Iqtisodiy tadqiqotlar va islohotlar markazi, GIZ va HELVETAS O‘zbekiston iqtisodiyotining kadrlarga bo‘lgan ehtiyojini prognoz qilish uchun tahliliy platformani ishga tushiradi

Hujjatni GIZ loyihasi rahbari Mattias Klingenberg, HELVETAS Uzbekistan loyihasi rahbari Simona Strasburger va SEIR direktori o‘rinbosari Nozimjon Ortiqov imzoladi.

Memorandumga muvofiq, Iqtisodiy tadqiqotlar va islohotlar markazi huzurida kasbiy va dual ta’lim, bandlik hamda iqtisodiyotning malakali kadrlarga bo‘lgan ehtiyojini o‘rganishga qaratilgan ixtisoslashgan tahliliy platforma tashkil etiladi.

Statistik ma’lumotlarni yig‘ish va tahlil qilishga kompleks yondashuv malakali kadrlarga bo‘lgan talab va taklif dinamikasini uch yilgacha bo‘lgan davr uchun baholash imkonini beradi. Tadqiqotlar natijalaridan kasbiy ta’lim muassasalari uchun mutaxassislarni qabul qilish va tayyorlab chiqarish, o‘quv dasturlarini yangilash hamda iqtisodiyot ehtiyojlari bilan kadrlar tayyorlash o‘rtasidagi nomutanosiblik xavfini kamaytirish bo‘yicha tavsiyalar ishlab chiqishda foydalaniladi.

Hamkorlik GIZ va Shveysariya taraqqiyot va hamkorlik agentligi (SDC) tomonidan amalga oshirilayotgan kasbiy ta’lim islohotlarini qo‘llab-quvvatlash tashabbuslarining davomi bo‘ldi. Qo‘shma faoliyat O‘zbekistonda ishonchli ma’lumotlarga asoslangan va mehnat bozorining real ehtiyojlariga yo‘naltirilgan qarorlar qabul qilish tizimini yanada shakllantirishga qaratilgan.

Texnologik o‘zgarishlar va bandlik tarkibi transformatsiyasi sharoitida kasbiy ko‘nikmalarning ish beruvchilar talablariga mos kelishi barqaror iqtisodiy rivojlanish omillaridan biriga aylanmoqda. Kasbiy ta’lim tizimi uchun kadrlarga bo‘lgan talabni muntazam baholash, kvalifikatsiyalarni tahlil qilish va kelgusi kompetensiyalarni prognoz qilish ahamiyati ortib bormoqda.

Platforma doirasida mehnat bozori tendensiyalari, iqtisodiyot tarmoqlarining mutaxassislarga bo‘lgan ehtiyoji, kvalifikatsiyalarning ish beruvchilar talablariga muvofiqligi, dual ta’lim samaradorligi va yangi kasbiy ko‘nikmalarga bo‘lgan istiqbolli talab bo‘yicha tadqiqotlar o‘tkazish rejalashtirilgan.

Birinchi bosqichda asosiy e’tibor mavjud va talab etilayotgan kvalifikatsiyalar o‘rtasidagi nomutanosiblik, ishchi kuchiga bo‘lgan talab dinamikasi va bandlik tarkibini tahlil qilishga qaratiladi. Shuningdek, dual ta’limning xarajatlari va samarasini baholash, onlayn vakansiyalar monitoringini o‘tkazish hamda kelgusi kompetensiyalar prognozini tayyorlash nazarda tutilgan.

Alohida yo‘nalish sifatida sun’iy intellekt va yangi texnologiyalarning mehnat bozoriga ta’siri o‘rganiladi. Mazkur ish natijalaridan o‘quv dasturlarini ish beruvchilar talablari va iqtisodiyot tarkibidagi uzoq muddatli o‘zgarishlarga muvofiqlashtirish bo‘yicha tavsiyalar tayyorlashda foydalaniladi.

Hamkorlik xalqaro tajriba almashish, zamonaviy tadqiqot metodikalarini joriy etish va mahalliy mutaxassislar salohiyatini oshirishni ham nazarda tutadi. Ushbu jarayonga Germaniya Federal kasbiy ta’lim instituti (BIBB), Shveysariyaning CEMETS Global xalqaro tarmog‘i, shuningdek, boshqa ilmiy tashkilotlar va sohaviy hamkorlarni jalb etish rejalashtirilgan.

Memorandumning imzolanishi O‘zbekistonda kasbiy ta’lim islohotlarini tahliliy jihatdan qo‘llab-quvvatlashni kuchaytirish imkonini beradi. Mehnat bozori ehtiyojlarini muntazam baholash, ko‘nikmalarni prognoz qilish va xalqaro hamkorlarning ishtiroki iqtisodiyot uchun kadrlar tayyorlashni yanada aniqroq yo‘lga qo‘yishga xizmat qiladi.

Ma’lumot uchun

SDC Shveysariyaning xalqaro hamkorlik bo‘yicha davlat agentligi hisoblanadi. Agentlik 34 ta mamlakatda hamkorlik dasturlarini amalga oshiradi.

BIBB Germaniyaning kasbiy ta’lim sohasidagi ilmiy-metodik markazi hisoblanadi. Institut mehnat bozori va kvalifikatsiyalarga bo‘lgan ehtiyojni o‘rganadi, shuningdek 300 dan ortiq tan olingan kasblar bo‘yicha standartlarni ishlab chiqishda ishtirok etadi.

CEMETS Global Shveysariya oliy texnik maktabi Syurix (ETH Zurich) huzuridagi ta’lim tizimlarini isloh qilish bo‘yicha xalqaro markaz hisoblanadi.

Iqtisodiy tadqiqotlar va islohotlar markazi

Jamoatchilik bilan aloqalar bo‘limi