2026 йилда Хитой ички бозорида енгил автомобиллар савдоси 22 фоизга, яъни 23,7 млн донадан 18,5 млн донагача қисқариши мумкин. 2027 йилда эса бозорнинг аста-секин тикланиши ва савдо ҳажмининг 2 фоизга ўсиши кутилмоқда.
Хитой енгил автомобиллар ассоциацияси бош котиби Цуй Дуншунинг баҳолашича, қисқа муддатли салбий омилларнинг таъсири камайиши, нархлар босимининг пасайиши ва автомобиль моделлари турларининг кенгайиши талабнинг тикланишига хизмат қилади. Шу билан бирга, автомобиль ишлаб чиқарувчиларнинг рақобатбардошлик даражасидаги тафовутлар янада ортиши кутилмоқда.
Thomson институти тадқиқотига кўра, савдо соҳасидаги мутахассисларнинг 75 фоиздан ортиғи АҚШ тариф сиёсатидаги ўзгаришлар узоқ муддатли хусусиятга эга деб ҳисоблайди.
2025 йил давомида АҚШнинг божхона қоидалари қарийб 50 марта ўзгарган, Хитойнинг айрим товарларига нисбатан божхона божлари ставкалари эса 145 фоизгача етган.
Компаниялар учун учта ҳаракат йўналиши қайд этилган: 1) сотиш нархларини ошириш; 2) қўшимча харажатларни вақтинча ўз фойда маржаси ҳисобидан қоплаш; 3) маҳсулотлар ва етказиб бериш тузилмасини ўзгартириш.
Бунда тариф чекловлари ҳатто бутловчи қисмларни ички бозордан харид қиладиган корхоналарга ҳам таъсир кўрсатмоқда. Савдо сиёсатидаги беқарорлик шароитида компаниялар барча маҳсулотлар нархини бир хил даражада ошириш ўрнига, харажатлар, рақобат муҳити ва харидорлар талабини ҳисобга олган ҳолда нарх бўйича қарорларини тез-тез қайта кўриб чиқиши зарур.
АҚШнинг энг йирик табиий газ ишлаб чиқарувчиси EQT газ қазиб олувчи Range Resources компаниясини сотиб олишини эълон қилди. Бирлашган компаниянинг қарз мажбуриятларини ҳисобга олган ҳолдаги қиймати 50 млрд доллардан ошади.
Бирлашиш натижасида АҚШда кунлик қазиб олиш ҳажми табиий газ эквивалентида 9 млрд куб футдан ошадиган энг йирик вертикал интеграциялашган табиий газ ишлаб чиқарувчи компания ташкил этилади.
Битим маълумотларни қайта ишлаш марказлари томонидан табиий газга талаб ортиши ва сунъий интеллект инфратузилмаси ривожланиши шароитида амалга оширилмоқда. EQT баҳолашича, бирлашиш натижасида йилига 325 млн доллар тежалади. Битимни 2027 йилнинг I чорагида якунлаш кутилмоқда.
Изоҳ қолдириш