Яширин иқтисодиётни қисқартириш ва фискал тизимни такомиллаштириш мақсадида солиқ маъмуриятчилигини тубдан янгилашни назарда тутувчи Президент Қарори қабул қилинди.
2026 йил январь ойидан бошлаб Иқтисодиёт ва молия вазирлиги томонидан «Очиқ бюджет» ахборот порталида «Жисмоний шахслар солиқлари ҳисобидан харажатлар» модули ишга туширилади.
Бу ёндашув Буюк Британия ва АҚШ каби мамлакатларда қўлланилаётган энг илғор халқаро амалиётларга мос келади. Ушбу мамлакатларда бу каби воситалар бюджет маълумотларининг очиқлигини ошириш ва фуқароларнинг давлат институтларига бўлган ишончини мустаҳкамлаш учун қўлланилади.
Бу ҳар бир фуқарога ўзи тўлаган солиқлар (Жисмоний шахслардан олинадиган даромад солиғи, мол-мулк солиғи ва ер солиғи) миқдори, шунингдек, ушбу маблағлар қайси бюджет йўналишларига сарфлангани ҳақида ахборот олиш имконини беради.
Агар бир ой мобайнида фуқаро томонидан жами 1,4 миллион сўм солиқ тўланган бўлса, шундан жисмоний шахслар даромад солиғи - 528 минг сўм, ер солиғи - 574 минг сўм, мол-мулк солиғи - 346 минг сўмни ташкил этган. Шу маблағлар ҳисобидан бюджет харажатларининг асосий йўналишлари қуйидагича бўлган: таълим - 629 минг сўм, ижтимоий соҳа - 299 минг сўм, соғлиқни сақлаш - 273 минг сўм, қолган соҳалар — 247 минг сўм.
Ушбу модулнинг жорий этилиши фуқароларнинг давлат органларига бўлган ишончини оширишга, уларнинг ҳисобдорлигини мустаҳкамлашга ва аҳолининг бюджет маблағларидан фойдаланиш устидан назоратда иштирокини кенгайтиришга имкон беради.
Солиқ қўмитаси жисмоний шахслар томонидан тўланган солиқлар тўғрисидаги маълумотларни шахсий маълумотлар тўғрисидаги қонунчилик нормаларига риоя қилган ҳолда автоматик тарзда шакллантирилишини таъминлайди.
Амалга оширилаётган чора-тадбирлар солиқ маъмуриятчилигини такомиллаштириш, яширин иқтисодиётни қисқартириш ва фискал шаффофликни мустаҳкамлаш бўйича кенг кўламли ислоҳотларнинг бир қисмидир.
Изоҳ қолдириш