоқчиман: мен Сизларни фаровон ҳаётимиз бунёдкорлари, деб биламан ва бу йўлда сизлар билан доим биргаман.
Ҳозиргина 29 нафар бизнес вакилларимизга уларнинг меҳнатини эътироф этиб, давлатимизнинг юксак орден ва медалларини топширдим.
Шунингдек, куни кеча 100 нафар ишбилармонларимиз “Фаол тадбиркор” кўкрак нишонига сазовор бўлди.
Фурсатдан фойдаланиб, ушбу тадбиркорларимизни яна бир бор чин қалбимдан табриклайман", деди давлат раҳбари.
Дунёдаги ҳозирги вазият, унинг жаҳон иқтисодиётига салбий таъсири ортиб бормоқда. Иқтисодий фаолликнинг пасайиши, ташқи савдо, логистика, озиқ-овқат ва хом ашё нархлари, энергия билан барқарор таъминлашдаги муаммолар тадбиркорларни асосли хавотирга солаяпти. Шу боис, ушбу хавф-хатарларнинг иқтисодиётимизга таъсирини камайтириш ва барқарор ривожланиш учун барча имкониятларни ишга солиняпти.
Шавкат Мирзиёев бу жараёнда тадбиркорларимиз билан доимий мулоқот қилиб, келгусидаги барча ҳаракатларимизни бамаслаҳат давом эттирилишини таъкидлаб ўтди.
Изоҳ қолдириш