Русланбек Давлетов: Ҳаракатлар стратегиясининг вазифаларини амалга ошириш учун 31 млрд доллар йўналтирилган

Русланбек Давлетов: Ҳаракатлар стратегиясининг вазифаларини амалга ошириш учун 31 млрд доллар йўналтирилган

5 октябрь куни «Ўзбекистон: беш йил ичидаги жадал ислоҳотлар» халқаро анжумани бўлиб ўтди. Унда Адлия вазири Русланбек Давлетов Ҳаракатлар стратегиясининг бешта устувор йўналишида белгиланган вазифалар, сўнгги йилларда қабул қилинган қонун, қарор, фармон ва ҳукумат қарори қабул қилингани ҳақида сўзлади.

“Ҳаракатлар стратегиясининг бешта устувор йўналишида белгиланган вазифаларни амалга ошириш учун 2017−2021 йилларда 5 та давлат дастури қабул қилиниб, 114 трлн сўм ва салкам 31 млрд АҚШ доллари йўналтирилган.

Шунингдек, сўнгги 5 йилда Ҳаракатлар стратегиясини рўёбга чиқариш учун 311 та қонун - унинг 80 та қонуни яхлит янги қонунлар, 2000 га яқин Ўзбекистон президентининг фармон ва қарорлари ҳамда 3000 дан зиёд Ҳукумат қарорлари қабул қилинди”, деди Русланбек Давлетов.

Ҳисобот даврида:

- давлат органларининг очиқлиги ва шаффофлигини таъминлашга қаратилган 3 та муҳим қонун қабул қилинган;

- Давлат хизматлари агентлиги ҳамда давлат хизматлари марказлари ва уларнинг 115 та филиаллари ташкил этилиб, улар орқали 1 йилда ўртача 12 млн хизмат кўрсатилмоқда;

- Давлат хизматчиларининг профессионал корпусини яратиш мақсадида — Давлат хизматини ривожлантириш агентлиги ташкил этилди;

- Электрон ҳукумат тизимини такомиллаштириш, бошқарув жараёнларини рақамлаштириш ва ушбу соҳада узоқ муддатга мўлжалланган кенг кўламли чора-тадбирларни тизимли равишда амалга ошириш мақсадида «Рақамли Ўзбекистон — 2030» стратегияси қабул қилинди;

- Давлат-ҳокимият ваколатлари берилган ва самарасиз деб топилган 110 та идоралараро коллегиал органларнинг фаолияти тугатилди;

- «Очиқ бюджет» портали ишга туширилди ва у орқали ҳозирга қадар 12 мингдан ортиқ маълумотлар очиқланган.

Анжуманда маҳаллий ижро этувчи ҳокимият органлари томонидан қабул қилинадиган қарорларни ишлаб чиқиш, келишиш ва рўйхатдан ўтказишнинг ягона электрон тизими («E-qaror») жорий қилингани ҳам қайд этилди.

Мақолани улашинг

Ўхшаш янгиликлар