Инфографика: Ўзбекистоннинг Жанубий Осиё мамлакатлари билан савдоси

Инфографика: Ўзбекистоннинг Жанубий Осиё мамлакатлари билан савдоси

Сўнгги йиллар давомида Ўзбекистоннинг Жанубий Осиё мамлакатлари билан савдосидаги асосий ўзгаришларни Иқтисодий тадқиқотлар ва ислоҳотлар марказининг(CERR) инфографикасида кузатинг.

Тўрт йилда Ўзбекистоннинг Жанубий Осиё мамлакатлари билан савдо алоқаси 35% га ўсди.

2020 йилда Ўзбекистоннинг Жанубий Осиё мамлакатлари билан ташқи савдосининг умумий ҳажми 1,38 млрд. долларни ёки ташқи савдо умумий ҳажмининг 3,8% ни ташкил этди. Ўзбекистоннинг Жанубий Осиё мамлакатларига экспортининг ўсиши 21% ни ташкил этди. Импорт 23% га ошди.

Ўзбекистоннинг Жанубий Осиё мамлакатлари билан савдо айланмасида энг катта ҳажм Афғонистон - 56,2%, Ҳиндистон-32% ва Покистон-8,9% га тўғри келади. Малдив ороллари ва Непал билан савдо айланмаси кичик ҳажмни ташкил этади ва Бутан билан деярли савдо амалга оширилмайди.

Афғонистон билан савдо айланмасида асосий улушни (99,7%) Ўзбекистон экспорти эгаллайди, бу эса Афғонистонни фойдали савдо-иқтисодий ҳамкор қилиб қўяди. Ўзбекистоннинг Афғонистонга экспортидаги асосий улуши электр энергияси (экспорт ҳажмининг 30%), буғдой уни ва дуккакли экинлар (24,1%), шунингдек, металлургия маҳсулотларидир.

Ҳиндистон Ўзбекистоннинг Жанубий Осиё мамлакатлари билан савдо айланмаси бўйича иккинчи ўринда туради. Шу билан бирга, Ҳиндистон билан ўзаро савдода Ўзбекистон экспортининг ҳажми асосан Ўзбекистонда харидоргир фармацевтика маҳсулотлари билан ифодаланадиган импортдан сезиларли даражада ортда қолмоқда.

Ўзбекистоннинг Ҳиндистонга экспорти асосан тўқимачилик маҳсулотлари (улуши 13,6%), қимматбаҳо металлар (8,4%), озиқ-овқат маҳсулотлари (5,8%) ва бошқалардан иборат.

Ўзбекистоннинг Ҳиндистондан "фармацевтика маҳсулотлари" харидларининг импортдаги улуши 47% ўсиши ҳисобига ошиб бормоқда, 28,6% улуши билан иккинчи ўринни "механик ускуналар" эгаллайди.

Шу билан бирга, Ҳиндистон билан фармацевтика соҳасида сармоявий ҳамкорлик муваффақиятли ривожланмоқда, "Андижон-Фарм" ЭИЗ ҳудудида қўшма корхоналар ташкил этилди. Ҳиндистоннинг Тошкентдаги "Амити" ва Андижондаги "Шарда" университетларининг IT-мутахассисларни тайёрлаш бўйича филиаллари очилди. Ҳозирги кунда Ўзбекистон ва Ҳиндистон ўртасида "имтиёзли савдо битими" тузиш техник-иқтисодий асослари ўрганилмоқда.

Сўнгги йилларда Ўзбекистон ва Покистон ўртасидаги савдо-иқтисодий ҳамкорлик фаол ривожланмоқда, Покистон бозорига тайёр, асосан, қишлоқ хўжалиги маҳсулотларни экспорт қилиш ҳажми ошди.

Ўзбекистоннинг Покистонга экспорти таркибида: озиқ-овқат маҳсулотлари 81% ни; тўқимачилик маҳсулотлари-10,5% ни; хизматлар-3,5% ни ташкил этади.

Покистондан импорт таркибида: фармацевтика маҳсулотлари 37% ни ташкил этади; озиқ-овқат маҳсулотлари (картошка, цитрус мевалар, гуруч ва бошқалар.) – 36%, транспорт хизматлари – 10%; - кимёвий маҳсулотлар-4,5%.

Бундан ташқари, Ўзбекистон Покистон билан транспорт соҳасидаги ҳамкорликни кенгайтириш ва «Мозори – Шариф – Қобул – Пешавар» темир йўл линиясини қуриш бўйича юқорида қайд этилган лойиҳани биргаликда амалга оширишдан манфаатдор.

Мақолани улашинг

Ўхшаш янгиликлар