Тошкент шаҳрида "Ўзбекистон Республикасида давлат ва жамият қурилишининг янги босқичи, мамлакатни демократик модернизациялашда парламент ва ҳокимлик вакиллик органларининг ролини ошириш" мавзусидаги халқаро конференция бўлиб ўтди.
Конференциянинг биринчи сессияси мамлакатимиз ички ва ташқи сиёсатидаги муҳим масалаларни ҳал этишда парламент ва ҳукумат вакиллик органларининг роли, ижро ҳокимияти фаолияти устидан парламент назоратини амалга ошириш масалаларига бағишланди.
Сессия доирасида Олий Мажлис Сенати Раисининг биринчи ўринбосари Содиқ Сафоев сўзга чиқди ва сўнгги йилларда парламентда кузатилган ўзгаришларга тўхталиб ўтди.
"Жамиятимиз олдида турган стратегик мақсад – замонавий, барқарор ривожланиб бораётган ижтимоий бозор иқтисодиётига асосланган демократик ҳуқуқий давлат қуриш парламентнинг ролини янада оширишни талаб этади.
Жадал иқтисодий ривожланишни таъминлаш учун қонун устуворлиги керак.
Давлат ҳокимиятининг аҳоли олдидаги жавобгарлиги унинг фаолиятининг шаффофлигидир. Бунга эришиш эса, биринчи навбатда, халқ вакилларининг фаолияти билан боғлиқ", деди С.Сафоев.
Изоҳ қолдириш