Infografika: O‘zbekiston iqtisodiyotini qo‘llab-quvvatlash chora-tadbirlari

Infografika: O‘zbekiston iqtisodiyotini qo‘llab-quvvatlash chora-tadbirlari

31 mart kuni Prezident Shavkat Mirziyoyev raisligida makroiqtisodiy barqarorlikni ta’minlash, jahon iqtisodiyotidagi murakkab vaziyatdan kelib chiqib hudud va tarmoqlarni rivojlantirish, aholi farovonligini oshirish masalalari bo‘yicha videoselektor yig‘ilishi bo‘lib o‘tdi.

Yig‘ilishda qabul qilingan qarorlarda iqtisodiyot va tadbirkorlikni qo‘llab-quvvatlash chora-tadbirlariga katta e’tibor qaratildi.

Markaz infografikasida ko‘riladigan chora-tadbirlar majmuasi keltirilgan.

Tijorat banklari tomonidan tadbirkorlarga xomashyo sotib olish va aylanma mablag‘lar uchun qo‘shimcha 10 trillion so‘m “revolver” kreditlar ajratiladi. Ushbu mablag‘lar birinchi galda eksportchilar, oziq-ovqat va iste’mol tovarlari ishlab chiqaruvchilarga taqdim etiladi.

Davlat dasturlari doirasida meva-sabzavot yetishtirish (2 trillion so‘m), oilaviy tadbirkorlik (10 trillion so‘m), ipoteka (13 trillion so‘m) va ta’limga (1 trillion so‘m) ajratiladigan kreditlar hajmi va imtiyozli stavkalari saqlab qolinadi.

Soliq ma’murchiligidagi yangi mexanizmlar bo‘yicha yil yakunigacha jarima qo‘llamaslik, bojxona imtiyozlarini qo‘llash davrini uzaytirish bo‘yicha ko‘rsatmalar berildi. Omborlardagi tovarlarning hisobini va kodlarini majburiy yuritish, mulklar hamda ijara shartnomalarini elektron ro‘yxatdan o‘tkazish kabi yangi mexanizmlar bo‘yicha jarima va boshqa ta’sir choralari yil yakuniga qadar qo‘llanilmaydi. O‘z ehtiyojlari uchun olib kelingan xomashyo, asbob-uskuna, ehtiyot qismlarga bojxona imtiyozlarini qo‘llash davri hozirgi 6 oydan 1 yilgacha uzaytiriladi.

Yil yakuniga qadar Rossiya, Ukraina va Belarus bilan ishlayotgan korxonalarga debitor qarzdorligi uchun jarima qo‘llanilmaydi. Ushbu mamlakatlar bilan ishlayotgan 179 ta eksportchilarning 4 trillion so‘m bank kreditlari bo‘yicha qarzdorligi uzaytiriladi, penya va jarimalar undirilmaydi.

Shu bois yig‘ilishda xorijiy kompaniyalari bilan muzokaralar o‘tkazib, ularning ishlab chiqarish zanjiriga qo‘shilish bo‘yicha amaliy ishlarni boshlash vazifasi qo‘yildi. Shuningdek, Navoiy, Samarqand, Toshkent viloyati va 1 sentyabrga qadar Buxoro va Surxondaryoda qo‘shni mamlakatlar bozoriga mahsulot yetkazib beruvchi ulgurji savdo hududlarini tashkil etish vazifalari topshirildi.

Iqtisodiy kompleks rahbarlari makroiqtisodiy barqarorlikni saqlab qolish bo‘yicha ta’sirchan choralarni davom ettirishlari lozimligi qayd etildi. Buning uchun hudud va tarmoq xarajatlarini 10 trillion so‘mga qisqartirish choralarini ishlab chiqish maqsadga muvofiq. Bu vazifa asosan moliyaviy manbasi aniq bo‘lmagan qurilishlarni boshlamaslik hamda bino ta’mirlash, avtomobil, mebel, ofis anjomlari xarid qilish kabi qo‘shimcha xarajatlarni to‘xtatib turish orqali amalga oshiriladi.

Bu borada ishlatilmayotgan zaxiralar va imkoniyatlarimiz hali ko‘p. Masalan, hozirgi kunga qadar qiymati 9 milliard dollar bo‘lgan 105 ta loyiha doirasida jalb etilgan mablag‘lar ishlatilmay turibdi yoki ob’yektlarni qurish muddatlari cho‘zilib ketyapti. Bir oy muddatda har bir loyihani o‘rganib, ularni jadallashtirish topshirildi. Bunda, samarasiz va istiqbolsiz loyihalarni tugatish bo‘yicha takliflar tayyorlanadi.

Yig‘ilishda 1,5 mingdan ziyod davlat mulkini savdoga chiqarish bo‘yicha yaqinda imzolangan Prezident qarori ijrosini ta’minlash bilan bog‘liq vazifalar belgilab berildi. Masalan, 2022 yil 1 mayga qadar 50 mingta (4,5 ming gektar) yer uchastkalarini savdoga chiqarish nazarda tutilgan.

Yig‘ilishda tashqi noxush ta’sirlarning oldini olish maqsadida iqtisodiyot va tadbirkorlarni qo‘llab-quvvatlash choralari belgilab olindi. Jumladan, iqtisodiyot o‘sishini ta’minlash uchun joriy yilda 185 trillion so‘m miqdorida kredit ajratiladi (2021 yilda – 166 trillion so‘m edi).


Maqolani ulashing

O'xshash yangiliklar