Xorijga ishga ketayotgan O‘zbekiston fuqarolarini qo‘llab-quvvatlashga qaratilgan Memorandumlar imzolandi

Xorijga ishga ketayotgan O‘zbekiston fuqarolarini qo‘llab-quvvatlashga qaratilgan Memorandumlar imzolandi

O‘zbekiston Respublikasi Prezidentining 2019 yil 20 avgustdagi “Xorijda vaqtinchalik mehnat faoliyatini amalga oshirayotgan O‘zbekiston Respublikasi fuqarolari va ularning oila a’zolarini himoya qilish kafolatlarini yanada kuchaytirish choralari to‘g‘risida”gi PF-5785-son farmonida belgilangan vazifalar ijrosini ta’minlash doirasida 2019 yilning 28 noyabr kuni O‘zbekiston Respublikasi Bandlik va mehnat munosabatlari vazirligida Mehnat vazirligi, “O‘zagrosug‘urta” AJ hamda “Mikrokreditbank” ATB o‘rtasida hamkorlik memorandumlarini imzolash marosimi bo‘lib o‘tdi.

Uch tomonlama hamkorlik munosabatlarini nazarda tutuvchi “Vaqtinchalik mehnat faoliyatini amalga oshirish uchun xorijga jo‘nab ketayotgan O‘zbekiston Respublikasi fuqarolariga mikroqarzlar taqdim etish bo‘yicha hamkorlik memorandumi”ga ko‘ra vaqtinchalik mehnat faoliyatini amalga oshirish uchun xorijga jo‘nab ketayotgan O‘zbekiston Respublikasi fuqarolariga xorijda ishga joylashish xarajatlarini qoplash maqsadida bir yil muddatga 2 million so‘m miqdorida mikroqarzlar taqdim etiladi.

Bunda mikroqarzlarni rasmiylashtirish jarayoni bir bank kunida amalga oshirilib, buning uchun pasport, ariza kabi minimal hujjatlar talab qilinadi.

Mikroqarzlarning yillik foizi 2019-2020 yillarda 10 foiz va 2021 yilda 12 foiz etib belgilangan.

Mazkur kreditlar O‘zbekiston Respublikasi Bandlik va mehnat munosabatlari vazirligining “labour-migration” dasturiy majmuasida ro‘yxatdan o‘tgan mehnat migrantlariga beriladi.

Shuningdek, Mehnat vazirligi va “O‘zagrosug‘urta” AJ o‘rtasida “Vaqtinchalik mehnat faoliyatini amalga oshirish uchun xorijga ketayotgan O‘zbekiston Respublikasi fuqarolarining hayoti va sog‘lig‘i sohasida hamkorlik memorandumi” imzolandi.

Ushbu hujjat bilan fuqarolarning chet elda vaqtincha ishlashi davrida ularning hayoti va sog‘lig‘ini sug‘urtalash sug‘urta mukofoti miqdorini qoplash uchun 50 ming so‘m miqdorida bir martalik subsidiyalar taqdim etiladi.

Ushbu sug‘urta mablag‘lari O‘zbekiston Respublikasi Bandlik va mehnat munosabatlari vazirligi huzuridagi Xorijda mehnat faoliyatini amalga oshirayotgan fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi hamda Bandlikka ko‘maklashish davlat jamg‘armasi hisobidan amalga oshiriladi.

Mazkur memorandumlarda ko‘rsatilgan vazifalarning amaliyotga tatbiq etilishi xorijda mehnat faoliyatini olib borayotgan yurtdoshlarimizni qo‘llab-quvvatlash, ularning xavfsizligini ta’minlash, hayoti, sog‘lig‘ini asrash yo‘lidagi muhim qadamlardan biri bo‘ldi.

Maqolani ulashing

O'xshash yangiliklar