Юаннинг мустаҳкамланиши Хитой экспортчилари фойдасини камайтирмоқда (Reuters)
Йил бошидан буён юаньнинг АҚШ долларига нисбатан 5 фоизга, еврога нисбатан эса 9 фоизга мустаҳкамланганига қарамай, Халқаро валюта жамғармаси (ХВЖ) ва Европа Иттифоқи мамлакатлари Хитой валютаси ҳали ҳам сезиларли даражада паст баҳоланган деб ҳисобламоқда. ХВЖ баҳолашича, юаннинг реал самарали алмашув курси мувозанат даражасидан 17,3-25,3 фоизга паст.
Юаннинг мустаҳкамланиши Хитой экспортчиларининг рентабеллигини пасайтирмоқда. Ҳисоб-китобларга кўра, Хитой компаниялари ҳар 100 доллар тушумдан ўртача 4,9 доллар соф фойда олади. Хорижий рақобатчиларда эса бу кўрсаткич 8,9 долларни ташкил этади. Франциянинг Natixis молиявий гуруҳи баҳолашича, қуёш ва шамол энергетикаси, электромобиллар, аккумуляторлар ҳамда яримўтказгичлар ишлаб чиқаришда рентабеллик атиги 2 фоизни ташкил этган.
Хитой Халқ банки юаннинг мустаҳкамланишини чеклаш чораларини кўрмоқда. Goldman Sachs прогнозларига кўра, юаннинг янада қимматлашиши Хитой экспортининг рақобатбардошлигини пасайтириши ва саноат соҳасида бандликка салбий таъсир кўрсатиши мумкин.
Испания қайта тикланувчи энергетикани ривожлантириш ҳисобига 26 млрд доллар тежади (IEA)
Халқаро энергетика агентлиги (IEA) маълумотларига кўра, Испания 2011-2024 йилларда қуёш ва шамол энергетикасини ривожлантириш ҳисобига табиий газ импорти харажатларини 26 млрд долларга қисқартирди.
Сўнгги 10 йилда қайта тикланувчи энергия манбаларининг ўрнатилган қуввати 2 баробардан зиёдга ошиб, 119 ГВтга етди. Иссиқхона газлари чиқиндилари эса 20 фоизга камайди. Қайта тикланувчи энергетиканинг ривожланиши электр энергиясининг улгуржи нархларини пасайтирди ва мамлакатнинг жаҳон бозоридаги ёқилғи нархлари ўзгаришига боғлиқлигини камайтирди.
IEA Испанияга саноат корхоналари ва аҳолининг электр энергиясидан фойдаланишини рағбатлантириш мақсадида электр энергиясига солиқларни камайтириш, энергияни сақлаш қувватларини кенгайтириш ҳамда амалдаги ядро реакторларидан фойдаланиш муддатини узайтириш имкониятини кўриб чиқишни тавсия этмоқда. Испания 2035 йилгача мамлакатдаги барча бешта атом электр станциясини ёпишни режалаштирган.
Хитой хорижда фаолият юритаётган компанияларга нисбатан коррупцияга қарши талабларни кучайтирмоқда (Xinhua)
Хитой трансчегаравий коррупцияга қарши курашиш тўғрисидаги янги қонунни қабул қилди. Қонун хорижда фаолият юритаётган Хитой компаниялари устидан назоратни кучайтириш ва коррупцияга оид жиноятларни тергов қилишда халқаро ҳамкорликни кенгайтиришни назарда тутади.
Қонунга мувофиқ, компаниялар коррупция хавфи даражасидан келиб чиқиб, коррупцияга қарши курашиш бўлинмаларини ташкил этиши ва масъул ходимларни тайинлаши шарт. Шунингдек, хориждаги қидирувда бўлган шахсларни аниқлаш, ноқонуний равишда чет элга олиб чиқилган активларни қайтариш ва тижорат сирларини ҳимоя қилиш чоралари белгиланган.
2025 йилда Хитойда трансчегаравий коррупцияга оид 505 та иш тергов қилинган, хориждан қидирувда бўлган 963 нафар шахс қайтарилган. 2025 йил якунига кўра, Хитой инвесторлари 190 та мамлакатда 50 мингдан ортиқ корхона ташкил этган.
Микросхемаларни илғор йиғиш технологияларига инвестициялар 2026 йилда 28 млрд долларга етади (Reuters)
Сунъий интеллект процессорларига талабнинг ортиши микросхемаларни илғор йиғиш технологияларига инвестицияларни оширмоқда. Ушбу технология асосида процессорлар ва хотира чиплари ягона юқори унумдор модулга жамланади. Бу маълумотларни қайта ишлаш тезлигини ва ҳисоблаш самарадорлигини оширади.
Прогнозларга кўра, 2026 йилда ушбу соҳага капитал қўйилмалар 28 млрд долларни ташкил этади. Илғор йиғиш технологияларидан олинадиган даромад илк бор микросхемаларни анъанавий йиғиш сегменти даромадидан ошиши кутилмоқда.
Бозорда Тайваннинг TSMC компанияси етакчилик қилмоқда. Nvidia Тайваннинг SPIL компанияси ишлаб чиқариш қувватларини кенгайтиришга инвестиция киритмоқда. Powertech Technology Сингапурда янги ишлаб чиқариш корхонасини ташкил этиш учун 400 млн доллар сармоя йўналтирмоқда. Корхонани 2028 йилда ишга тушириш режалаштирилган. AMD эса Тайваннинг яримўтказгичлар саноатига, жумладан, микросхемаларни илғор йиғиш технологияларига 10 млрд доллар инвестиция киритишини эълон қилди.
Изоҳ қолдириш