2026 йил I чораги якунларига кўра Ўзбекистон иқтисодиёти асосий йўналишлар бўйича ишончли ўсиш ва барқарорликни намоён этди. Ялпи ички маҳсулот ҳажми жорий нархларда 447,9 трлн сўмни (ёки 36,9 млрд доллар) ташкил қилди. Иқтисодиётнинг реал ўсиши 8,7% га етди, бу ўтган йилнинг мос даврига нисбатан 1,9 фоиз бандга юқори бўлиб, аввал кутилган кўрсаткичлардан ҳам ошди. Бу натижа сўнгги бир йилдаги энг юқори чораклик кўрсаткич ҳисобланади.
Иқтисодиётнинг барча асосий тармоқларида ўсиш сақланди. Қурилиш энг тез ўсган соҳа бўлиб, ялпи қўшилган қиймат 15,0% га ошиб, 26,4 трлн сўмга етди. Хизматлар соҳаси 8,8% га ўсиб, 240,1 трлн сўмни ташкил этди ва ҳали ҳам иқтисодиётнинг энг йирик қисми бўлиб қолмоқда. Саноат 8,0% га ўсиб, 124,9 трлн сўмлик қиймат яратди. Қишлоқ хўжалиги эса 5,1% га ўсиб, 36,2 трлн сўмга етди.
Яширин иқтисодиёт улуши камайишда давом этди, 24,8% дан 22,9% гача тушди. Бу солиқ тизими яхшиланиши, электрон савдо назорати ва бандликни расмийлаштириш чоралари натижасидир.
Саноатда ишлаб чиқариш 289,3 трлн сўмга етди ва прогноздан юқори бўлди. Нефтни қайта ишлашда катта ўсиш кузатилди: умумий кўрсаткич 129,5%, мазут 179,1%, дизель ёқилғиси 154,5%. Енгил саноат ҳам яхши натижа берди: кийим-кечак ва тўқимачилик 15,3%, трикотаж 26,9%, пахта толаси 25,2%. Қурилиш материаллари 14,4% га, цемент 15,7% га ошди. Автосаноат 12,5% га ўсди, жумладан автобуслар 64,7% га, юк машиналари 46,6% га кўпайди. Озиқ-овқат саноатида ҳам ўсиш бўлиб, у 8,7% ни ташкил этди (ўсимлик ёғи 16,0%, ун 31,2%). Шу билан бирга, айрим тармоқларда, хусусан “Ўзэлтехсаноат” тизимида пасайиш кузатилди.
Бозор хизматлари сектори 293,6 трлн сўмга етди. Энг катта улуш савдо (75,1 трлн), транспорт (49,1 трлн), молиявий хизматлар (46,8 трлн), яшаш ва овқатланиш (46,2 трлн), ҳамда алоқа ва ахборотлаштириш (22,8 трлн) ҳиссасига тўғри келди. Энг тез ўсган йўналишлар таълим (22,5%) ва молиявий хизматлар (22,4%) бўлди.
Қишлоқ хўжалигида ҳам ижобий ҳолат сақланди. Тармоқ 5,1% га ўсди, сабзавот ишлаб чиқариш 29% га кўпайди ва бу ички бозорда нархларни барқарорлаштиришга ёрдам берди. Бироқ баҳорги экишда айрим камчиликлар бор: картошка режанинг 73,9% и, озуқа экинлари эса 26,8% и бажарилган.
Инвестициялар ҳажми рекорд даражага етди. Асосий капиталга йўналтирилган инвестициялар 12,85 млрд доллар бўлиб, 41,5% га ўсди. Тўғридан-тўғри хорижий инвестициялар 8,84 млрд долларга етди (+45,7%). Чорак давомида 1 508 та янги лойиҳа (1,185 млрд доллар) ишга туширилди.
Ташқи савдода экспорт 5,81 млрд доллар бўлди. Унинг камайиши асосан олтин сотувлари қисқаргани билан боғлиқ. Олтинсиз ҳисоблаганда экспорт 26,4% га ўсди, бу эса нохомашё экспорти кенгаяётганини кўрсатади. Импорт 12,21 млрд долларга етди (+30,8%). Савдо баланси манфий сальдоси -6,40 млрд долларгача кенгайди.
Инфляция сезиларли пасайди. Январь–мартда нархлар 1,93% га ошди, йиллик инфляция эса 7,07% гача тушди (аввал 10,34%). Бу иқтисодиётда барқарорлик кучаяётганини кўрсатади.
Ҳудудлар орасида саноат бўйича Навоий вилояти, Тошкент шаҳри ва Тошкент вилояти етакчи. Қурилишда энг юқори ўсиш Қорақалпоғистонда (176,0%) қайд этилди. Хизматлар бўйича Тошкент шаҳри етакчи бўлиб, ўсиш 18,4% ни ташкил этди.
Ижтимоий кўрсаткичлар ҳам яхшиланмоқда. Камбағаллик 5,0% гача тушди, ишсизлик 4,7% ни ташкил этди. Йилнинг биринчи ярмига бориб бу кўрсаткичлар 4,3% гача пасайиши мумкин.
Йил якунигача иқтисодиётда юқори ўсиш сақланиши кутилмоқда. ЯИМ ўсиши 8,3–8,7%, хизматлар — 9,1%, саноат — 8,7%, қурилиш — 11,5% бўлиши прогноз қилинмоқда.
Иқтисодий тадқиқотлар ва ислоҳотлар маркази
Жамоатчилик билан алоқалар бўлими
Изоҳ қолдириш