2020 йилдаги Мурожаатномада бажарилган вазифалар

2020 йилдаги Мурожаатномада бажарилган вазифалар

Ўзбекистон Республикаси Президенти Шавкат Мирзиёев 2020 йил 24 январь куни Tashkent City конгресслар залида Олий Мажлисга Мурожаатномани ўқиб эълон қилди.

Aнъанавий равишда декабрга тўғри келадиган нутқ январь ойи бошида якунланган парламент сайловлари туфайли қолдирилди.

Бу Президентнинг 2016 йилда сайланганидан буён учинчи мурожаатидир ва Ўзбекистон тарихида биринчи марта жонли эфирда намойиш этилди.

Президент 2020 йилни “Илм, маърифат ва рақамли иқтисодиётни ривожлантириш йили” деб эълон қилди. Давлатимиз раҳбари ўз нутқида мамлакат ҳаётининг барча соҳаларига тўхталиб, келгуси йил учун аниқ вазифаларни қўйиб, кўрсатмалар берди. Иқтисодий тадқиқотлар ва ислоҳотлар маркази экспертлари томонидан тайёрланган Мурожаатномани таҳлил қилиш шуни кўрсатадики, Ўзбекистон Президенти халқни ташвишга солаётган муаммолар ҳақида очиқ ва ошкора гапиришга тайёрлиги асосида ҳукуматнинг фуқаролар билан ўзаро ҳамкорлигини шакллантиради. Давлатимиз раҳбари ўз Мурожаатномасида бир қатор муҳим баёнотлар билан чиқди. Хусусан, камбағаллик ва коррупция каби долзарб муаммоларни очиқ ва ошкора кўтарди, "Рақамли Ўзбекистон-2030" дастури ишлаб чиқилишини эълон қилди, Евроосиё иқтисодий иттифоқи билан ҳамкорлик қилиш билан боғлиқ масалалари ва фуқаролик масаласига алоҳида тўхталиб ўтди.

Жорий йил якунларини сарҳисоб қилар эканмиз, пандемия шароитида оғир эпидемиологик ва иқтисодий вазиятга қарамай, Мурожаатномада белгиланган вазифалар ҳал қилинди, деб айтишимиз мумкин.

Таълимдаги рақобат

“Мамлакатимизда илм-фанни янада равнақ топтириш, ёшларимизни чуқур билим, юксак маънавият ва маданият эгаси этиб тарбиялаш, рақобатбардош иқтисодиётни шакллантириш борасида бошлаган ишларимизни жадал давом эттириш ва янги, замонавий босқичга кўтариш мақсадида юртимизда 2020 йилни “Илм, маърифат ва рақамли иқтисодиётни ривожлантириш йили”, деб эълон қилишни таклиф этаман деди Президент Мурожаатномада.

2020 йил 6 ноябрда ўқув жараёнининг деярли барча жиҳатларини қамраб олган “Ўзбекистоннинг янги тараққиёт даврида таълим-тарбия ва илм-фан соҳаларини ривожлантириш чора-тадбирлари тўғрисида” Президент фармони чиқди. Кўпгина бандлар бўйича туб қарорлар қабул қилинди.

2020 йил 1 ноябрдан бошлаб синф раҳбарлиги учун қўшимча тўлов 1,5 баравар оширилди. 2021 йил 1 январдан олис ҳудудларда жойлашган бюджет ташкилотларига бошқа ҳудудлардан ишлашга келган олий маълумотли мутахассисларга БҲМнинг 50 бараварида бир марталик бошланғич ёрдам пули ва ижарада турганлик учун БҲМнинг 2 бараварида ҳар ойлик пул компенсацияси берилади.

Фармонда 2021 йил 1 мартгача қадар Миллий ўқув дастури ишлаб чиқилиши келтирилган. 2022/2023 ўқув йилига қадар ўқувчилар билимини баҳолаш жараёнини рақамлаштириш ва шаффофлигини таъминлаш мақсадида барча умумтаълим муассасаларида «Электрон кундалик» дастурини жорий қилинади.

Тошкент шаҳри ва вилоят марказларининг бир қатор таълим муассасаларини хусусий сектор вакилларига 5 йил муддатга (кейинчалик узайтириш ҳуқуқи билан) ишончли бошқарувга ўтказиш бўйича эксперимент тасдиқланди.

Фармон таълим соҳасида соғлом рақобатни рағбатлантиради. Хусусан, халқаро фан олимпиадаларида ғолибликни қўлга киритган ўқувчиларни тайёрлаган умумтаълим муассасаларининг ўқитувчиларига бош ўқитувчи малака тоифаси берилади. Шунингдек, умумтаълим муассасаларининг бўш директор лавозимлари учун ҳудудий халқ таълими бошқармалари киритган номзодлар халқ депутатлари туман (шаҳар) Кенгашлари томонидан танловдан ўтказилади, танловда тегишли умумтаълим муассасаси кўрсаткичларини келгуси 3 йилда юқори даражага олиб чиқиш бўйича ўз дастури билан иштирок этади ва йил якуни бўйича халқ депутатлари туман (шаҳар) Кенгашлари ва жамоатчилик вакилларига 3 йиллик дастурнинг ижроси юзасидан ҳисобот беради.

2021/2022 ўқув йилидан бошлаб умумтаълим муассасалари битирувчилари ўз иқтидори ва қизиқишларига мос касбни танлаб олиши, меҳнат бозорида муносиб ўрнини топиши, касбий фаолиятида муваффақиятга эришиши учун «Касбга йўналтириш тизими» ва амалиётга йўналтирилган таълим дастурларини жорий этиш мақсадида профессионал таълим муассасаларида дуал таълим тизими жорий этилади.

Миллий рейтингда сўнгги 3 йил давомида доимий равишда биринчи 3 та ўриндан бирини эгаллаб келаётган олий таълим ташкилотларига олий маълумотли кадрлар тайёрлаш бўйича академик ва молиявий мустақиллик берилади ҳамда мустақиллик мезонлари Европа университетлари ассоциацияси стандартларига мувофиқ қабул қилинади.

Рақамли Ўзбекистон

“2020 йилда рақамли иқтисодиётни ривожлантириш бўйича туб бурилиш қилишимиз керак. Биринчи навбатда, қурилиш, энергетика, қишлоқ ва сув хўжалиги, транспорт, геология, кадастр, соғлиқни сақлаш, таълим, архив соҳаларини тўлиқ рақамлаштириш лозим. Ўтган йили барча шаҳар ва туман марказларини юқори тезликдаги Интернетга улаш ишлари якунланганини ҳисобга олиб, яқин 2 йилда барча қишлоқ ва маҳаллаларни ана шундай тезкор Интернет билан таъминлашимиз керак. Бу вазифаларни кўзда тутган ҳолда, “Рақамли Ўзбекистон – 2030” дастурини ишлаб чиқишни икки ой муддатда якунлаш лозим, - деди Президент Мурожаатномада.

2020 йил 5 октябрда Президентнинг “Рақамли Ўзбекистон – 2030” стратегиясини тасдиқлаш ва уни самарали амалга ошириш чора-тадбирлари тўғрисида”ги Президент Фармони чиқди, бу стратегия ҳамда уни амалга ошириш бўйича “Йўл харитаси”ни тасдиқлади.

"Рақамли Ўзбекистон - 2030" стратегияси доирасида ҳудудларни ижтимоий-иқтисодий ривожлантиришнинг турли соҳаларида 400 дан ортиқ ахборот тизимлари, электрон хизматлар ва бошқа дастурий маҳсулотлар жорий этилади. Рақамли технологияларни кенг жорий этиш телекоммуникациялар, коммунал хизматлар, иқтисодиётнинг реал сектори, соғлиқни сақлаш, давлат кадастри ва бошқа соҳаларда кўзда тутилган.

Стратегия рақамли иқтисодиёт ва электрон ҳукумат соҳасида ягона масъул органни яратишни, шунингдек ҳукумат, вазирликлар ва идоралар ва маҳаллий ўзини ўзи бошқариш органларида рақамли технологиялар ва электрон ҳукумат бўйича раҳбар ўринбосарлари лавозимларини жорий этишни назарда тутади.

Электрон ҳукуматнинг техник инфратузилмасини такомиллаштириш давлат органлари ва ташкилотлари фаолиятидаги очиқлик ва шаффофликни таъминлайди, аҳолининг электрон иштирок этиш даражасини оширади, ахборот хавфсизлигини таъминлайди ва ахборот ресурслари ва тизимларини ҳимоя қилади.

Тасдиқланган Стратегияни амалга ошириш инсон капиталини ривожлантириш ва кадрлар тайёрлаш ва қайта тайёрлаш тизимини такомиллаштириш, давлат хизматларини рақамлаштириш ва ахборот экотизимини ривожлантиришга ёрдам беради. 2021 йил 1 августдан бошлаб барча мажбурий давлат тўловлари, шу жумладан божлар, йиғимлар ва жарималар онлайн тарзда амалга оширилади.

Камбағалликка қарши кураш

Камбағаллик - бу илгари расмий даражада яширилган Ўзбекистондаги энг оғриқли муаммолардан бири, аммо Президент бу ҳақиқатни очиқ ва ошкора тан олди. “Турли ҳисоб-китобларга кўра, улар тахминан 12-15 фоизни ташкил этади, деди Шавкат Мирзиёев. - Бу ўринда гап кичкина рақамлар эмас, балки аҳолимизнинг 4-5 миллионлик вакиллари ҳақида бормоқда".

Камбағалликка қарши курашиш учун 700 миллион доллар ажратиш режалаштирилган эди, аммо Президентнинг сўзларига кўра, вазиятни фақат пул тарқатиш билан ҳал қилиб бўлмайди. "Камбағалликни камайтириш – бу аҳолида тадбиркорлик руҳини уйғотиш, инсоннинг ички куч-қуввати ва салоҳиятини тўлиқ рўёбга чиқариш, янги иш ўринлари яратиш бўйича комплекс иқтисодий ва ижтимоий сиёсатни амалга ошириш, демакдир", деди Президент. "Шунинг учун Жаҳон банки, Бирлашган Миллатлар Ташкилотининг Тараққиёт дастури ва бошқа халқаро ташкилотлар билан бирга Камбағалликни камайтириш дастурини ишлаб чиқишни таклиф этаман."

Ушбу муаммони ҳал қилиш учун Президентнинг 2020 йил 26 мартдаги "Иқтисодий ривожланиш ва камбағалликни қисқартиришга оид давлат сиёсатини тубдан янгилаш чора-тадбирлари тўғрисида" ги фармони билан Иқтисодиёт ва саноат вазирлиги Иқтисодий тараққиёт ва камбағалликни қисқартириш вазирлигига айлантирилди ва унга Камбағалликни камайтириш дастурини ишлаб чиқиш топширилди.

Дастурни ишлаб чиқиш бўйича ишлар олиб борилмоқда. Иқтисодий тараққиёт ва камбағалликни қисқартириш вазирлиги томонидан Ўзбекистонда камбағалликни камайтириш бўйича концепция лойиҳаси ишлаб чиқилди. Камбағалликни ҳисоблаш мезонлари ва усуллари, уни камайтиришнинг самарали воситалари, муваффақиятли халқаро тажрибага асосланган камбағалликни енгишнинг узоқ муддатли стратегияси ишлаб чиқилмоқда. Шу билан бирга, Иқтисодий тадқиқотлар ва ислоҳотлар маркази камбағалликни камайтириш, аҳолининг камбағал ва муҳтож қатламларини қўллаб-қувватлаш бўйича пилот лойиҳани амалга оширди. Камбағалликни камайтириш бўйича янги лойиҳа Тошкент вилоятининг Бука ва Чиноз туманларида муваффақиятли синовдан ўтказилди.

Aммо мамлакатда пандемия билан боғлиқ бўлган камбағаллик муаммоси сезиларли даражада кескинлашди, бу эса аҳолини, айниқса, камбағал ва энг заиф гуруҳларни жадалроқ ижтимоий қўллаб-қувватлаш бўйича тезкор амалий ҳаракатлар зарурлигини келтириб чиқарди. Шу нуқтаи назардан, жорий йилда камбағалликка қарши курашиш ва коронавирус пандемиясининг аҳоли учун салбий оқибатларини юмшатиш энг долзарб масалага айланди.

Молия вазирлиги ҳузуридаги Инқирозга қарши жамғармасидан аҳолини ижтимоий қўллаб-қувватлаш учун -641 миллиард сўм ажратилди. 8 миллиондан ортиқ фуқарога қарийб 30 триллион сўм миқдорида имтиёз ва преференциялар берилди. Ижтимоий нафақа олувчилар сони 1,2 млн кишига етди. Махсус сўровнома асосида 583 минг "камбағал оила" моддий ёрдамга муҳтож эканлиги аниқланди ва уларга "Саховат ва кўмак" умумхалқ ҳаракати доирасида қарийб 1 трлн. сўмдан ортиқ миқдордаги кўмак берилди. Вақтинча бандлик бўйича жамоат ишлари фонди маблағлари ҳисобидан 230 мингга яқин ишсиз фуқаролар иш билан таъминланди. 33 мингдан ортиқ оилалар кам таъминланган оилаларнинг шахсий томорқаларини ривожлантириш ва қишлоқ хўжалиги кооперативларини ташкил этиш учун субсидиялар бериш механизми орқали таъминланди.

“Рўйхатга қўйиш” тизимини ислоҳ қилиш

Шавкат Мирзиёевнинг рўйхатга қўйиш тизимини ислоҳ қилиш бўйича таклифларни ишлаб чиқиш тўғрисидаги буйруғи Мурожаатноманинг энг кўп муҳокама қилинган бандларидан бири бўлди.

“30 йил давомида ўз фуқароларимизнинг оёғига кишан уриб келдик, деди Президент. – Шу боис, парламент ва ҳукумат 2020 йил 1 апрелга қадар прописка тизимини ислоҳ қилиш бўйича аниқ таклифларни ишлаб чиқиши лозим”. Ва 2020 йил 22 апрелда Президентнинг "Доимий прописка қилиш ҳамда турган жойи бўйича ҳисобга олиш тартибини ислоҳ қилиш чора-тадбирлари тўғрисида"ги фармони рухсат бериш хусусиятига эга бўлган доимий прописка қилиш тизимидан босқичма-босқич хабар бериш хусусиятидаги рўйхатдан ўтказиш тизимига ўтиш тўғрисида чиқарилди.

Ушбу фармонга мувофиқ, 2020 йил 1 апрелдан бошлаб, Тошкент шаҳри ва Тошкент вилоятида кўчмас мулкни олишда Ўзбекистон Республикаси фуқаролари учун ушбу ҳудудларда доимий яшаш жойи бўйича рўйхатга олинганлиги талаб қилинмайди. 1 сентябрдан бошлаб Ўзбекистон Республикаси фуқароларининг доимий яшаш ва вақтинча турган жойи бўйича рўйхатдан ўтмасдан истиқомат қилиш муддати 15 кун ҳисобланади, рўйхатга олишни расмийлаштириш бир кун ичида амалга оширилади. Ўзбекистон Республикаси фуқароларини доимий яшаш жойи бўйича рўйхатга олишда аввалги доимий яшаш жойидан рўйхатдан чиқиш тартиби бекор қилинади.

Фуқароликни олишнинг соддалаштирилган тартиби

Мурожаатномада давлат раҳбари минглаб фуқаролиги бўлмаган одамлар тез орада бу узоқ кутилган мақомни олишларига ваъда берди. 1995 йилгача Ўзбекистонга келган (тахминан 50 мингга яқин юртдошларимиз) ва шундан буён истиқомат қилаётган шахсларга Ўзбекистон Республикаси фуқаролиги автоматик тарзда берилади.

2020 йил 13 мартда “Ўзбекистон Республикасининг фуқаролиги тўғрисида”ги қонуннинг янги таҳрири эълон қилинди, бу маълум бир доирадаги шахсларга Ўзбекистон паспортини соддалаштирилган тартибда олиш имконини беради. Хусусан, 2020 йил 1 апрелдан бошлаб Ўзбекистонга 1995 йил 1 январга қадар Ўзбекистон ҳудудига кириб келган ва доимий пропискадан ўтган, чет давлат фуқаролигини қабул қилмаган ҳамда мазкур қонун кучга киргунига қадар фуқаролиги бўлмаган шахсга Ўзбекистонда яшаш гувоҳномаси асосида яшаб турган шахс истак билдирган тақдирда, Ўзбекистон фуқароси деб тан олинади. Худди шу асосда ота-онаси (ёлғиз ота-она) фуқаро сифатида тан олинган бола фуқароликка киради. Фуқароликни олиш учун тақдим этилган ҳужжатлар тақдим этилган кундан бошлаб 3 ой ичида кўриб чиқилади. Aриза берувчи фуқароликни Ички ишлар вазирлиги билан келишилган вилоят ички ишлар бошқармаси бошлиғининг хулосаси асосида олади.

Коррупцияга қарши кураш

Президент Шавкат Мирзиёев Мурожаатномада коррупция мавзусига тўхталиб, “Президент номига келиб тушаётган кўплаб мурожаатлар, матбуот ва ижтимоий тармоқлардаги чиқишлар" туфайли қатъий чоралар кўришга ундаганлигини айтди. "Бу ёвуз балонинг олдини олмасак, ҳақиқий ишбилармонлик ва инвестиция муҳитини яратиб бўлмайди, умуман, жамиятнинг бирорта тармоғи ривожланмайди", деди Президент.

2020 йил 29 июнда "Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида"ги Президент фармони чиқди. Фармон билан коррупциянинг олдини олиш ва унга қарши курашиш соҳасида давлат сиёсатини шакллантириш ва амалга ошириш учун масъул бўлган Ўзбекистон Республикасининг Коррупцияга қарши курашиш агентлиги ташкил этилди. Aгентлик фақат Ўзбекистон Республикаси Президентига бўйсунади, Ўзбекистон Республикаси Олий Мажлисининг палаталари олдида ҳисобот беради ва ўз фаолиятини бошқа давлат органлари, ташкилотлар ва уларнинг мансабдор шахсларидан мустақил равишда амалга оширади.

Aгентликнинг вазифалари қаторига норматив-ҳуқуқий ҳужжатлар ва уларнинг лойиҳаларини коррупцияга қарши экспертизаси самарадорлигини таъминлаш, давлат хизматчиларининг даромад ва мол-мулкини декларация қилиш тизими жорий этилиши ва самарали фаолият кўрсатишини ташкил этиш ва бошқалар киради.

Жамоатчилик палатасининг ташкил этилиши

"Жамоатчилик назоратини янада кучайтириш, давлат ва жамият ўртасида ўзаро яқин ҳамкорлик ўрнатиш мақсадида Ўзбекистон Республикаси Жамоатчилик палатасини ташкил этишни таклиф қиламан", деди Президент ўз мурожаатида.

Президентнинг Мурожаатномасида кўрсатилган “Жамият – ислоҳотлар ташаббускори” деган янги ғояни амалда қўллаш мақсадида 2020 йил 16 апрелда Президентнинг "Ўзбекистон Республикаси Президенти ҳузуридаги Жамоатчилик палатасини ташкил этиш тўғрисида"ги фармони чиқарилди. Республика палатаси билан бир қаторда Қорақалпоғистон Республикаси, вилоятлар ва Тошкент шаҳрининг минтақавий жамоатчилик палаталари ҳам ташкил этилди.

Давлат органлари билан муносабатларда жамоатчилик палаталари фаолиятининг белгиланган тартиби давлат ва жамият ўртасидаги ўзаро муносабатларни чуқурлаштириш учун катта аҳамиятга эга.

Жамоатчилик орасида алоҳида қизиқиш уйғотадиган, Ўзбекистон Республикаси Конституциясига ўзгартириш ҳамда тузатишлар киритиш тўғрисидаги таклифлар, мамлакат ижтимоий-иқтисодий ҳаётига оид ва жамоатчиликда алоҳида қизиқиш уйғотадиган ўта долзарб масалаларга доир норматив-ҳуқуқий ҳужжатлар лойиҳалари Жамоатчилик палатасига кўриб чиқиш учун юборилади.

Жамоатчилик палатаси ҳар йили Ўзбекистон Республикаси Президенти ва Ўзбекистон Республикаси Олий Мажлиси палаталарига фуқаролик жамиятининг ҳолати ва ривожланиш тенденциялари тўғрисида йиллик миллий маърузаларни тақдим этади. Ўзбекистон Республикаси Олий Мажлиси палаталари, Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар, туман (шаҳар) Кенгашларида Жамоатчилик палатаси ва ҳудудий жамоатчилик палаталари томонидан жамоатчилик учун долзарб бўлган масалалар юзасидан ўтказилган ўрганиш ва таҳлил натижаларини ҳар чоракда кўриб чиқиш амалиёти жорий этилади.

Давлат ҳокимияти органлари ўз фаолиятини Жамоатчилик палатаси ва минтақавий жамоат палаталари билан ўзаро ҳамкорликда олиб борадилар. Жамоатчилик палатаси ва минтақавий жамоатчилик палаталари аъзолари ҳар бир давлат органининг очиқ коллегиал йиғилишларида қатнашиш ҳуқуқига эга. Жамоатчилик палатаси ва минтақавий жамоатчилик палаталари ҳар бир давлат органида жамоатчилик кенгашининг таркибини шакллантиришда иштирок этади.

Шундай қилиб, давлат ҳокимияти ва бошқаруви органлари билан Жамоатчилик палаталари ўртасидаги ўзаро муносабатларнинг шаклланган механизми жойларда жамоатчиликнинг айрим муаммоларга муносабати тўғрисида ўз вақтида маълумот олиш, уларни ҳал қилишда жамоатчилик фикрини тўлиқ ҳисобга олиш имконини беради, бу эса мамлакатда демократик ўзгаришларни чуқурлаштиришда муҳим қадамдир.

Қишлоқ хўжалигида бозор тамойиллари

"Иқтисодиётимиз ривожини, аҳоли бандлиги ва даромадлари ўсишини таъминлайдиган энг муҳим соҳалардан бири бўлган қишлоқ хўжалигини стратегик ёндашувлар асосида тараққий эттириш зарур", деди Президент. – Мурожаат вазифалари қаторида пахта ва ғалла маҳсулотларини бозор тамойиллари асосида сотиб олиш тизимига босқичма-босқич ўтиш, ушбу маҳсулотларни харид қилиш учун давлат буюртмалари амалиётини бекор қилиш масаласи кўриб чиқилди.

2020 йил 6 мартда Президентнинг иккита Қарори чиқарилди. 2020 йил ҳосилидан бошлаб пахта хомашёсини ишлаб чиқариш бўйича давлат буюртмасини бекор қиладиган ва пахта хомашёси ишлаб чиқарувчиларига раёнлаштирилган пахтани бепул навларини тарқатиш ҳуқуқини берадиган "Пахтачилик соҳасида бозор тамойилларини кенг жорий этиш чора-тадбирлари тўғрисида" биринчи қарори қабул қилинди. 2020 йил ҳосилидан бошлаб, ғалла экинларини давлат буюртмаси асосида ишлаб чиқариш амалиёти босқичма-босқич бекор қилинишини ва 2021 йил ҳосилидан бошлаб, давлат томонидан белгиланадиган амалиётни белгилаган "Ғалла етиштириш, харид қилиш ва сотишга бозор тамойилларини кенг жорий этиш чора-тадбирлари тўғрисида"ги иккинчи қарор қабул қилинди. Ғалланинг Давлат хариди тўлиқ бекор қилинади ҳамда фермерлар ва бошқа корхоналар томонидан етиштириладиган ғалла барча истеъмолчиларга эркин нархларда сотилади.

Таъкидлаш жоизки, давлат буюртмасини бекор қилиш, пахтачилик ва ғалла ишлаб чиқаришда бозор тамойилларини жорий этиш иқтисодиёт тармоқларининг маъмурий ёндашувлари доирасида ўнлаб йиллар давомида энг кўп "сақланиб қолган" ислоҳотларни белгилайди, бу аслида тарихий воқеадир.

Бундан ташқари, жорий йилда пандемия шароитида аҳолининг озиқ-овқат хавфсизлигини таъминлаш бўйича кенг кўламли чора-тадбирлар амалга оширилди. Мева-сабзавотчилик соҳаси олдига 2020 йилда ишлаб чиқаришни сезиларли даражада ошириш вазифаси қўйилган бўлиб, унинг ечимига мева-сабзавотчилик маҳсулотлари ишлаб чиқаришга ихтисослашган 55 та туман, 86 та кластер ва озиқ-овқат маҳсулотларини ишлаб чиқариш бўйича 125 та кооперативлар жалб қилинган.

Aмалга оширилган ислоҳотлар ва озиқ-овқат хавфсизлиги бўйича қабул қилинган чора-тадбирлар туфайли қишлоқ хўжалиги маҳсулотларини ялпи ишлаб чиқариш жорий йилнинг 9 ойида 3,4 фоизга ошди. Деҳқончилик маҳсулотлари ишлаб чиқариш 4,3%, чорвачилик маҳсулотлари 2,3% га ошди. Гўшт ишлаб чиқариш 2,2%, сут 2,9%, ғалла 2,4%, сабзавот 2,7%, полиз маҳсулотлари 4,2%, мева ва резаворлар 3,9%, узум 3, 2%, балиқчилик 9,8%.

Ҳамкорлик бўйича кўрсатмалар

Мурожаатномада "Мустақил Давлатлар Ҳамдўстлиги ва Шанхай ҳамкорлик ташкилоти доирасида фаолиятимиз самарасини янада оширишимиз зарур " дейилган. Шавкат Мирзиёев Евроосиё иқтисодий иттифоқи билан ҳамкорлик масаласини ҳам эътибордан четда қолдирмади. "Ўзбекистон парламенти ва ҳукумати Ўзбекистон ва Евроосиё иқтисодий иттифоқи (ЕОИИ) ўртасидаги ўзаро ҳамкорлик масаласини ўрганиб чиқиши ва мазкур масалани атрофлича муҳокама қилиб, ўз зиммаларига масъулиятни олган ҳолда, асосланган хулосаларини айтишлари керак", деди Президент.

Жорий йилда Ўзбекистон биринчи марта Мустақил Давлатлар Ҳамдўстлигининг раиси сифатида фаолият кўрсатди. 18 декабрь куни Ўзбекистон Президенти Шавкат Мирзиёев раислигида Мустақил Давлатлар Ҳамдўстлиги Давлат раҳбарлари кенгашининг видеоконференция шаклида мажлиси бўлиб ўтди. Ўзбекистонга раислиги даврида МДҲни янада ривожлантириш концепцияси янгиланди ва уни амалга ошириш бўйича асосий чора-тадбирлар режаси ишлаб чиқилди. Саммитда хавфсизлик соҳасидаги ҳамкорликни тартибга солувчи қатор ҳужжатлар ишлаб чиқилди ва имзоланди.

Президент Шавкат Мирзиёев саммитдаги нутқида "Ўзбекистон умумий муаммоларни ҳал қилишда янги, ностандарт ва ўзаро манфаатли ёндашувларни биргаликда ишлаб чиқишга ва амалга оширишга тайёр" деди ва Ҳамдўстлик доирасида кўп қиррали ҳамкорликни кенгайтириш бўйича бир қатор таклифларни билдирди. "Мамлакатларимиз иқтисодиётини, савдо-сотиқ ва ҳамкорлик алоқаларини иложи борича тезроқ тиклаш устувор вазифадир", деди Президент.

10 ноябрь куни ШҲТ Давлат раҳбарлари кенгашининг 20-мажлиси видеоконференция шаклида бўлиб ўтди, унда Шавкат Мирзиёев бир қатор муҳим ташаббусларни илгари сурди. Президентнинг таъкидлашича, биринчи навбатда, иқтисодий соҳадаги ҳамкорликни мустаҳкамлаш масалалари алоҳида эътиборни талаб қилади. Пандемия туфайли тезлашган рақамлаштириш жараёнлари муҳим аҳамиятга эга. Президент томонидан ШҲТнинг рақамли саводхонликни ривожлантириш бўйича дастурини ишлаб чиқиш таклиф этилди, шунингдек, ҳозирги шароитда аҳолининг эҳтиёжманд қатламларини қўллаб-қувватлаш ва камбағалликни камайтиришга қаратилган қўшма саъй-ҳаракатларни йўналтириш муҳимлиги таъкидланди. Саммитдаги нутқи якунида Ўзбекистон Президенти келгуси йилда Шанхай ҳамкорлик ташкилотининг 20 йиллиги арафасида “ШҲТнинг замонавий халқаро муносабатлар тизимидаги роли” халқаро форумини ўтказишни таклиф этди.

ЕОИИ билан муносабатларга келсак, 29 апрелда Ўзбекистон ва ушбу ташкилот ўртасида кузатувчи мақомида ҳамкорлик қилиш имконияти Олий Мажлис қонунчилик палатаси депутатлари, 11 май куни эса Олий Мажлис парламентининг юқори палатаси (сенати) томонидан маъқулланди.

11 декабрь куни Ўзбекистон Президенти биринчи марта Евроосиё Иқтисодий Иттифоқи Олий Кенгашининг йиғилишида иштирок этди, йиғилиш давомида ушбу ташкилотга аъзо давлатлар раҳбарлари Ўзбекистон Республикасига ЕОИИда кузатувчи мақомини бериш тўғрисида қарор қабул қилдилар. Ўзбекистон раҳбари ўз нутқида ўзаро ҳамкорликнинг асосий йўналишларини белгилаб берди.

"Aввало, биз ишлаб чиқарувчиларимиз ўртасидаги саноат кооперациясини кенгайтиришни ривожлантиришдан манфаатдормиз. Aгар илгари биз саноатнинг айрим йўналишлари бўйича рақобатлашган бўлсак, бугун уларни муваффақиятли тўлдираяпмиз. Ишнинг яна бир йўналиши - маҳсулотларимизнинг учинчи томон бозорларига чиқиши учун транспорт йўлаклари ва логистика алоқаларидан янада самарали фойдаланиш.

Ўзбекистон ва ЕОИИга аъзо давлатларнинг транспорт коммуникациялари ва инфратузилмаси чуқур интеграциялашган ва ўзаро яқиндан боғланган.

Бундан ташқари, кенг Евроосиё минтақаси доирасидаги ўзаро манфаатли муносабатларга меҳнат ресурсларининг юқори даражадаги мобиллиги хосдир”, – дея ўз нутқида таъкидлади Шавкат Мирзиёев.

Шундай қилиб, Президентнинг 2020 йилги Мурожаатномасида белгиланган вазифалар, коронавирус пандемияси келтириб чиқарган барча қийинчилик ва муаммоларга қарамай, мақсадга мувофиқ ва изчиллик билан ҳал этилаётгани ва бу келгуси 2021 йилда янада муваффақиятли ривожланишнинг калитидир, деб таъкидлаш мумкин.

Зиеда Ризаева, Виктор Абатуров,

Иқтисодий тадқиқотлар ва ислоҳотлар маркази

Таржима: Латофат Бўриева,

Иқтисодий тадқиқотлар ва ислоҳотлар маркази

Мақолани улашинг

Ўхшаш янгиликлар

Сўнгги янгиликлар