O‘zbekiston Yevropa muhim xomashyo alyansiga qo‘shildi
Dunyo kritik minerallar bo‘yicha yangi davrga kirib keldi, shubhasiz, O‘zbekiston ham bu jarayonlar markazida bo‘lishga intilmoqda.
O‘tgan yili Yevropa Ittifoqi va O‘zbekiston muhim xomashyo sohasida tarixiy qadam tashlab, shu yo‘nalishda o‘zaro anglashuv memorandumini imzolagan edi. Bugun esa TMK Yevropa muhim xomashyo alyansiga rasman qo‘shildi! Bu bilan O‘zbekistonning global kritik minerallar bozoridagi o‘rni yana bir pog‘onaga ko‘tarildi.
Yevropa muhim xomashyo alyansi (ERMA) Yevropa sanoatining resurs siyosatini belgilovchi eng muhim platformalardan biri. U Yevropa sanoati uchun litiy, volfram, molibden va nodir yer elementlarini xavfsiz va barqaror manbalardan yetkazib berishni ta’minlaydi. Mazkur alyans Yevropaning yashil texnologiyalar va kelajak energetikasiga o‘tish jarayonida hal qiluvchi kuchga ega.
"Biz ERMA maqsadlarini amalga oshirish, shuningdek, Yevropa Ittifoqi va O‘zbekiston o‘rtasidagi hamkorlikni mustahkamlash yo‘lida TMK bilan birgalikda ishlashni intiqlik bilan kutmoqdamiz", deydi ERMA direktori Massimo Gasparon.
Ushbu a’zolik TMKni kritik minerallar bozorida butunlay yangi darajaga olib chiqishi kutilmoqda. Xususan, Yevropa grantlari va investitsiyalari orqali bu yo‘nalishdagi loyihalar uchun moliyaviy mexanizmlar kengayadi. Yevropaning ilg‘or markazlari bilan qo‘shma tadqiqotlar olib boriladi va innovatsiyalar tatbiq etiladi. TMK mahsulotlari xalqaro bozorga yanada yuqori sifat ko‘rsatkichlari bilan chiqadi.
🇺🇿 Bir so‘z bilan aytganda, bu a’zolik O‘zbekistonni resurs yetkazib beruvchidan innovatsion hamkorga aylantiradi!
Izoh qoldirish