Infografika: Oziq-ovqat mahsulotlari yetishtirishni ko‘paytirish orqali, bozorlarda narx-navo barqarorligini ta’minlash chora-tadbirlari

Infografika: Oziq-ovqat mahsulotlari yetishtirishni ko‘paytirish orqali, bozorlarda narx-navo barqarorligini ta’minlash chora-tadbirlari

Prezident Shavkat Mirziyoyev raisligida 15 aprel kuni oziq-ovqat mahsulotlarini ko‘paytirish orqali bozorlarda narx-navo barqarorligini ta’minlash, tadbirkorlik uchun qo‘shimcha shart-sharoitlar yaratish masalalari bo‘yicha videoselektor yig‘ilishi o‘tkazildi.

Ma’lumki, dunyoda sodir bo‘layotgan voqealar sababli oziq-ovqat mahsulotlari narxi o‘sib bormoqda. Masalan, oziq-ovqat mahsulotlarining jahon bozoridagi o‘rtacha narxlari mart oyida 2021 yilning shu davriga nisbatan 34 foizga oshdi. Yil boshidan bug‘doy narxi 20 foiz, makkajo‘xori 19 foiz, ozuqa donlari 20 foiz va o‘simlik yog‘i 23 foizga ko‘tarildi. Mamlakatimizda ham ayrim mahsulotlarning narxi sezilarli ravishda oshib ketish holatlari kuzatildi.

Bunday sharoitda ichki bozorda narx-navo barqarorligini ta’minlashning iqtisodiy chorasi oziq-ovqat mahsulotlari yetishtirish va ishlab chiqarishni ko‘paytirishdir. Shu bois bu yil yurtimizda 7 million 700 ming tonna bug‘doy, 23 million tonna meva-sabzavot yetishtirib, ichki bozorni mahsulotlar bilan uzluksiz ta’minlash maqsad qilingan.

Avvalo, yangi qo‘shilayotgan 300 ming gektardan ziyod yerdan samarali foydalanish zarurligi qayd etildi. Buning 80 ming gektari qisqartirilgan paxta va g‘alla maydonlari bo‘lib, 254 ming nafar aholiga ochiq tanlov asosida berilgan. Bu har bir tumanda qo‘shimcha 500 gektar ekin maydoni, degani.

Mahsulot yetishtirish uchun yana bir manba suv omborlari atrofidagi 100 ming gektardan ortiq yerlardir. Bu maydonlarga irrigatsiya tarmoqlari tortib, tadbirkorlarni jalb etib, mos keladigan ekinlar ekish choralari belgilandi.

Ilgari foydalanishdan chiqqan 135 ming gektar yerni qayta tiklash ham qishloq xo‘jaligi mahsulotlari yetishtirish uchun qo‘shimcha imkoniyat ekani ta’kidlandi.

Bugungi kunda aholi ixtiyorida 380 ming gektar tomorqa bor. Ularda meva-sabzavotlar yetishtirilsa, ham ro‘zg‘orga baraka, ham umumiy bozorimizga qo‘shimcha mahsulot kiradi. Buning uchun moliyaviy tizim ham bor: shu yil 21 fevralda tomorqa xo‘jaliklarida yetishtirilgan mahsulotlarni kafolatli xarid qilish bo‘yicha Vazirlar Mahkamasining qarori qabul qilingan.

Fermer, dehqon xo‘jaliklari va tomorqa yer egalari kengashiga tajribali mirishkorlar ishtirokida aholiga bozorbop ekinlar yetishtirishni o‘rgatish va ko‘maklashish bo‘yicha topshiriqlar berildi.

Bu boradagi eng katta muammo suv ta’minoti bo‘lishi mumkin. Shu bois, Suv xo‘jaligi vazirligiga har bir mahalla kesimida kanal va ariqlarni tozalash, suv ta’minoti og‘ir joylarda quduq qazish va nasos o‘rnatib, aholi tomorqalariga suv yetkazib berish vazifasi qo‘yildi. Bu ishlar uchun respublika byudjetidan 50 milliard so‘m, mahalliy byudjetlardan yana 50 milliard so‘mdan yo‘naltirilishi aytildi.

Boshoqli don va o‘simlik yog‘i xomashyosini ko‘paytirish choralariga alohida e’tibor qaratildi. Chetdan olib kelinadigan kungaboqar, soya va boshqa moyli ekinlar bo‘yicha bojxona imtiyozlari berish hamda qo‘shilgan qiymat solig‘idan ozod qilish taklifi bildirildi.


Maqolani ulashing

O'xshash yangiliklar