Одилбек Исоқов: 2021 йилда 5 трлн сўмлик давлат ғазначилик облигациялари ва 700 млн долларга халқаро евробондларни жойлаштириш режалаштирилган

«Умуман олганда, биз ҳам географиядан, ҳам инвесторларнинг турларидан мамнунмиз. Музокаралар давомида уларнинг аксарияти Ўзбекистонга нисбатан жуда илиқ сўзларни айтишди. Уларнинг баъзилари 2019 йил февраль ойида чиқарилган бизнинг евробондларни сотиб олишди. Ўйлайманки, улар ўз сармояларини узоқ муддатли истиқболга сармоя киритишга тайёрлар.

Яқин вақтгача халқаро молия институтларининг кредитлари доллар, евро ва япон иенасида жалб қилинган. Ўзбек сўмига жалб қилиш жуда яхши янгилик, чунки ҳозирда эмитентлар — Ўзбекистон ва бошқа маҳаллий компаниялар, агар улар келажакда халқаро евробондларни сўмга чиқаришса, валюта хавфига эга бўлмайди. Барча тўловлар сўмда амалга оширилгандан ва келажакда бир-икки ёки уч йил ичида улар бир хил миқдорда тўлашади. Долларга нисбатан эса, валюта курсининг ўзгаришига асосланиб, сўмдаги қиймат ошади ёки камаяди. Энди бу хавф эмитентларга эмас, инвесторларга тегишли», деди Одилбек Исоқов.

Ўзбекистоннинг ички қимматли қоғозлар бозори ҳозирда ривожланмагани, унда маҳаллий инвесторлар камлигини таъкидлаган Молия вазири вазирлик ҳар йили ички бозорда давлат ғазначилик облигацияларини чиқариш ҳажмини кўпайтириши ҳақида ҳам гапирди. Хусусан, 2018 йилда 600 млрд сўмлик облигациялар чиқарилган бўлса, бу йилга келиб — 4,8 трлн сўмга тенг ҳажмга эга облигациялар чиқарилган.

Тимур Ишметов: Ўзбекистон тарихида илк бор 2 триллион сўм ҳажмида суверен облигациялар Лондон фонд биржасида жойлаштирилди

«Давлат ғазнаси евробондларига талаб мавжуд ва биз таклифни кўпайтиряпмиз, аммо бу етарли эмас. Бизнинг якуний мақсадимиз, ушбу хорижий инвесторларни Ўзбекистонга жалб қилиш ва уларнинг давлат ғазначилик облигациялари, акцияларини ва ўзбек бозоридаги бошқа эмитентларнинг қимматли қоғозларини сўмга сотиб олишларини таъминлаш. Бу муайян вақтни талаб қиладиган жараён.

2021 йилда 5 трлн сўмлик давлат ғазначилик облигациялари, шунингдек 700 млн долларга халқаро евробондларни жойлаштириш режалаштирилган. Албатта, миқдорлар бюджет тақчиллиги, даромадлар, харажатлар ва бошқа омилларга қараб ўзгариши мумкин ва қарор мамлакат раҳбарияти томонидан қабул қилинади.

Евробондларни жойлаштиришдан тушадиган маблағлар бюджет камомадини қоплашга, шунингдек, 2021 йилда Ўзбекистонни барқарор ривожлантириш учун амалга ошириладиган қатор лойиҳаларни молиялаштиришга сарфланади", дейди вазир ўринбосари.

Ўзбекистоннинг ўн йиллик евробондларини АҚШ (54%), Буюк Британия (25%), Европа (17%) ҳамда Осиё ва Яқин Шарқ мамлакатларидан (4%) қарийб 200 сармоядор сотиб олган. Улар харидорларнинг 90 фоизини ташкил қилади. Жамғарма бошқарувчилари, суғурта компаниялари, суверен ва пенсия фондлари евробондларнинг асосий харидорлари бўлган.

Вазирлик матбуот хизматининг хабар беришича, сўнгги евробондларни жойлаштиришдан тушадиган маблағлар қуйидаги мақсадларга йўналтирилади:

• 15 та янги мактаб қуриш;
• 3 та тиббиёт муассасаси қуриш;
• 200 км сув таъминоти тизимлари ва канализация қуриш;
• 298 км автомобиль йўлларини таъмирлаш;
• Қийин аҳволга тушиб қолган аёлларга, ногиронлиги бўлган аёлларга моддий ёрдам кўрсатиш;
• Аёлларга оилавий ёки хусусий корхона ташкил қилишга имтиёзли кредитлар бериш;
• Оналик ва болаликни ҳимоя қилиш, оила институтини мустаҳкамлаш харажатларига сарфлаш;
• Қийин аҳволга тушиб қолган аёллар томонидан уй-жой сотиб олишда дастлабки тўловни қоплаш;
• Ишсизлик нафақасини тўлаш;
• Ишсизлар томонидан иссиқхона ташкил қилишга субсидия бериш;
• Туризм соҳасидаги мақсадларни дастурларни молиялаштириш.

Ушбу мақсадларга 1 трлн сўмдан ортиқ маблағ йўналтирилади.