«Eng yaxshi soliq to‘lovchi mahalla» nominatsiyasini joriy etildi

Daromad solig‘i to‘lovchilar soni

Tanlov mezonlari:

Nominatsiya g‘oliblari mahalla aholisi 1 000 nafarga nisbatan hisoblangan shaffof ko‘rsatkichlar tizimi asosida aniqlanadi. Jumladan, quyidagilar inobatga olinadi:

- 1 000 nafar aholiga to‘g‘ri keladigan kichik biznes sub’yektlari soni;

- 1 000 nafar aholiga to‘g‘ri keladigan kichik biznes sub’yektlari tomonidan to‘langan soliqlar hajmi;

- 1 000 nafar aholiga to‘g‘ri keladigan jismoniy shaxslardan daromad solig‘i to‘lovchilari soni;

- 1 000 nafar aholiga to‘g‘ri keladigan o‘zini o‘zi band qilgan fuqarolar soni va ular tomonidan to‘langan soliqlar miqdori;

- mahalla aholisi tomonidan mulk solig‘i va yer solig‘ini to‘lash darajasi.

Bunday tizim tadbirkorlik rivojlanishini, umumiy soliq madaniyatini va mahallalarning mas’uliyatini kompleks baholash imkonini beradi.

G‘oliblar uchun rag‘batlantirish choralari

«Eng yaxshi soliq to‘lovchi mahalla» deb topilgan mahallalar uchun qator rag‘batlantiruvchi choralar nazarda tutilgan, jumladan:

1. Ikki mavsum ketma-ket g‘olib bo‘lgan mahallalar uchun tashabbusli byudjet doirasida loyiha taqdim etish imkoniyatini keyingi ikki mavsumga cheklash qoidasi qo‘llanilmaydi.

Bu esa bunday mahallalarga o‘z faolligini yo‘qotmagan holda dasturlarda ishtirok etishni davom ettirish imkonini beradi.

2. Loyihalar sheriklik asosida amalga oshirilganda quyidagi tartib joriy etiladi:

- agar mahalla aholisi loyiha qiymatining kamida 25%ini moliyalashtirsa, loyiha g‘olib deb topiladi va qolgan 75% davlat byudjeti hisobidan moliyalashtiriladi.

Bu tartib aholini o‘zaro hamkorlikka, o‘zini o‘zi tashkil etishga va davlat bilan birgalikda loyihalarni amalga oshirishga kuchli rag‘bat yaratadi.

3. Belgilangan mezonlar asosida har yili «Eng yaxshi soliq to‘lovchi mahallalar» orasida birinchi 100talikka kirgan har bir mahallaga davlat byudjeti hisobidan «Mahallaning ijtimoiy-iqtisodiy muammolarini hal etish jamg‘armasi»ga 2 milliard so‘m ajratiladi.

Shu bilan birga, fuqarolar yig‘ini qaroriga asosan ajratilgan mablag‘lar faqat mahalla infratuzilmasini yaxshilashga yo‘naltiriladi, jumladan:

- ichki yo‘llarni ta’mirlash;

- ichimlik suvi ta’minoti tizimini yaxshilash;

- elektr ta’minotini modernizatsiya qilish va mustahkamlash;

- ko‘cha yoritgichlarini o‘rnatish;

- aholi turmush sifatini oshiradigan boshqa infratuzilma loyihalarini amalga oshirish.

«Eng yaxshi soliq to‘lovchi mahalla» nominatsiyasini joriy etish va yangi rag‘batlantirish choralari quyidagilarga qaratilgan:

- kichik biznes va o‘zini o‘zi band qilishni rivojlantirishni rag‘batlantirish;

- soliq intizomini mustahkamlash;

- fuqarolarning o‘z hududini rivojlantirishdagi ishtirokini kengaytirish;

- mahalliy infratuzilma sifatini oshirish.

Ushbu choralar mahallaning ijtimoiy-iqtisodiy rivojlanishda faol ishtirokchi sifatidagi rolini kuchaytirishi va davlat ko‘magi maqsadli ravishda yetkazilishiga xizmat qilishi kutilmoqda.