Joriy yil 18 aprel kuni Prezident Shavkat Mirziyoyev raisligida bo‘lib o‘tgan videoselektor yig‘ilishida dunyoda yuz berayotgan iqtisodiy va savdo cheklovlarining O‘zbekistonga ta’sirini yumshatish masalalari muhokama qilindi.
Videoselektorda jahon iqtisodiy kon’yunkturasining hozirgi kunda barqaror emasligi ta’kidlandi. O‘zgaruvchan vaziyat, yangi tariflar va cheklovlar boshqa davlatlarga ham ta’sir ko‘rsatib, global iqtisodiy o‘sishni sekinlashtirmoqda va xalqaro savdoning hajmini qisqartirmoqda.
Iqtisodiy tadqiqotlar va islohotlar markazi direktori Obid Xakimov “O‘zbekiston24” telekanalining "Tahlilnoma" haftalik yangiliklar ko‘rsatuvida Garvard Growth Lab tomonidan 145 mamlakat, jumladan O‘zbekiston uchun o‘tkazilgan Iqtisodiy murakkablik indeksini (ECI) tahlili natijalari haqida gapirdi.
"O‘zbekiston Iqtisodiy murakkablik indeksida o‘z mavqeyini 25 punktga yaxshiladi. Bu nimani anglatadi? Avvalo, mamlakatimiz xom ashyo eksportchisi bo‘lishdan yuqori qo‘shilgan qiymatga ega mahsulotlar eksportchisiga aylandi. Bu elektronika, avtomobilsozlik, farmatsevtika, kimyo sanoati va boshqalardir. Shuningdek, O‘zbekiston post-sovet mamlakatlaridan yuqori o‘rinni egallamoqda. Bu so‘nggi 5-6 yil ichida iqtisodiyotda amalga oshirilgan tarkibiy islohotlardan dalolat beradi.
Hisobotda shuningdek, mahalliy iqtisodiyot 2033 yilgacha bo‘lgan davrda eng tez o‘sayotgan ikkinchi iqtisodiyotga aylanishi ta’kidlangan”, — dedi O.Hakimov.
Eslatib o‘tamiz, videoselektor yig‘ilishida, uch-to‘rt kun ichida xalqaro moliya bozorlarida 10 trillion dollar yo‘qotildi. Yuqori tariflar oqibatida xalqaro savdo hajmi 3,5 trillion dollarga qisqarib, dunyodagi inflyasiya darajasi 7,5-8 foizga ko‘tarilishi prognoz qilinmoqda.
Prezident bunday sharoitda faqat o‘z kuchimiz va ichki imkoniyatlarimizga tayanib, dadil qadam tashlash kerakligini ta’kidladi. Har bir vazirlik, tarmoq va hudud rahbarlari aniq-aniq reja qilib, ishlab chiqarish, eksport bilan shaxsan shug‘ullanishi shartligi ko‘rsatib o‘tildi.
Shuningdek, iqtisodiyoti jahon iqtisodiyotining ajralmas qismi ekanligi ta’kidlandi. Oqilona tashqi siyosat va qulay investitsiyaviy muhit natijasida tadbirkorlarimizga yangi bozorlar ochilmoqda, mahsulotlar turi ko‘paymoqda.
Iqtisodiy tadqiqotlar va islohotlar markazi
Jamoatchilik bilan aloqalar bo‘limi
Izoh qoldirish