Prezident xalq qabulxonasi: qonuniylik va adolat

Prezident xalq qabulxonasi: qonuniylik va adolat

Fuqarolar haq-huquqlarini himoya qilish, ularning murojaatlari bilan ishlashda bu prinsiplar eng asosiy mezon. Prezident Xalq qabulxonalari tomonidan Qashqadaryo viloyatida o‘tkazilgan ommaviy qabullarda ham mazkur tamoyillarga qat’iy amal qilindi.

Bunga Qashqadaryo viloyati sanitariya-epidemiologik osoyishtalik markazining davlatimiz rahbari nomiga yordam so‘rab murojaat yo‘llagan 21 nafar ishchi-xodimi ham o‘z hayoti misolida guvoh bo‘ldi. Gap shundaki, tegishli hujjatlarga muvofiq, 2020 yilda sanitariya-epidemiologik osoyishtalik markazi, uning hududiy bo‘linmalari, sanitariya-epidemiologiya inspeksiyasi tugatilib, o‘rniga sanitariya-epidemiologik osoyishtalik va jamoat salomatligi xizmatlari tashkil etilgan. Ish beruvchi tomonidan tashkilot tugatildi degan vajlar bilan 21 nafar ishchi-xodimning mehnat shartnomasi bekor qilinadi.

Aslida esa hujjatlarda ko‘rsatilganidek yangi tashkil etilgan tashkilot tugatilgan tashkilotning majburiyatlari va shartnomalari ijrosi bo‘yicha huquqiy voris deb hisoblanadi. Ommaviy qabulda fuqarolarning shu masaladagi arizalari Qarshi tumani sudining fuqarolik ishlari bo‘yicha sudlov hay’ati tomonidan sayyor sud tartibida ko‘rib chiqildi. Ishdan nohaq bo‘shatilgan 21 nafar kishi voris tashkilotga ishga tiklanib, ma’naviy zarar ham undirib berildi.

Ommaviy qabul jarayonlarida Qashqadaryo viloyati sudi jinoyat ishlari bo‘yicha sudlov hay’atining appelyasiya tartibidagi ochiq sud majlisida nohaq ayblanib, jarima jazosi tayinlangan 2 nafar shaxsga doir ish ham ko‘rib chiqildi. Ular 2015 yilda tazyiqlar ostida berilgan guvohliklar, asossiz ko‘rsatmalar bo‘yicha Surxondaryo viloyat sudining hukmi bilan jinoiy javobgarlikka tortilgan. Ya’ni, o‘zganing juda ko‘p miqdordagi mulkini o‘zlashtirish yo‘li bilan talon-taroj qilganlikda, pora olish va berishda vositachilikni amalga oshirganlikda ayblanib, sudlangan. Ularning murojaatlari asosida olib borilgan qo‘shimcha tekshiruvlar, sud jarayonlari natijasida aybsizligi o‘z isbotini topdi va reabilitatsiya qilish yo‘li bilan oqlandi.

Mirishkor tumani Ayzabod mahallasida istiqomat qiluvchi Yulduz Normurodova ham katta umidlar bilan ommaviy qabulga keldi. Ma’lum bo‘lishicha, uning to‘ng‘ich o‘g‘li 21 yoshida 15 yilga ozodlikdan mahrum etilgan. Ayni paytgacha jazo muddatining 6 yilini o‘tagan farzandiga yengillik berishni so‘rab, Oliy sudga murojaat qildi. Uning arizasi Oliy sudda kassatsiya tartibida ko‘rib chiqilishi ayolga umid baxsh etdi.

Qarshi shahridagi “Yuksalish Baraka omad” MChJ rahbari Bunyod Pattayevning jinoyat ishlari bo‘yicha Qamashi tumani sudining qaroridan norozi bo‘lib yozgan kassatsiya shikoyati esa Oliy sud tomonidan qabul qilinib, ko‘rib chiqilishi bildirildi.

Xo‘jalik yurituvchi sub’yektlar o‘rtasida yuzaga kelgan nizoli ishlarni ko‘rishda imkon qadar taraflarni kelishtirishga e’tibor qaratilmoqda. Savdo-sanoat palatasi Qashqadaryo viloyat boshqarmasining da’vogar Sho‘rtan gaz-kimyo majmuasi qoshidagi Qurilish-montaj-ta’mirlash boshqarmasi unitar korxonasi manfaatini ko‘zlab javobgar “RAVON STROY CITY” mas’uliyati cheklangan jamiyatidan 2 milliard 878 million so‘mdan ziyod mablag‘ni undirish yuzasidan sud tashabbusi bo‘yicha tomonlar o‘rtasida nizo bartaraf etilib, kelishuv bitimi tuzilishiga erishildi.

Xitoylik investor tomonidan kiritilgan da’vo arizasi esa qanoatlantirilib, investor ishtirokidagi O‘zbekiston-Xitoy qo‘shma korxonasi foydasiga 13 milliard 174 million so‘mdan ziyod mablag‘ni undirish to‘g‘risida iqtisodiy ishlar bo‘yicha sudlov hay’atining hal qiluv qarori qabul qilinib, investorning huquqlari tiklandi.

Fuqarolar murojaatlari yuzasidan ommaviy qabullarning o‘zida sayyor sudlar tashkil etilib, muammolar hal etildi. Jumladan, Qarshilik Gulsara Xudoyberdiyeva uzoq yillar xo‘jalikda sog‘uvchi bo‘lib ishlagan. Ammo ish haqiga doir hujjatlarda uning familiyasi noto‘g‘ri yozilgan. Natijada pensiya tayinlashda muammolar yuzaga kelgan. Uning arizasi o‘rganilib, hujjatlarda qayd etilgan ish haqi haqidagi ma’lumotlar Gulsara Xudoyberdiyevaga tegishli ekani fakti sud tartibida belgilandi. Xuddi shu tarzda 19 nafar fuqaroning pensiya ta’minoti bilan bog‘liq nizolari ham hal qilindi.

Qarshi shahrilik Dilafro‘z Xo‘jamurodova uyi yo‘qligi sababli 12 yildan buyon oilaviy yotoqxonada yashaydi. 4 nafar farzandi bor. Turmush o‘rtog‘i vafot etib, oila tashvishi, farzandlar tarbiyasi yolg‘iz o‘zining zimmasiga tushgan ayol ommaviy qabulga yashab turgan turar-joyini o‘z nomiga rasmiylashtirib berishda yordam so‘radi. Dilafro‘z Xo‘jamurodova hamda oilaviy yotoqxonada yashab kelayotgan yana 2 nafar ayolning murojaati ijobiy hal etildi.

Qishloq xo‘jaligi sohasida servis xizmati ko‘rsatuvchi korxonalardan birida huquqshunos-maslahatchi bo‘lib ishlagan mirishkorlik Zulxumor Hamrayeva 2018 yilda ishdan bo‘shatilgan. Ommaviy qabulda bu fuqaroning ham mehnat nizosi bo‘yicha shikoyat arizasi qabul qilindi va nazoratga olindi.

Ommaviy qabullar jarayonida Oliy sudga 886 ta murojaat tushgan bo‘lsa, ularning 278 tasi joyida hal etildi, 280 ga yaqiniga asoslantirilgan tushuntirishlar berildi. Ijro uchun nazoratga olingan 239 ta murojaatdan 134 tasi bo‘yicha arizalar Oliy sud tomonidan kassatsiya tartibida hal qilish uchun qabul qilinib, tegishli sudlov hay’atiga ko‘rib chiqish uchun o‘tkazildi. 18 ta fuqaroning arizasi viloyat sudining apellyasiya instansiyasida ko‘rish uchun qabul qilindi. 14 ta murojaat bo‘yicha da’vo arizasi birinchi instansiya sudining ish yurituviga qabul qilinib, nazoratga olindi. 141 nafar shaxs jazoni o‘tashdan muddatidan ilgari shartli ravishda ozod qilindi. 29 nafar shaxsga nisbatan aliment undirish yuzasidan sud buyrug‘i chiqarildi.

Ommaviy qabullarda Bosh prokuraturaga 360 nafar fuqaro turli masalalarda murojaat qilgan bo‘lsa, shundan 62 ta masala joyida hal qilindi. Murojaatlarning asosiy qismi tergov va surishtiruv, sud qarorlari ijrosi, ijtimoiy-iqtisodiy, uy-joy, moddiy yordam, kommunal soha yuzasidan bo‘ldi. Ish masalasida murojaat qilgan 21 nafar fuqaroning 4 nafari o‘ziga ma’qul bo‘lgan korxona va tashkilotlarga ishga joylashtirilgan bo‘lsa, 17 nafari kasbga o‘qitishga yo‘naltirildi.

Ichki ishlar vazirligi tomonidan qabul jarayonlarida 155 nafar fuqaro bilan muloqotlar o‘tkazilib, ular tomonidan bildirilgan 49 ta masala joyida ijobiy hal etildi, qo‘shimcha o‘rganish talab etiladigan 101 ta murojaat ko‘rib chiqilishi nazoratga olindi.

Qamashilik Turdimurod Haydarov G‘uzor tumani IIB huzuridagi tergov bo‘limida qo‘zg‘atilgan jinoyat ishi sud organlariga o‘tkazilmasdan qolib kelayotganini aytib, e’tiroz bildirdi. Ushbu holat yuzasidan tergov xizmati mas’ullari va tergovchilarning hisoboti eshitilib, shu kunning o‘zida ish sud organlariga yuborildi. 22 nafar shaxsni muddatidan oldin shartli ravishda ozod qilish bo‘yicha sudlarga taqdimnoma kiritilib, ular jazodan ozod etildi, 36 nafar fuqaroga nisbatan fuqarolik hujjatlari rasmiylashtirilib, ularga ID karta topshirildi.

“Ko‘hna voha tomorqa xizmati” MChJ rahbari Obidjon Xudoyberdiyev esa bojxona xizmati mas’ullariga xorijdan olib kelingan mandarin mahsulotini o‘z omboriga bojxona ta’minlov so‘mmasisiz tushirishda amaliy yordam so‘rab murojaat qildi. Mahsulotni sifatli saqlash uchun jamiyatga qarashli omborda sharoit mavjudligi hisobga olinib, murojaat qanoatlantirildi.

G‘uzor tumanida yashovchi Dilfo‘za Meylanovaning 8 yillik muammosi yechim topdi. 2012 yilda uy sharoitida tug‘ilgan farzandiga tug‘ilganlik haqidagi guvohnomani ololmayotgan ayolning muammosi adliya organlari tomonidan o‘rganilib, farzandiga tug‘ilganlik haqidagi guvohnoma rasmiylashtirib berildi.

Ommaviy qabullar davomida 50 dan ortiq fuqaro ishga joylashtirildi, 30 ga yaqin murojaatchiga imtiyozli kredit, 25 nafariga davolanish uchun order ajratildi. Ehtiyoji bo‘lgan fuqarolarga nogironlik aravachalari, protez-ortopediya buyumlari topshirildi.

Umumlashtirib aytganda, Qashqadaryo vohasi bo‘ylab kechgan jonli muloqotlar asnosida 1 ming 655 kishi ko‘targan 1 ming 678 ta masala o‘rganilib, ularning 572 tasi joyida hal etildi. 524 ta murojaat bo‘yicha huquqiy maslahat va tushuntirish berildi, qo‘shimcha vaqt va o‘rganish talab qiladigan 582 ta murojaat bo‘yicha aniq muddat va mas’ullar belgilanib, nazoratga olindi.


Maqolani ulashing

O'xshash yangiliklar