16 ёшга тўлганлар ID-карта олаётганда солиқ тўловчилар ва жамғариб бориладиган пенсия рўйхатига ҳам киритилади

16 ёшга тўлганлар ID-карта олаётганда солиқ тўловчилар ва жамғариб бориладиган пенсия рўйхатига ҳам киритилади

2021 йил 1 апрелдан бошлаб 16 ёшга тўлган шахсларга идентификация ID-карталари бериш уларни давлат солиқ хизмати органларида солиқ тўловчи сифатида ҳисобга қўйиш ҳамда фуқарони жамғариб бориладиган пенсия тизимида ҳисобга қўйиш билан бир вақтнинг ўзида амалга ошириш режалаштирилмоқда. Бу ҳақдаги таклиф Адлия вазирлиги жамоатчилик муҳокамаси учун эълон қилган Президент фармони лойиҳасидан ўрин олган.

Ҳужжат лойиҳасига кўра, 2021 йил 1 июлдан бошлаб солиқ органларида солиқ тўловчиларнинг ҳисобини юритиш жисмоний шахснинг шахсий идентификация рақамидан (ЖШШИР) фойдаланган ҳолда амалга оширилади.

ЖШШИРдан фойдаланишга ўтилиши муносабати билан алоҳида тартибда солиқ тўловчининг идентификация рақамини (СТИР) бериш ва фуқарони жамғариб бориладиган пенсия тизимида ҳисобга қўйиш бўйича давлат хизматларини кўрсатишни бекор қилиш таклиф қилинмоқда.

Шу билан бирга, лойиҳада қайд этилишича, ЖШШИР давлат, банк, ижтимоий ва бошқа хизматларни кўрсатишда фуқаронинг шахсини тасдиқловчи ягона идентификатор ҳисобланади ҳамда давлат ва хўжалик бошқарув органлари, давлат муассасалари томонидан жисмоний шахсларни идентификациялайдиган алоҳида рақамларни юритиш тақиқланади.

Бундан ташқари, 2021 йил 1 мартдан хорижга чиқиш биометрик паспортини расмийлаштириш учун ариза-анкетани ва давлат божини қабул қилиш фақат электрон тарзда ЯИДХП орқали амалга оширишга ўтиш таклифи илгари сурилди.

Ҳужжат лойиҳаси муҳокамалари 25 декабрга қадар давом этади.

Мақолани улашинг

Ўхшаш янгиликлар