Afg‘onistondan O‘zbekistonga kiruvchi shaxslar kirish vizasini rasmiylashtirmasdan 10 kun davomida hududda bo‘lish tartibi joriy etilmoqda

Afg‘onistondan O‘zbekistonga kiruvchi shaxslar kirish vizasini rasmiylashtirmasdan 10 kun davomida hududda bo‘lish tartibi joriy etilmoqda

“Surxondaryo viloyati va Toshkent shahrida maxsus iqtisodiy va kichik sanoat zonalari faoliyatini yanada rivojlantirish chora-tadbirlari to‘g‘risida”gi Prezident Farmoni qabul qilindi.

Farmonga muvofiq, “Termiz” erkin iqtisodiy zonasi hududini qisqartirish hisobiga quyidagilar tashkil etildi:

  • “Termiz xalqaro savdo markazi” erkin savdo zonasi;
  • “Termiz xalqaro savdo markazi” erkin savdo zonasi direksiyasi” davlat unitar korxonasi.

Termiz xalqaro savdo markazi hududida, jumladan:

  • zamonaviy texnologiyalar asosida mahsulotlarni qabul qilish, saqlash, qayta ishlash, saralash va qadoqlash xizmatlari va elektron savdo portallari tashkil etiladi;
  • “yagona darcha” va boshqa xizmatlar yo‘lga qo‘yiladi;
  • Afg‘onistondan kiruvchi shaxslarning, istisno tariqasida, O‘zbekistonga kirish vizasini rasmiylashtirmasdan, shaxsiy va pasport nazoratidan o‘tgan holda 10 kun davomida hududda bo‘lish tartibi joriy etiladi;
  • tadbirkorlar tomonidan chet el fuqarolariga va fuqaroligi bo‘lmagan shaxslarga realizatsiya qilinadigan hamda Afg‘onistonga olib chiqiladigan tovarlar va xizmatlar eksportga tenglashtiriladi;
  • chet el tovarlari “erkin bojxona zonasi” bojxona rejimiga rasmiylashtirish orqali joylashtiriladi hamda, istisno tariqasida, ushbu tovarlar bilan chakana savdo operatsiyalarini amalga oshirishga ruxsat etiladi;
  • Termiz xalqaro savdo markazi hududiga Afg‘oniston tomonidan kirish va undan chiqish “Termiz-avtoyo‘l” o‘tkazish punktidan maxsus texnik vositalari bilan jihozlangan alohida yo‘lak (koridor) orqali amalga oshiriladi.

Hujjat haqidagi to‘liq ma’lumot bilan www.lex.uz sayti orqali tanishish mumkin.

Maqolani ulashing

O'xshash yangiliklar