2026 yil I choragi yakunlariga ko‘ra O‘zbekiston iqtisodiyoti asosiy yo‘nalishlar bo‘yicha ishonchli o‘sish va barqarorlikni namoyon etdi. Yalpi ichki mahsulot hajmi joriy narxlarda 447,9 trln so‘mni (yoki 36,9 mlrd dollar) tashkil qildi. Iqtisodiyotning real o‘sishi 8,7% ga yetdi, bu o‘tgan yilning mos davriga nisbatan 1,9 foiz bandga yuqori bo‘lib, avval kutilgan ko‘rsatkichlardan ham oshdi. Bu natija so‘nggi bir yildagi eng yuqori choraklik ko‘rsatkich hisoblanadi.
Iqtisodiyotning barcha asosiy tarmoqlarida o‘sish saqlandi. Qurilish eng tez o‘sgan soha bo‘lib, yalpi qo‘shilgan qiymat 15,0% ga oshib, 26,4 trln so‘mga yetdi. Xizmatlar sohasi 8,8% ga o‘sib, 240,1 trln so‘mni tashkil etdi va hali ham iqtisodiyotning eng yirik qismi bo‘lib qolmoqda. Sanoat 8,0% ga o‘sib, 124,9 trln so‘mlik qiymat yaratdi. Qishloq xo‘jaligi esa 5,1% ga o‘sib, 36,2 trln so‘mga yetdi.
Yashirin iqtisodiyot ulushi kamayishda davom etdi, 24,8% dan 22,9% gacha tushdi. Bu soliq tizimi yaxshilanishi, elektron savdo nazorati va bandlikni rasmiylashtirish choralari natijasidir.
Sanoatda ishlab chiqarish 289,3 trln so‘mga yetdi va prognozdan yuqori bo‘ldi. Neftni qayta ishlashda katta o‘sish kuzatildi: umumiy ko‘rsatkich 129,5%, mazut 179,1%, dizel yoqilg‘isi 154,5%. Yengil sanoat ham yaxshi natija berdi: kiyim-kechak va to‘qimachilik 15,3%, trikotaj 26,9%, paxta tolasi 25,2%. Qurilish materiallari 14,4% ga, sement 15,7% ga oshdi. Avtosanoat 12,5% ga o‘sdi, jumladan avtobuslar 64,7% ga, yuk mashinalari 46,6% ga ko‘paydi. Oziq-ovqat sanoatida ham o‘sish bo‘lib, u 8,7% ni tashkil etdi (o‘simlik yog‘i 16,0%, un 31,2%). Shu bilan birga, ayrim tarmoqlarda, xususan “O‘zeltexsanoat” tizimida pasayish kuzatildi.
Bozor xizmatlari sektori 293,6 trln so‘mga yetdi. Eng katta ulush savdo (75,1 trln), transport (49,1 trln), moliyaviy xizmatlar (46,8 trln), yashash va ovqatlanish (46,2 trln), hamda aloqa va axborotlashtirish (22,8 trln) hissasiga to‘g‘ri keldi. Eng tez o‘sgan yo‘nalishlar ta’lim (22,5%) va moliyaviy xizmatlar (22,4%) bo‘ldi.
Qishloq xo‘jaligida ham ijobiy holat saqlandi. Tarmoq 5,1% ga o‘sdi, sabzavot ishlab chiqarish 29% ga ko‘paydi va bu ichki bozorda narxlarni barqarorlashtirishga yordam berdi. Biroq bahorgi ekishda ayrim kamchiliklar bor: kartoshka rejaning 73,9% i, ozuqa ekinlari esa 26,8% i bajarilgan.
Investitsiyalar hajmi rekord darajaga yetdi. Asosiy kapitalga yo‘naltirilgan investitsiyalar 12,85 mlrd dollar bo‘lib, 41,5% ga o‘sdi. To‘g‘ridan-to‘g‘ri xorijiy investitsiyalar 8,84 mlrd dollarga yetdi (+45,7%). Chorak davomida 1 508 ta yangi loyiha (1,185 mlrd dollar) ishga tushirildi.
Tashqi savdoda eksport 5,81 mlrd dollar bo‘ldi. Uning kamayishi asosan oltin sotuvlari qisqargani bilan bog‘liq. Oltinsiz hisoblaganda eksport 26,4% ga o‘sdi, bu esa noxomashyo eksporti kengayayotganini ko‘rsatadi. Import 12,21 mlrd dollarga yetdi (+30,8%). Savdo balansi manfiy saldosi -6,40 mlrd dollargacha kengaydi.
Inflyasiya sezilarli pasaydi. Yanvar–martda narxlar 1,93% ga oshdi, yillik inflyasiya esa 7,07% gacha tushdi (avval 10,34%). Bu iqtisodiyotda barqarorlik kuchayayotganini ko‘rsatadi.
Hududlar orasida sanoat bo‘yicha Navoiy viloyati, Toshkent shahri va Toshkent viloyati yetakchi. Qurilishda eng yuqori o‘sish Qoraqalpog‘istonda (176,0%) qayd etildi. Xizmatlar bo‘yicha Toshkent shahri yetakchi bo‘lib, o‘sish 18,4% ni tashkil etdi.
Ijtimoiy ko‘rsatkichlar ham yaxshilanmoqda. Kambag‘allik 5,0% gacha tushdi, ishsizlik 4,7% ni tashkil etdi. Yilning birinchi yarmiga borib bu ko‘rsatkichlar 4,3% gacha pasayishi mumkin.
Yil yakunigacha iqtisodiyotda yuqori o‘sish saqlanishi kutilmoqda. YaIM o‘sishi 8,3–8,7%, xizmatlar — 9,1%, sanoat — 8,7%, qurilish — 11,5% bo‘lishi prognoz qilinmoqda.
Iqtisodiy tadqiqotlar va islohotlar markazi
Jamoatchilik bilan aloqalar bo‘limi
Izoh qoldirish