Ҳафталик нархлар шарҳи: Икки ҳафта давомида ўсимлик ёғи нархи 0,9 фоизга пасайди

Ўсимлик ёғи эътибор марказида

Сўнгги пайтларда ўсимлик ёғининг нархлари конъюктураси ҳукумат ва жамоатчилик диққат марказида бўлиб келмоқда. Ташқи бозорда ушбу маҳсулотга бўлган талабнинг ортиши ва натижада тадбиркорларнинг нархлар фарқидан фойдаланган ҳолда юқори фойда олишга интилиши оқибатида нархларнинг кўтарилиши давлат томонидан бозорни барқарорлаштирувчи чора-тадбирларнинг жорий этилишига олиб келди. Мониторинг шуни кўрсатмоқдаки, амалга оширилган ишлар ўз самарасини бермоқда.

Ўзбекистон Республикаси Давлат статистика қўмитасининг маълумотларига кўра, ҳафта охирига келиб республикада бир литр ўсимлик ёғининг ўртача нарх 0,4% га пасайиб, 19 034 сўмни ташкил этди. Ўртача нархлар диапазони Андижон вилоятида бир литр учун 17 110 сўм, Тошкент шаҳрида 20 440 сўмгача бўлган оралиқда ўзгариб борди.

11 та вилоятда ўсимлик ёғи нархларининг пасайиши кузатилмоқда, энг юқориси Хоразм (1,3% га), Бухоро (0,9% га) вилоятларида ва Тошкент шаҳрида (0,8%) қайд этилди.

Туманлар таркибида ўсимлик ёғи нархининг бир литри учун энг катта пасайиш Шаҳрихон (5%), Хива (5%), Оққўрғон (4,8%), Қибрай (4,6%), Улуғнор (4,3%), Зарбдор (4,3%) туманларида кузатилди.

Ҳафта давомида нархлар фақат 3 та вилоятда ошди, улардан энг баланди Қашқадарё (0,2% га), Тошкент (0,1% га), Фарғона (0,02% га) тўғри келади.

Ўсимлик ёғи нархларининг пасайиши ички бозордаги вазиятнинг барқарорлашаётганидан далолат беради.

Қуйида 5 майдан 12 майгача мол гўшти, сут, тухум, картошка, гуруч, буғдой уни, шакар нархларининг ўзгариши келтирилган.

Кўриб чиқилаётган давр мобайнида республикада ўртача нархларнинг ўсиши мол гўшти (0,2 %га, килоси 61 132 минг сўмгача), картошка (0,4 %га, килоси 4,673 сўмгача), тухум (0,1 %га, ўнтаси 10,775 сўмгача), буғдой уни (0,8 %га, килоси 4,879 сўмгача), шакар (0,9 %га, килоси 8,379 сўмгача) учун қайд этилди.

Ҳудудлар кесимида энг юқори нарх ўсиши:

• мол гўшти Сурхондарё (1,8%) ва Навоий (1,4%) вилоятларида;
• сут Хоразм ва Бухоро вилоятларида (0,6%);
• тухум Навоий (1,6%), Хоразм (1,4%) вилоятларида;
• картошка Хоразм (6,7%), Сирдарё (5,2%) вилоятлари ва Қорақалпоғистон Республикасида (5%);
• гуруч Навоий (1,2%) ва Фарғона (0,6%) вилоятларида;
• буғдой уни Наманган (12,6%) ва Қашқадарё (0,6%) вилоятларида;
• шакар Қашқадарё (4,9%), Сурхондарё (2%) вилоятларида кузатилди.

Республикада ҳафта давомида ўртача нархларнинг пасайиши сут (0,2%га, литрига 6 089 сўмгача), гуруч (0,04% га, килоси 10 165 сўмгача), ўсимлик ёғи (0,4% га, литрига 19 034 сўмгача) учун қайд этилган.

Ҳудудлар кесимида нархларнинг энг катта пасайиши қуйидагилар учун қайд этилди:

• мол гўшти – Хоразм вилоятида (0,7%), Тошкентда (0,3%);
• сут – Қорақалпоғистон Республикасида (2,4%), Андижон (1%) ва Қашқадарё (0,9%) вилоятларида;
• тухум – Наманган (0,5%), Андижон ва Самарқанд (0,4%) вилоятларида;
• картошка – Жиззах (3,5%), Қашқадарё (1,9%) вилоятларида ва Тошкент (2,5%) шаҳрида;
• гуруч – Қашқадарё (0,7%), Жиззах (0,6%), Андижон (04,5%) вилоятларида,
• буғдой уни – Тошкент (0,3%), Фарғона (0,03%) вилоятларида;
• шакар – Тошкент (0,5%), Фарғона (0,2%) вилоятларида;

Шундай қилиб, Ўзбекистонда кўриб чиқилаётган ҳафта давомида асосий истеъмол товарлари учун нарх муҳити нисбатан паст даражада ўзгарувчанлиги билан ажралиб туради.

Шакар ва буғдой уни нархларининг кўтарилиши ҳақида хавотирлар бор.