Таҳлил

Навоий вилоятининг 2022 йилнинг январ-декабр ойларида истеъмол нархлари индекси ва инфляция даражаси

8.02.2023 16:59
68

Иқтисодий тадқиқотлар ва ислоҳотлар марказининг Самарқанд филиали томонидан Давлат статистика қўмитаси ҳисоботига асосан 2022 йил январ-декабр ойларида Навоий вилоятида кузатилган истеъмол нарҳлари индекси ва инфляция даражаси ўзгариш динамикаси таҳлил қилинди.

Таҳлиллар шуни кўрсатмоқдаки, олдинги йиллардаги ўсиш кўрсаткичлари, шунингдек, дунёдаги жорий инқирозли вазият, маҳаллий бозорда кутилаётган тенденциялар ички истеъмол бозорлари нархлари индексига ўз таъсирини ўтказмоқда.

Ҳисоботга кўра, 2022 йилнинг январь-декабрь ойларида (ўтган йил декабр ойига нисбатан) Республика бўйича ўртача инфляция кўрсаткичи 12,3%, шундан озиқ-овқат маҳсулотлари 15,6%, ноозиқ-овқат маҳсулоти 10,7%, хизматлар кўрсатиш 8,3%ни ташкил этди.

Жумладан, ушбу даврда Навоий вилояти бўйича ўртача инфляция кўрсаткичи 12,1%ни (республика кўрсаткичи 12,3%га нисбатан 0,2 пунктга кам), шундан озиқ-овқат маҳсулотлари 15,1% (республика кўрсаткичи 15,6%га нисбатан 0,5 пунктга кам), ноозиқ-овқат маҳсулотлари 11,4% (республика кўрсаткичи 10,7% ёки 0,7 фоизга кўп) ҳамда хизматлар кўрсатиш 7,5% (республика кўрсаткичи 8,3% ёки 0,8 пунктга кам)ни ташкил этди.

Бунда, энг юқори ўсиш ресторанлар ва меҳмонхоналар хизматлари 18,6%га, соғлиқни сақлаш хизматлари 18,5%га, озиқ-овқат маҳсулотлари ва спиртсиз ичимликлар 15%га, маиший товарлар ва хизматлар, ижтимоий ва турли товарлар ҳамда бошқа хизматлар 13,8%га, уй рузғор асбоблари, маиший техника ва турар жойларга кундалик хизматлар кўрсатиш 12,2%га ва дам олиш, спорт ва маданият хизматлари 11,1%га ошган.

Шу билан бирга, ўтган даврда Навоий вилоятида айрим озиқ-овқат маҳсулотларнинг нархи сезиларли даражада ошган. Жумладан:

пиёз – 91,9% (республикада ўртача 97,8%)га;
буғдой уни – 48,5% (республикада – 44,5%)га;
буханка нони – 43,3% (республикада - 54,8%)га;
шакар – 42,4% (республикада – 43,6%)га;
тухум (10 донаси) – 27,6% (республикада – 28,3%)га;
барча навдаги гуруч – 23,1% (республикада – 24%)га;
сабзи – 23% (республикада – 22,7%)га.

Ўз навбатида, ушбу даврда ўтган йилнинг декабрига нисбатан картошка нархи 3,1%га арзонлашганлиги кузатилмоқда.

Бундан ташқари, Навоий вилоятида 2022 йилнинг декабрь ойида ўтган ноябрь ойга нисбатан истеъмол нархлари индекси 1,2%га, шундан озиқ-овқат маҳсулотлари 1,8%га, ноозиқ-овқат маҳсулотлари 0,5%га ва хизматлар 1,2%га ўсиши кўзатилган. Бунда, пиёз нархи 8,6%га, тухум (10 донаси) 6,1%га, картошка 2,3%га, сабзи 2%га ва барча турдаги гуручлар 1,8%га юқори ўсиш даражаси кўзатилган бўлса, шакар нарҳи 2,4%га, пахта ёғи (1 литр) 1,6%га ва кунгабоқар ёғи (1 литр) 1,3%га арзонлашган.

Юқоридагилардан келиб чиқиб, туман ва шаҳар ҳокимликлари аҳоли эҳтиёжлари учун етишмайдиган асосий турдаги истеъмол товарларини заҳирасини яратиш ва муқобил бозорлардан импорт қилиш (хусусий секторни жалб қилган ҳолда) орқали ички бозорни кафолатли таъминлаш ҳамда инфляция ушлаб туриш ва нарх-навони барқарор бўлишини таъминлаш юзасидан зарурий чора-тадбирларни амалга ошириш мақсадга мувофиқ ҳисобланади.

Нурмуродов Камолиддин

Иқтисодий тадқиқотлар ва ислоҳотлар маркази

Самарқанд филиали шуъбаси мудири