Жорий йил 18 апрель куни Президент Шавкат Мирзиёев раислигида бўлиб ўтган видеоселектор йиғилишида дунёда юз бераётган иқтисодий ва савдо чекловларининг Ўзбекистонга таъсирини юмшатиш масалалари муҳокама қилинди.
Видеоселекторда жаҳон иқтисодий конъюнктурасининг ҳозирги кунда барқарор эмаслиги таъкидланди. Ўзгарувчан вазият, янги тарифлар ва чекловлар бошқа давлатларга ҳам таъсир кўрсатиб, глобал иқтисодий ўсишни секинлаштирмоқда ва халқаро савдонинг ҳажмини қисқартирмоқда.
Иқтисодий тадқиқотлар ва ислоҳотлар маркази директори Обид Хакимов “Ўзбекистон24” телеканалининг "Таҳлилнома" ҳафталик янгиликлар кўрсатувида Garvard Growth Lab томонидан 145 мамлакат, жумладан Ўзбекистон учун ўтказилган Иқтисодий мураккаблик индексини (ECI) таҳлили натижалари ҳақида гапирди.
"Ўзбекистон Иқтисодий мураккаблик индексида ўз мавқейини 25 пунктга яхшилади. Бу нимани англатади? Аввало, мамлакатимиз хом ашё экспортчиси бўлишдан юқори қўшилган қийматга эга маҳсулотлар экспортчисига айланди. Бу электроника, автомобилсозлик, фармацевтика, кимё саноати ва бошқалардир. Шунингдек, Ўзбекистон пост-совет мамлакатларидан юқори ўринни эгалламоқда. Бу сўнгги 5-6 йил ичида иқтисодиётда амалга оширилган таркибий ислоҳотлардан далолат беради.
Ҳисоботда шунингдек, маҳаллий иқтисодиёт 2033 йилгача бўлган даврда энг тез ўсаётган иккинчи иқтисодиётга айланиши таъкидланган”, — деди О.Ҳакимов.
Эслатиб ўтамиз, видеоселектор йиғилишида, уч-тўрт кун ичида халқаро молия бозорларида 10 триллион доллар йўқотилди. Юқори тарифлар оқибатида халқаро савдо ҳажми 3,5 триллион долларга қисқариб, дунёдаги инфляция даражаси 7,5-8 фоизга кўтарилиши прогноз қилинмоқда.
Президент бундай шароитда фақат ўз кучимиз ва ички имкониятларимизга таяниб, дадил қадам ташлаш кераклигини таъкидлади. Ҳар бир вазирлик, тармоқ ва ҳудуд раҳбарлари аниқ-аниқ режа қилиб, ишлаб чиқариш, экспорт билан шахсан шуғулланиши шартлиги кўрсатиб ўтилди.
Шунингдек, иқтисодиёти жаҳон иқтисодиётининг ажралмас қисми эканлиги таъкидланди. Оқилона ташқи сиёсат ва қулай инвестициявий муҳит натижасида тадбиркорларимизга янги бозорлар очилмоқда, маҳсулотлар тури кўпаймоқда.
Иқтисодий тадқиқотлар ва ислоҳотлар маркази
Жамоатчилик билан алоқалар бўлими
Изоҳ қолдириш