Хитойнинг ByteDance, Alibaba ва Tencent компаниялари Nvidia’дан умумий қиймати 35 млрд доллардан ортиқ бўлган 3 млн донадан зиёд RTX PRO 5500 видеокартасига буюртма берди. Ҳар бир видеокартанинг нархи 11,4 минг доллар атрофида баҳоланмоқда.
RTX PRO 5500 видеокарталари Nvidia’нинг сунъий интеллект учун ишлаб чиқарилган илғор процессорларига нисбатан камроқ қувватга эга, бироқ АҚШ экспорт чекловларига тушмайди ва Хитойга сотилиши мумкин.
Хитой компанияларининг умумий буюртмалари 6 млн донадан ошган. Юқори талаб сабабли Nvidia етказиб беришда қийинчиликлар юзага келиши мумкинлигини билдирган. Бу Хитойда сунъий интеллектни ривожлантириш учун ҳисоблаш қувватларига талаб юқорилигини кўрсатади.
Nvidia 2027 йилда жаҳон бозори учун кўпи билан 3 млн дона шундай видеокарта ишлаб чиқариши мумкин. Дастлабки етказиб беришлар 2027 йилнинг I чорагида бошланиши кутилмоқда.
Британиянинг LSEG молиявий ахборот гуруҳи баҳолашича, BP (British Petroleum) компаниясининг соф фойдаси 2026 йилнинг III чорагида 155 фоизга ошиши кутилмоқда. Shell нефтни қайта ишлашдан олинадиган маржа бир баррель учун рекорд даражадаги 42 долларга етишини, TotalEnergies эса нефтни қайта ишлаш ва нефть-кимё фаолиятидан пул оқими икки баравар ошиб, 4 млрд долларга етишини прогноз қилмоқда. ExxonMobil ушбу соҳадаги фойда аввалги чоракка нисбатан 4,5 млрд долларга кўпайиши мумкинлигини билдирган.
Умуман, BP, Shell ва TotalEnergies нефтни қайта ишлаш маржаси ўтган йилга нисбатан 3–4 баравар ошишини кутмоқда. Бунга энергия ресурслари нархининг кўтарилиши ва Ҳўрмуз бўғози орқали етказиб беришдаги узилишлар таъсир кўрсатмоқда.
Financial Times маълумотларига кўра, бешта йирик нефть-газ компаниясининг (ExxonMobil, Shell, Chevron, TotalEnergies ва BP) жами фойдаси 2026 йилнинг биринчи ярмида 75 млрд доллардан ошиб, ўтган йилнинг мос даврига нисбатан 75 фоизга ўсган. Компанияларнинг эркин пул оқими қарийб икки баравар кўпайган. Эрон билан можаро бошланганидан буён Европада газ нархи 155 фоизга, дизель ёқилғиси нархи эса икки бараварга ошган.
Изоҳ қолдириш