Таҳлил

Андижон вилоятининг 2023 йил январь-сентябрь якунлари бўйича асосий капиталга киритилган инвестициялар таҳлил қилинди

03.11.2023 10:56
93

Иқтисодий тадқиқотлар ва ислоҳотлар маркази Наманган филиали томонидан Андижон вилоятнинг 2023 йил январь-сентябрь ойлари якунлари бўйича асосий капиталга киритилган инвестициялар кўрсаткичлари Cтатистика агентлиги маълумотларига асосланган ҳолда таҳлил қилинди.

Жорий даврда 12 221,8 млрд. сўм асосий капиталга инвестициялар ўзлаштирилиб, ўсиш суръати 2022 йилнинг мос даврига нисбатан 108,6%ни ташкил этди. Марказлашган молиялаштириш манбалари ҳисобидан 1 810,1 млрд. сўм ёки жами инвестициялар ҳажмининг 15,0% ўзлаштирилди. Мос равишда, марказлашмаган молиялаштириш манбалари ҳисобидан 10 401,4 млрд. сўм ёки жами инвестициялар ҳажмининг 85,0% ўзлаштирилди.

2023 йилнинг январь-сентябрь ойларида корхона ва ташкилотларнинг ўз маблағлари ҳисобидан молиялаштирилган асосий капиталга инвестициялар – 2 117,7 млрд. сўм, аҳоли маблағлари ҳисобидан жами 1 405,7 млрд. сўм, тўғридан-тўғри хорижий инвестициялар ҳисобидан ўзлаштирилган инвестициялар ҳажми 6 568,0 млрд. сўмни ташкил этди. Шунингдек, тижорат банклари кредитлари ва бошқа қарз маблағлари ҳисобидан 310,0 млрд. сўм, давлат кафолати остидаги хорижий кредитлар 206,1 млрд. сўм, давлат бюджети 1 291,9 млрд. сўм, Сув таъминоти ва канализация тизимларини ривожлантириш жамғармаси томонидан 167,5 млрд. сўм миқдорида асосий капиталга инестициялар ўзлаштирилди.

2023 йил январь-сентябрь ойларида иқтисодий фаолият турлари бўйича асосий капиталга инвестициялар таркибида энг катта улуш ишлаб чиқариш саноати (56,8%) ва қишлоқ хўжалиги (5,6%), энг кам улуш эса соғлиқни сақлаш (1,7%), ахборот ва алоқа (0,6%), ва тоғ-кон саноатига (0,5%) инвестициялар киритилган.

Шаҳарлар ва туманлар кесимида асосий капиталга инвестицияларнинг энг катта ҳажми Булоқбоши туманида 3 662,0 млрд. сўмни, асосий капиталга инвестицияларнинг энг кичик ҳажми эса Булоқбоши туманида 140,2 млрд. сўмни ташкил этади. Бундан ташқари, киритилган инвестициялар ҳажмининг юқори ўсиши Булоқбоши (276,0%), Марҳамат (130,2%), Жалақудуқ (128,6%), туманида кузатилган бўлса, энг паст кўрсаткичлар Олтинкўл (55,4%) ва Асака туманларида (46,1%) кузатилди.

2023 йил январь-сентябрь ойларида умумий майдони 944,3 минг кв.м бўлган янги турар-жойлар ишга туширилди, шундан 604,2 минг кв.м бўлган турар жойлар қишлоқ жойларидаги жойлар ҳисобланади. Бундан ташқари 10,4 км газ ва 80,7 км сув тармоқлари ишга туширилди.