ДСҚ учта рақамли хизматларни расмийлаштиришни жорий этмоқда

ДСҚ учта рақамли хизматларни расмийлаштиришни жорий этмоқда

ДСҚ учта рақамли хизмат – товар ва хизматлар ягона электрон каталоги, электрон шартномалар платформаси, электрон ишончномаларни расмийлаштиришни жорий этмоқда.

Гап хўжалик юритувчи субъектлар ўртасида электрон маълумотларнинг тизимли ва изчил алмашинувини таъминлайдиган, бирламчи бухгалтерия ҳужжатларини автоматлаштирадиган ва солиқ тўловчиларга солиқ юкини кескин камайтирадиган учта хизмат ҳақида кетмоқда.

Булар:

– Маҳсулотлар (товар ва хизматлар) ягона электрон миллий каталоги;

– Ягона электрон шартномаларнинг ахборот портали;

– Электрон ишончномаларни расмийлаштириш онлайн тизими.

2021 йилнинг 28 апрель куни Вазирлар Маҳкамасининг «Маҳсулотлар (товар ва хизматлар) ягона электрон миллий каталогини жорий этиш, тадбиркорлик субъектлари ўртасида тузилган шартномаларни электрон рўйхатдан ўтказиш ва товар-моддий бойликларни олиш учун ишончномаларни электрон расмийлаштириш чора-тадбирлари тўғрисида»ги 249-сон қарори қабул қилинди.

Унда ушбу хизматларни интеграциялашнинг босқичма-босқич стратегияси назарда тутилган:

– шартномалар порталини ишлаб чиқиш ва белгиланган тартибда “Электрон ҳукумат” тизимининг идоралараро интеграцион платформасига улаш;

– штрих кодларини кўрсатиш орқали маҳсулотларнинг (товар ва хизматлар) унификациялашган номлари ва идентификациялаш кодларини аниқлаш имконини берувчи интерактив хизмат жорий этиш ва Ягона интерактив давлат хизматлари порталига интеграция қилиш;

– онлайн назорат-касса машиналари ва виртуал касса тизимига маҳсулотларнинг (товар ва хизматларнинг) унификациялашган номлари ва идентификациялаш кодлари интеграция қилиш.

Қарор билан Маҳсулотлар (товарлар ва хизматлар) ягона электрон миллий каталоги тасдиқланди. Каталог қулай бўлиб, унда 900 дан ортиқ маҳсулот тартиб рақами, товар ва хизматлар гуруҳлари, таснифлаш кодлари ва ўлчов бирликлари мавжуд. Ушбу каталогни кенгайтириш ва тўлдириб бориш ҳуқуқи ДСҚга берилди.

Эслатиб ўтамиз, Вазирлар Маҳкамасининг 1-сон қарорига мувофиқ, ҳисобварақ-фактуралар товарлар (хизматлар)нинг Ягона электрон миллий каталоги бўйича идентификация коди ва товарлар (хизматлар) штрих коди билан тўлдирилади.

Маҳсулотларни (товар ва хизмат) идентификация кодлари ва штрих-кодлари онлайн-НКМ ёки виртуал кассалар томонидан берилган чекларда акс эттирилган бўлиши лозим. Ушбу норма қарорда ҳам назарда тутилган.

Тадбиркорлик субъектлари ўртасида электрон шартномалар тузиш реал вақт режимида махсус QR-код бириктириш билан амалга оширилади. Улар асосида электрон ҳисобварақ-фактуралар шакллантирилади. Бунда рўйхатдан ўтказиш ихтиёрий ва хизматлар бепул.

Электрон ҳужжат айланиш тизимида товар-моддий бойликларни олиш учун электрон шаклда ишончнома расмийлаштиришда электрон рақамли имзо керак бўлади.

Шунингдек, ишончномаларга ҳам QR-код ва ID рақам берилади. Улар ёрдамида электрон ҳисобварақ-фактуралар тизимида ишончномаларнинг ҳақиқийлигини текшириш ва керакли маълумотларни олиш имкони мавжуд. шунингдек, бизнес юритишда ортиқча харажатларни сезиларли даражада қисқартиради.

Жорий этилаётган ҳар учала хизмат билан солиқ қонунчилиги талабларини бажариш янада тезлашади ва қулайлашади.

Мақолани улашинг

Ўхшаш янгиликлар