Жаҳон матбуоти шарҳи

Гендер тенглиги компанияларнинг 70 фоизида бизнес кўрсаткичларининг яхшиланишига хизмат қилмоқда, бироқ уни таъминлашга қаратилган чора-тадбирлар қисқармоқда (International Labour Organization)

Халқаро меҳнат ташкилотининг (ХМТ) «Бизнес ва бошқарувда аёллар» номли тадқиқотига кўра, компанияларнинг 70 фоизи гендер тенглигини таъминлашга қаратилган чора-тадбирлар натижасида бизнес кўрсаткичлари яхшиланганини қайд этган. Шу билан бирга, бундай дастурларни жорий этаётган корхоналар улуши 2018 йилдаги 37,4 фоиздан 2025 йилда 26,5 фоизга камайган.

99 та мамлакатдаги 12 мингта компанияни қамраб олган тадқиқот натижаларига кўра, дунё бўйича раҳбарлик лавозимларида ишлаётган аёллар улуши 2000–2025 йилларда 24,5 фоиздан 30,5 фоизга ошган. Шунингдек, директорлар кенгашига аёллар раислик қиладиган компаниялар улуши 2013–2025 йилларда 13 фоиздан 31 фоизга етиб, икки баравардан зиёд кўпайган.

Бразилия COP30 якунларини сарҳисоб қилиб, COP31 арафасида ўз ҳаракатлар режасини тақдим этди (Reuters)

Бразилия БМТнинг иқлим ўзгариши бўйича COP30 конференциясига раислигини якунлаб, йўл хариталарини тақдим этди (навбатдаги COP31 конференцияси 9 ноябрь куни Туркияда бўлиб ўтади). Режада 2028 йилга қадар энергетик ўтиш бўйича миллий стратегияларни ишлаб чиқиш ҳамда 2031–2033 йилларда қазилма ёқилғи турларини муқобил энергия манбалари билан алмаштириш назарда тутилган.

2025 йилда жаҳон бўйича қайта тикланувчи энергия манбаларининг умумий ўрнатилган қуввати 692 ГВтга ошиб, 5 149 ГВтга етган. Бироқ ушбу ўсиш асосан энергияга бўлган қўшимча талабни қопламоқда, қазилма ёқилғилар ўрнини эса босмаяпти.

Ўрмонларни муҳофаза қилиш учун ажратиладиган йиллик молиялаштириш ҳажмини 2030 йилга қадар 84,5 млрд доллардан 300 млрд долларга ошириш таклиф этилмоқда.

Жаҳон олтин кенгаши инвестицион талаб бўйича прогнозини пасайтириб, марказий банкларнинг олтин харидлари бўйича баҳосини оширди (World Gold Council)

Жаҳон олтин кенгашининг (WGC) «2026 йил III чорагида олтинга бўлган жаҳон талаби тенденциялари» номли ҳисоботига кўра, 2026 йилда олтинга инвестицион талабнинг ўсиши бўйича прогноз икки бараварга, 400 тоннадан 200 тоннага пасайтирилган.

III чоракда инвестицион талаб ўтган йилнинг мос даврига нисбатан 14 фоизга камайиб, 479 тоннани ташкил этган. Олтин қуймалари ва тангалари хариди 19 фоизга қисқариб, 268 тоннага тушган. Олтинга ихтисослашган биржа инвестиция фондларига (ETF) соф олтин кирими 211 тоннани ташкил этган.

Шу билан бирга, марказий банкларнинг олтин харидлари 42 фоизга ошиб, 321 тоннага етган. Жорий йилнинг тўққиз ойида харидлар ҳажми 675 тоннани ташкил этган. WGC прогнозига кўра, йиллик харидлар 848 тоннага етиши ва 2025 йил даражасида бўлиши кутилмоқда.

Заргарлик буюмлари ишлаб чиқариш учун олтин истеъмоли 17 фоизга камайиб, 313 тоннани ташкил этган. Бу 2000 йилдан буён III чорак учун қайд этилган энг паст кўрсаткич ҳисобланади.